Read Tangkhul Naga MATTHEW 5 Bible Online

MATTHEW 5 - Tangkhul Naga bible

MATTHEW 5

¹ Mi kachung chi theilaga Jishuna kaphung akhali kai kala ana pamkazang eina awui sākhangatha̱bing awui ngalemli rāpamsera.

²Ana tui yirphokta athumli tamchitheida hānga:

³ “Manglāli kachāmbing chi sokhamina, khikhalajila kazing wungram chi athumwuina!

⁴ Chapkhangachābing chi sokhamina, khikhalajila athumli Varena ringphā ngasakra!

⁵ Khanimabing chi sokhamina, khikhalajila athumna okathui chi mathunkhuira!

⁶ Khamashung khangarongwui vang kathai ra̱kachangbing sokhamina, khikhalajila athumli ningyang ungngasakra!

⁷Lumashankatha̱bing chi sokhamina, khikhalajila athumna lukhamashan samphangra!

⁸ Wuklung tharzāri kahaibing chi sokhamina, khikhalajila athumna Vareli theira!

⁹Chingrihai khavai kasābing chi sokhamina, khikhalajila athumli Varewui naongarā hora!

¹⁰ Khamashung khangarongwui vang rekharek kahaibing chi sokhamina, khikhalajila kazing wungram chi athumwui ngasāra!

¹¹“Iwui vang eina mibingna minamda khamashāt, rekakharek kala phenphāphāda morei chiphunkahaibing nathum sokhamina.

¹² Mathānlu kala ringphālu, khikhalajila kazingramli nathumwui sāman haklaka, kaja hikathāwui vang eina nathumli rida leikasā marānbinglila rekhareksai.

¹³ “Nathum okathuiwui machina. Kha machiwui katum shimānhaiakha kathada chi tumngasakluipairakhala? Chi ayarli horshokhaida mina naikakazam maningla khikhikhawui vangla kānkhanā maleiluimana.

¹⁴ “Nathum apuk-apagva̱wui kahorna. Kaphungtungli sākā kahai keinung chi mathumhaipaimana.

¹⁵ Lha mibingna thaomei sharlaga luk eina makhumhaimana. Kha thaomei sharkhavai meishongli haida shimlungli khalei saikorana kahor samphanga.

¹⁶Nathumwui kahor chi mibingwui mangāli horngasaklu, chithākha athumna nathumwui kaphā otsak chi theilaga kazingramli khalei nathumwui Avāli masochikatra.

¹⁷“Ain eina marān tui chi shimān ngasakida I kharāna da maphaningalu. Chi shimān ngasakida kharā maningla kha chi ungshung ngasak khavai I kharāna.

¹⁸ Ina nathumli kachangkhat eina kahāng hina, kazingram eina okathui mashimānranglakha eina tangda kala sāki kaji ot saikora masākupranglakha eina tangda ainwui mayekkainao akhala mashimānlakmara.

¹⁹ Kachikathāna ningkhami paimeikap kajili mahengsanglaga ana kateibingli chi tākam eina sālu da tamchitheiakha mi chi kazing wungramli teomeikap kaja ngasāra. Kha saikora khamayona kala tamkachithei mi chili kazing wungramli khareia ngasā ngasakra.

²⁰Kaja ina nathumli kahāngna, kaja ain kathema eina Phariseebingli nathumna mamashungmeirarakha kachilikha nathum kazing wungramli mazangrarmara.

²¹ “Achālakhawui mibingli, ‘Mi mashaothatpaimana, kachikathāna shaothatakha ali bichar sāphalungra’ da hāngkahai nathumna shāhaira.

²²Kha ina nathumli kahāngna, kachikathāna khi ngalangkha maleila achināli malungvātakha ali bichar sāphalungra. Kachikathāna achināli yomtui matuiakha ali hanga̱shimli khuikāra kala kachikathāna ‘Makānkhana mangkhama̱ mi!’ da phorakha meifali horsangra.

²³Chiwui vang eina nana hanphutpamli nawui kachigat chigatkida leilakha nachināna nali makhamayā leili da phaningungakha,

²⁴nawui chigat khavai chi hanphut mangāli haisālu, hanunglaga rimeithuida nachināli ngashimkhuifalu. Chiwui thili rālaga rāchigatnaolu.

²⁵ “Kachikathāna nali hanga̱ hokaakha kārot kākhavai zatta leilakha nali kaphena mi chili thaklāk eina mashitkhuilu. Chi mathaakha ana nali bicharwoli mikāhaipai kala bicharwona kashinali misangmaronlaga nali phātopli sanghaipai.

²⁶Ina nali kachangkhat eina kahāngna, nana leiman chi marunkupranglakha eina tangda nali kachilikhala phātopwui eina machishotlakmara.

²⁷ “‘Maphophāpaimana’ da tamchithei kahai nathumna shāhaira.

²⁸Kha ina nathumli kahāngna, sha̱naoli phasāwui khamathang mikyan eina khayang mi kachiva̱ sha̱nao chili awui wuklungli rida phophāhaira.

²⁹ Nawui yāmikna nali morei sāngasakta leiakha chi latshoklaga horhaolu. Nawui phasā tongtingda meifali horsanghaoki kajile naphasākai akha kashimāna phāmei.

³⁰Nawui yāpangna nali morei sāngasakakha chi katatlaga horhaolu. Naphasā tongtingda meifali horsangki kajile naphasākai akha kashimāna phāmei.

³¹ “Hithadala hānghai, ‘Kachikathāna apreiva̱li pānghaiakha ana pāngkahaiwui lairik chi sha̱naopāva̱li miranu.’

³²Kha ina nathumli kahāng hina, kachikathāna phokaphāwui vang maningla apreiva̱li pānghaiakha ana preiva̱li phokaphāva̱ sāngasaka; kala pāngkahai preiva̱li khangakuma mipā chi phophāhaira.

³³ “Chili lāngda achālakhawui mibingli hāngkahai chi nathumna shāhaira, ‘Shākhi masāphāphaalu. Kha nana Proholi ngashit kahai chi sālu.’

³⁴Kha ina nathumli kahāngna, tuingashit kasā tharan shākhi masālakalu, kazingwui ming singdala shākhi masālakalu, khikhalajila chiya Varewui pamkhavaina;

³⁵ ngaleiwui ming singdala shākhi masālakalu, khikhalajila chiya awui phei naikhavaina. Jerusalemwui mingla masingalu, khikhalajila hi kahaka Awungawui keinungna,

³⁶kala nakui singdala shākhi masāalu, kaja nana sampā akha eina tangda zikkhangasakla, charkhangasakla masārarmana.

³⁷‘Ya’ jikha jilu, ‘Ngga’ jiakha jilu; chili lāngda khamatui chi makaphāwui eina kashokna.

³⁸ “Hithada, ‘Mik akhawui vang mik akha kala ahā akhawui vang ahā akha’ da hāngkahai nathumna shāhaira.

³⁹ Kha ina nathumli kahāngna: Nali khalāng ot sākahaia chili athut makhuialu, kha namaisor yāshong kapheakha lākhavākla ngareimilu.

⁴⁰Kachikathāna nawui phahonwui vang nali kārotli khuivaakha nawui coatla minarhaolu.

⁴¹Kachikathāna nali awui ot kilometer akha phungvāmi khavai tandi saakha kilometer khani phungvāmilu.

⁴²Nali kapo mi chili milu kala nawui eina shukka kaje chili chishutlu.”

⁴³ “Hithada ‘Nawui khongnainaoli leishilu kala yangkasheli yangkharinglu’ da kapi kahai nathumna shāhaira.

⁴⁴Kha ina nathumli kahāngna, nathumwui yangkasheli leishilu kala rekakharekabingwui vang seihā sāmilu.

⁴⁵Chithākha nathum kazingramli khaleiya nathumwui Avāwui naongarā ngasāpaira; kaja ana kaphālila makaphālila zimik shokmi kala khamashungalila, makhamashungalila kazing rotāmi.

⁴⁶Nathumwui leikashemāngli nathumna leishiakha khi sāman samphangrakhala? Khājanā khalokabingnala chithada masāmalā?

⁴⁷Nathumna nachi nāngarāmāngli ngahānngaiakha kateibingli nathumna mataimeida kasā khi leikhala? Vareli makatheibingnala chithada masāmalā?

⁴⁸ Chiwui vang eina kazingli khaleia nathumwui Avāna kākashung chithada nathumla kāshungphalungra.”