Read Tangkhul Naga MATTHEW 9 Bible Online

MATTHEW 9 - Tangkhul Naga bible

MATTHEW 9

¹ Jishuna marikhong akhali kātonglaga ngayi chiwui lākhavāk kānkāda awui keinungli unguwa.

² Yanglu, athumna awuili sheikasha̱ mi akha pet eina phonda ngazonrai. Jishuna athumwui shitkasang chi theilaga sheikasha̱pā chili hānga, “Pingmeilu, inaomayara! Nawui morei pheomihaira.”

³Kala yanglu, ain kathembing kaikhana athum khalatta hāngngaroka, “Mipā hi kachipat tui matuida lei.”

⁴Chieina Jishuna athumwui kaphaning chi theida hānga, “Nathumwui wuklungli khisāda makaphā ning phaningphāphākhala?

⁵‘Nawui morei pheomihaira’ da kahāng phāmeikā, ‘Ngakarthuida zatulu’ da kahāng phāmeirakhala?

⁶Kha hi okathuili miwui Naomayarana morei pheomikashap pangshap leiya da nathumna theikhui khavaina.” Chiwui thili ana sheikasha̱ chili hānga, “Ngakarthuilu, nawui pet ngava̱khuida shimli ungulu.”

⁷Chieina ana ngakarthuida shimli unghaowa.

⁸Yaruina chi kathei tharan athum ngacheehaowa kala mikumoli hikathā sāshap-pangshap khame Vareli athumna masochikata.

⁹ Jishuna apam chiwui eina zathaowa kala shongfali zatmamānda leilakha khāshinā khaloka, Matthew kahopā chi khāshinā khuikhavaipamli pamkasā chi thei. Jishuna ali, “Ithi shurlu” da hānga. Chieina Matthewna ngakarthuida athi shurthuwa.

¹⁰Jishuna Matthewwui shimli phazāda leilakha khāshinā khalokabing kala morei kaphungbing kachungkha rāda Jishu eina awui sākhangatha̱bingli ngasoda phazāruma.

¹¹Phariseebingna hi kathei eina awui sākhangatha̱bingli hānga, “Khiwui vang nathumwui ojāna khāshinā khalokabing eina morei kaphungabingli phazārumkhala?”

¹²Kha Jishuna athumwui kahāng chi shālaga ngahānkai, “Makakazābingna khanong darkar masamana, kha kakazābingna kasana.

¹³ Vālu laga ‘Ina kachigat maningchāngmana kha lukhamashan ningkachāngna’ da kahāngwui kakhalat khikhala kaji angahānkhuilu. Kaja ina khamashung khangarongbingli hokhui khavai kharā maningmana kha morei kaphungbingli hokhui khavai kharāna.”

¹⁴ Chiwui thili Johnwui sākhangatha̱bingna Jishuli rāhānga, “Khiwui vang eina ithum eina Phariseebingna khumlaga nawui sākhangatha̱bing makhumthukhala?”

¹⁵Chieina Jishuna athumli hānga, “Shakazā mayarana athumli ngasopamda leilakha shakzātli kharā mibingli chikhumpairalā? Shakazā mayara chili athumwui eina khuikathui atam rārāsara: chithang athum khumnaora.

¹⁶“Khipānakha kachama kachonli chonshi kadhar matāksangngayaomana, kaja tākkasang chi kachon chiwui eina kākshokhaoda zakshimeikhār kākhaowa.

¹⁷Chi tākam eina khipānakha kadhara drakhāra̱ chi kachama drakhā sāhuishonli mathaisangmana; thaisangakha sāhuishon chi ngawokhaida atheira̱ chi heitha̱serhaowa kala shonla shimānhaowa. Kha kadhara drakhāra̱ chi kadhara sāhuishonli thaikasang khangachāna, chithākha khanini mashimānmana.”

¹⁸ Jishuna athumli tamchithei mahunglakha, yanglu, khamunga akhavā akhana awui mangāli rākhuktizangda hānga, “Inao ngalāva̱ thichamhaira; rāda napāng awuitungli parza̱milu, chithākha a ringluihaora.”

¹⁹Chieina Jishuna ngakarthuida awui sākhangatha̱bingli ngasoda athi shurvai.

²⁰ Kala yanglu, zingkum tharāda khani ashee ngaya̱ kahai sha̱nao akhana awui khanukshong rāda awui kachonmareili sāza̱ya,

²¹kaja sha̱naopāva̱ a khalattana hithada chukmaja̱ya, “Ina awui sārili sākaza̱mangnala iwui kazat hi raihaora.”

²² Jishuna ngareiungda sha̱naopāva̱ chili thei kala hānga, “Pingmeilu inao ngalāva̱ nawui shitkasangna nali raingasakhaira.” Chieina sha̱naopāva̱ chi chichangli raihaowa.

²³Chiwui thili Jishuna khamunga akhavāwui shimli vai. Ana kathilaa sāda khaleibing, sipa kakhongbing kala yarui ngaunkakharop kathei eina,

²⁴“Mi kachiva̱ ayarli shokhaolu! Kateoa ngalāva̱ hi thikahai maningmana, kha pida khaleina” da hānga. Chieina athumna ali mana̱shiya.

²⁵Kha yaruili ayar shokngasakhaikhaleoda ana shimlungli zangda apāngli singkhui kala ngalāva̱ chi ngakarthuiya.

²⁶Pao hi ngalei chiwui apam hupta ngayaovai.

²⁷ Jishuna apam chiwui eina thuihaowa kala mik khangapeo mi khanina ali shurrāda panglāk eina “Davidwui Naomayara, inili khalumashanmilu” da vaouwa.

²⁸Jishuna shimlungli zangkahai tharan khangapeo khani chi awuili rai, kala Jishuna anili ngahāna, “Ina nanili raimishapra da nani shitsanglā?” “Mha, amei!” da anina ngahānkai.

²⁹Chieina ana aniwui mikli sāza̱da hānga, “Naniwui shitkasang athishurda shokranu.”

³⁰Kala anina kathei samphanga, Jishuna anili saklak eina “Khipālikha mathei ngasaklu” da ningmi.

³¹Kha anina chiwui eina zatthuihailaga awui maramli ngalei chiwui apam hupta ngayaovā ngasaka.

³² Athum zatphokukida ngarānmahunglakha, yanglu, kameo kazanga khak khangasha̱ akha awuili khuirai.

³³Kameo kashamshokmikhaleoda khak khangasha̱pā chi matuipaihaowa kala yarui saikora matakhakhaoda “Israelli hikathā hi matheilakranga” da hāngngaroka.

³⁴Kha Phariseebingna hānga, “Kameobingwui akhavā chiwui pangshap eina ana kameo kashamshokashapna.”

³⁵ Jishuna keinung kala kha̱ kachivali vāda athumwui synagogueli tamchithei kala wungramwui paokaphā hāshoka kala kazātyur kala kazāt kachiva̱ raimi.

³⁶Ana yarui ashangva̱li kathei tharan athumli lumashanlakhaowa, khiwui vangkhala kaja athum chi yaokahoma makhalei yaonaobing thada athumli singkharenglaga ngachonkhamela maleithuwa.

³⁷ Chiwui thili ana awui sākhangatha̱bingli hānga, “Hatkhavai mā kachungkha lei, kha kahāta mi machungmana.

³⁸Chiwui vang eina kahātwui akhavā Proholi kahāta mi chungmeida shirāt khavai seihā sālu.”