Read Tangkhul Naga MARK 1 Bible Online

MARK 1 - Tangkhul Naga bible

MARK 1

¹Varewui Naomayara Jishu Khristawui paokaphā haokaphok.

² Marān Isaiahwui lairikli hithada kapihai: “Yanglu, nawui shongfa sākhavai, nali rida iwui paophungme chihora.

³ Kachikathāna lamhāngli vaozatta lei: Prohowui shongfa ngarānlu; awui apong ngatar ngasaklu.”

⁴ Chieina Ra̱hikme Johnna lamhāngli vai kala ningngateida morei pheomi khavaiwui pao hāshokta ra̱hikmi.

⁵Judea ngaleili kala Jerusalem keinungli khalei mi kachungkha rāda athumwui morei hangphata. Chieina athumli Jordan kongli ra̱hikmi.

⁶Johnna ut-hah eina kasā kachon ngavai, sāhui eina shanneira̱ sai kala khaoh eina khuira̱ awui kashakazāna.

⁷Ana hithada hashoka, “Ili hakkhameiya mi akha iwui thili rāra, ina hamzangda awui pheihop khara̱ khalāmi khavai I matik machāmana.

⁸Ina nathumli tara̱ eina ra̱hikmi, ana nathumli Manglā Kathara eina ra̱hikmira.”

⁹ Atam masāngleila Jishuna Galileeli khalei Nazarethwui eina rai kala Johnna ali Jordan kongli ra̱hikmi.

¹⁰Ana tara̱wui eina kashok tharan hengsāda kazingram shokahai kala Manglāna nāsha̱ thada awuitungli tākapa̱ thei,

¹¹ kala kazingramwui eina akhon akha vaorai, “Na iwui khaluma Naomayarana, Ina nali ningyāng unglaka.”

¹² Hengsāda Manglāna ali lamhāngli vāngasakhaowa.

¹³Ana chili zimiksho hangmatithang pamda Satanna ali sui. Ana ramsāli ngasopama kala kazingraobingna ali otram ngatha̱mi.

¹⁴ Johnli tukthui kahaiwui thili Jishuna Galileeli vāda Varewui Paokaphā hashokta hānga,

¹⁵“Retkahai atam chi rāhaira, kala Varewui wungram nganaishunhaira. Ningngateilu kala paokaphā chili shitsanglu.”

¹⁶ Galilee ngayipheili Jishuna zatlakha Simon eina agato Andrew ngayilungli khaihlan horkazat thei, kaja ani khaih kaphā mina.

¹⁷Jishuna anili, “Ithi shurlu, nanili ina mi kaphā sāngasakra” da hānga.

¹⁸Chieina anina ngalāngda khaihlan hortahaiphungda athi shurthuwa.

¹⁹Khavāmeinakta Zabedeewui naomayara James eina John marikhong lungli khaihlan khopkasā thei.

²⁰Chieina ana hengsāda anili kaho eina avāva̱ Zebedee eina langphatbingli marikhongli nothāhailaga awui thi shurthuwa.

²¹ Athumna Capernaumli vai kala Sabbaththang Jishuna synagogueli vāda tamchithei.

²²Awui tamkachithei shālaga athum matakhakhai, kaja ain kathembing thada matamchitheila, sāshap pangshap akhavā akha thada tamchithei.

²³ Atam chichangli makathar manglā kazanga mi akha synagogueli leisai.

²⁴ Ana “Nazarethwui Jishu, nana ithumli khi sāki kajikhala? Ithumli shimān ngasak khavai kharāla? Na khipākhala da ina thei, na Varewui tharkhamathengana” da vaowa.

²⁵Jishuna ali khararda hānga, “Kasainakha pamlu, kala awui eina shokhaolu.”

²⁶Chieina raih china mipā chili nganurkazamlaga panglāk eina vaoda yāmshokhaowa.

²⁷Mibing chi matakhakhaida akha eina akha ngazek ngaroka. “Hi khikhala? Kadhara tamkachithei tuila? Sashap pangshap eina ngasoda makathar manglālila kasoli kala athumnala awui kahāng nganāli!”

²⁸Chieina awui sākashap chānpao chi Galileeli khalei apam kachiva̱li ngalāngda ngayaohaowa.

²⁹ Chiwui thili ana James eina Johnli ngasoda Synagoguewui eina shoklaga Simon eina Andrewwui shimli vai.

³⁰Chitharan Simonwui aniva̱ kharurda pisai kala hengsāda athumna awui pongli Jishuli hānga.

³¹Chieina ana apāng rāsingkhuida akhāngmathota; chieina awui kakharur phāhaoda athumli ana otram ngatha̱mi.

³² Chithang ngazin zingtunlam mibingna kakazānaobing eina kameo kazangbing Jishuwuili khuirai.

³³Kala keinung chiwui mi kachungkha kayāngli rākazipa.

³⁴Kazātyur khangatatei kakazā mi kachungkhali raimi, kala raih kachungkha kashamshokmi; kala ana raihbingli mamatui ngasakmana, kachiwui vangkhala kaja athumna a khipākhala da thei.

³⁵ Akhama kathā ngathorthakva̱, kazing mahorranglakha ana ngakarthuida ngachakyāng kahai apam akhali seihā asāpama.

³⁶Simon eina awui ngasotnaobingna ali shurvai,

³⁷kala aphākhuida hānga, “Mi saikorana nali phāda lei.”

³⁸Kha Jishuna athumli ngahānkai, “Ithum ruinganai keinungbingli vāusa, chili paokaphā hāshok khavai lei, khikhalajila I chiwui vang kharāna.”

³⁹ Ana Galileewui apam saikorali yaovai kala synagogueli pao hāshokta raihla kashamshokmi.

⁴⁰ Phārrei kakazā akha Jishuwuili rai kala khuktizanglaga, “Nana phaningmiakha ili tharngasakshapra” da ngachonmi khavai poi.

⁴¹Jishuna lumashanhaida apāng katingvai kala saza̱da, “Ina phaningmilakra, tharchaohaolu.” da hānga.

⁴²Chi kahāng eina khangaphār chi phāhaowa kala tharchaohaowa.

⁴³ Jishuna ali, “Hi khipālikha mahāngalu, kha pāngmonli vāda chitheilu kala Mosesna kaso kahai thada nali tharmihaira kaji mibingna machutkhui khavai achigatlu” da saklak eina ningmi kala heng sāda shiunhaowa.

⁴⁵Kha mipā hina a kazazatli phongshar eina hāngkazatwui vang pao chi ngayaovāserhaowa. Chiwui vang Jishuna keinungli phongshar eina mazangpaithuda mi makapāna apamli apamhaowa. Chithālala apam kachiva̱wui eina ali phārai.