Read Tangkhul Naga MARK 11 Bible Online

MARK 11 - Tangkhul Naga bible

MARK 11

¹ Athumna Jerusalem vāshungnanai Bethphage eina Bethanywui ngalemli khalei Olive kaphungli vākashung eina Jishuna awui sākhangatha̱ khanili rida chihovai,

²kala anili hānga, “Mangāshong khalei kha̱ chili vālu kala chili vazangkhaleoda mina matonglakrang kaji gadhānao akha hokhaisara. Chi akhalākhuilaga khuiunglu.

³Kachikathā mina ‘Khi kasakhala’ da ngahānakha ‘Prohona savai khavai leili, kala thaklāk eina chihoungra’ da hānglu.”

⁴ Chieina anina vai kala chānreipheichangli gadhānao akha khamongli hokhaisai. Anina chi khalāmahunglakha,

⁵chili nganingkasābingna “Khisāda gadhānao chi kakhalākhala?” da ngahāna.

⁶Chieina anina Jishuna hāngkhami tākam eina ngahānkai, kala anili zatngasakhaowa.

⁷ Anina gadhānao chi Jishuli khuiungmi, kala athumna athumwui kachon gadhā chiwuitungli hammida Jishuna kātonga.

⁸Mi kachungkhana shongfali athumwui kachon hammi; kaikhana khararwui eina timfa kahai thingphāng reokhuilaga hammi.

⁹ Mangāshong kazatbingla kala khanukshong kazatbingla “Hosanna! Proho mingli kharā a chili ka̱lā mahaimeiranu!”

¹⁰“Rakharā ishava Davidwui wungram ka̱lā mahaimeiranu! Juikhamataiali hosanna” da panglāk eina vaowa.

¹¹ Jishuna Jerusalemli vāda khorumshimli azanga, kala ana kuimareida ot saikora yangkup kahai tharan kazing yinghaoda tharāda khani chili ngasokhuilaga Bethanyli vāhaowa.

¹² Akhama kathā athum Bethanywui eina kharā tharan Jishu thaihaowa.

¹³Khalāda khaorārong anah phungyir eina theida athei matheilapai da ayanga. Ana chili khavā eina anah maningla khikhala masamphangthuwa, kaja athei khamathei atam maningsāmana.

¹⁴Chieina ana hānga, “Nawui eina athei mi khipānakha mashailakranu!” Chi awui sākhangatha̱bingna shai.

¹⁵ Athumna Jerusalemli rākashung eina Jishuna khorumshimli zangda ot yorkasābing eina lokasābingli kashamphokhaowa kala lupā kaikhamebingwui table kala khana̱ khayorbingwui pamkhong saikora horkathānmiserhaowa;

¹⁶kala ana mi khipālikha khorumshimwui kayāng kānzangda otnao akhala makhuizang ngasakmana.

¹⁷ Chiwui thili mibingli ana tamchithei: “Hithada makapihaimala, ‘Iwui shim hi yur saikorawui seihā sākhavai shim hora’ kha nathumna khalebingwui shim sāngasakhaira.”

¹⁸Pāngmon akhokabing eina ain kathemabingna chi shālaga ali shaothat khavai apong phai; kala mi kachungkha china awui tamkachithei matakhak kahaiwui vang athumla ali ngacheehaowa.

¹⁹ Kazing khaying eina Jishu kala awui sākhangatha̱bing keinung chiwui eina thuihaowa.

²⁰ Akhama kathā ngathorshong athumna kānkhavā tharan khaorārong chi angayung tāshungda ngahuihairasai.

²¹Peterna phaningungda Jishuli hānga, “Ojā, yanglu! nana khonshi kahai khaorārong chi thengchenghaira.”

²²Chieina Jishuna athumli ngahānkai, “Vareli shitsanglu.

²³Kachangkhat eina ina nathumli kahāngna, kachikathāna phungrei hili ‘Phurkhuilaga shamadruli ahorsanghaolu’ da ning khamaong maleilakla kha ana kahāng chi ungshungra da shitsangakha, makahatlakla ungshungra.

²⁴ Chiwui vang eina ina nathumli kahāngna seihā kasāli nathumna kapopo chi samphanghaira da shitsanglu, kala chi nathumwui ngasāra.

²⁵ Kala nathumna nganingda seihā kasā tharan, nana makhamayā mi leisaakha pheomihaifalu; chithākha kazingramli khalei nathumwui Avānala nawui khayon pheomira.

²⁶(Kha nathumna mapheomiakha kazingramli khalei nathumwui Avānala nathumwui khayon mapheomimara.”)

²⁷ Athumna Jerusalemli rāluishita. Jishuna khorumshimli zatta leilakha pāngmon akhokabing, ain kathembing kala ararbingna ali rangahāna,

²⁸“Nana otbing hi khipāwui pangshap eina kasakhala lah khipāna hi sākhavai pangshap mikhala?”

²⁹Jishuna ngahānkai, “Nathumli ina khangahān akha sāra; chi ili ngahānkāmilu, kala ina hi khiwui pangshap eina kasakhala da hāngmira.

³⁰Johnwui ra̱kahik hi kazingramwui einaka mikumowui einakhala? Ngahankāmilu.”

³¹Athum akha eina akha ngayat ngaroka, “Ithumna ‘kazingramwui einana’ da hāngakha ‘Khisāda ali mashitsangthu’ jira,

³²‘Mikumowui einana’ jisa, athum mibing chili ngacheehaowa kaja mi saikorana John hi kachangkhat marānna da khui.

³³Chieina athumna Jishuli ‘Ithum matheimana’” da ngahānkai. Jishuna athumli hānga, “Chithākha hibing hi khiwui pangshap eina kasākhala da inala mahāngmara.”