Read Tangkhul Naga MARK 12 Bible Online

MARK 12 - Tangkhul Naga bible

MARK 12

¹ Jishuna athumli chānjam eina hāngchitheiphoka. “Mi akhana drakhā yāmgui akha sālaga kuimareida hokhaithing eina ngaveiya, atheira̱ sangkhavai akhurla chuihai kala tārongla semhai, chiwui thili yāmgui chi mili masā ngasaklaga a kha̱ram vāhaowa.

²Atam ungkashung tharan khamasābingwui eina amasātman athei akhui khavai rao akha chihovai.

³Athumna ali tukkhuilaga shaoshaomihailaga khamasai eina shiunhaowa.

⁴Ana khangatei rao akhali chihovaluishita, kala athumna alila akuili khamā za̱mida khayaklak eina samilaga shiunhaowa.

⁵Akhavā china rao khangatei akha chiholui, kha athumna ali shaothathaowa; chithada sāda khangatei kachungkhali chihovālaga kaikhali shaomi, kaikhali shaothathaowa.

⁶Khangatei akha leisafaya, chi awui khaluma naomayarana; naomeikapta, ana ‘Inaomayarali athumna khayāshira’ da phaninglaga ali chihovai.

⁷Kha khamasābing chi akha eina akha ngazek ngarokta hānga, ‘Shimluikatpa chi hina, ali shaothathaosa, chithākha awui shimlui ithumwui sahaora!’

⁸Chieina athumna ali tukkhuilaga shaothathaowa kala yāmguiwui ayarli horshokhaowa.

⁹Drakhā yāmguiwui akhavā china khi sangayikhala? Ana unglaga khamasābing chili shaothatserhaora kala yāmgui chi kateibingli mihaora.

¹⁰ Kathara tui hi nathum mapārangla: ‘Shim kasābingna horkahai ngalung chi achithekwui khamakhoka ngasāhaira.

¹¹Hi Prohowui otsakna, kala hi ithumwui mikyanli matakhakhai’?”

¹² Athumna ali tukkhui khavai ngarāna, kha yaruili ngacheehaowa, kaja chānjam chi ana athumli rinlaga kahāngna da athumna machuka; chieina athumna ali horhailaga zatthuihaowa.

¹³ Athumna Jishuwui tuimatui eina khayon tukkhui khavai Pharisee eina Herodwui mi kaikha chihovai.

¹⁴Athumna ali rangahāna, “Ojā, na khamashunga kala mimai makhayanga mina da thei, kaja nava miwui shingamli mayangmana, kha mikumowui vang Varewui kaphaningwui mashun chi tamchithei. Caesarli khāshina khami hi ainka, maningmakhala?”

¹⁵Miraka, mamimara? Kha athumwui phakharek chi theida, ana athumli hānga, “Ili khisāda chāng yangkhala? Lupāsā akha khuirālu, ina yangga.”

¹⁶Chieina athumna lupāsā akha khuivāmi kala ana ngahānna, “Hi khipāwui azak kala khipāwui aming kapihailikhala?” Athumna “Caesarwuina” da ngahānkai.

¹⁷ Chieina Jishuna hānga, “Caesarwui chi Caesarli milu; kala Varewui chi Vareli milu.” Athumna awui tui chi shālaga matakhakhaowa.

¹⁸ Ringkhalui maleimana da kahānga Sadduceebingna Jishuli hithada rangahāna,

¹⁹ “Ojā, mi akhana ra̱sa̱ phālaga anao mapharāla apreiva̱ horhaida thihaiakha agato china preiva̱ chili ngakumphalungra kala amawui vang nao pharākhuiphalungra da Mosesna ithumwui vang kapimihai.

²⁰Chinaongarā shini leisai; kharara china ngalā phai, kala nao maleila thihaowa;

²¹kakhane china preiva̱ chili ngakuma, kala nao maleila thihaowa, kakathuma chila chithāhaowa;

²²chithada sāda shini china ngakumlaga nao maleilakla thihaowa. Naomeikapta preiva̱ chila thihaowa.

²³Ringkhalui atamli a khipāwui preiva̱ sara̱khala? Kaja shini china ali ngakumsera.”

²⁴Jishuna athumli ngahānkai, “Chiwui vang eina nathum khangui maningmala, kaja nathum katharatuila kala Varewui pangshapla matheimana?

²⁵Kaja athumna kathiwui eina ringkhalui tharan athum ngalāla makhuimara, fakathuila mafathuimara kha kazingramli khalei kazingrao thāserhaora.

²⁶ Kathebingli ringlui khangasak pongli jiakha, thing khangapom chuida Varena Mosesli, ‘I Abrahamwui, Isaacwui kala Jacobwui Varena’ da kahāng Moseswui lairikli nathum mapākhuimala?

²⁷A kathewui Vare maningmana, kha kharingawui Varena; nathum nguichaohaira.”

²⁸ Athum akha eina akha ngaphat khangarok tharan Jishuna mathālak eina ngahānkākhami chi theilaga ain kathema akhana ali ngahāna, “Ningkhami saikorawui alungli mataimeikap kaji chi khikhala?”

²⁹ Jishuna ngahānkai, “Khare chiva, ‘Nganālu, O Israel: ithumwui Vare Proho, Proho chi akhamānga;

³⁰kala Proho nawui Vareli nawuklung, namanglā, naning kala nayāng tongtingda leishiphalungra.’

³¹ Kakhane chi hina, ‘Nawui khongnainaobingli nana na khalattali leikashi thada leishira.’ Khani hili hakkhamei khangatei ningkhami maleiluimana.”

³²Chieina ain kathema china hānga, “Mashunglaka, Ojā; nana mashungrik eina amānga da hānghaira, kala khangatei maleiluimana kha amānga;

³³ kala ali wuklung, theishingkakhui, kala yāng tongtingda leikashi kala khongnainaobingli khalattali leikashi thada leikashi hina rikkatā kachigat kala pha̱kaphayāli mataimeikhara.”

³⁴Ana themlāk eina ngahānkaka chi Jishuna kathei eina ali hānga, “Na Varewui wungramwui eina matāmana.” Chiwui thili khipānakha ali khangahān masālengthuwa.

³⁵ Jishuna khorumshimli tamchitheimamānda leilakha ana hānga, “Ain kathembingna kathada Khrista hi Davidwui naomayarana da hāngshapkhala?

³⁶ Manglā Katharana kasatmida David khalattana hithada hānga; ‘Prohona iwui Proholi hānga, nawui yangkashebingli nawui pheinai masā ngasakranglakha eina tangda, iwui yāshong pamlu.’

³⁷Ali David khalattanala Proho hoi; hithaakha Khrista hi kathada Davidwui naomayarana jipaira?” Kala yarui ashangva china ringphalak eina nganakhui.

³⁸ Kala ana awui tamkachitheili hānga, “Phahon katuma ngavailaga yaothuizatkhangaiya kala leihngapha̱lungli khayāshilak eina shālam sangasakkhangaibing,

³⁹Synagogueli mathāmeikap kaji pam ningkachāngbing, zātkhān kasāli khayākakā pam kaphābing,

⁴⁰ra̱meinaobingwui lan sashimānkhamebing kala seihā kasāngsāng kasābing, sakakhaninga ain kathembing chili ning ngasharlu. Athum sakkhamei khonshāt samphangra.”

⁴¹ Kala rākachigat lupā sangkhavai oko chili Jishuna kāroda pamlaga mi kachungkhana lupā rākasang chi yangpama. Kashāngnaobing kachungkhana lupā kachuchung rāsanga.

⁴²Kala kachāma ra̱meiva akha rai, ana penny akhawui chāng pheisā khani rāsanga.

⁴³Kala Jishuna awui sākhangatha̱bingli hokhuida hānga, “Kachangkhat eina ina nathumli kahāngna, rākachigat mi saikorawui ngachaili ra̱meiva̱ hina chungmeikapta rāchigata.

⁴⁴Kaja athum saikorana athumwui kachungkha khaleiwui eina kachigatna; kha ra̱meiva̱ chiya awui makhaleitungli awui ringkhavai khalei saikora chi mihaira.”