Read Tangkhul Naga MARK 13 Bible Online

MARK 13 - Tangkhul Naga bible

MARK 13

¹ Jishuna khorumshimwui eina kashok tharan sākhangatha̱ akhana ali, “Yanglu, Ojā, kayākha matakhak kahai ngalung kala khorumshimkhala!” da hānga.

² Kala Jishuna ali hānga, “Shim kahahakbing chi na theida leila? Maja̱tāla ngalung akhawuitungli ngalung akha ngarorda maleisaluimara.”

³ Khorumshimli kāroda khalei Olive kaphungli Jishuna pamda leilakha Peter, James, John kala Andrew athumna ngathumsāda ngahānna,

⁴ “Hi katharan shokra kala ot saikora hi ungshungura kajiwui khudam chi kathara, ithumli kahāngmilu.”

⁵Chieina Jishuna athumli hānga, “Ngasharlu, kala nathumli mi khipānakha mathanngui ngasakhaialu.

⁶ Mi kachungkhana iwui ming singda rālaga ‘I ana’ da hāngra, kala athumna mi kachungkhali thannguira.

⁷Kala nathumna katā khanaiwui raipao kashā tharan, malung matātunghaialu; hi shokphalungra, kha china khangachanga atam maningmana.

⁸Kaja yur akhana yur akhawuitungli, wungram akhana wungram akhawuitungli rai sāra; apam kachungkhali neina̱ khanukra, chāmrei rāra, kha hi nao ra̱kaphokna.

⁹ “Kha nathum khalatta ning ngasharlu, kaja nathumli athumna kārotli khuikara; nathumli synagogueli kashaola shaora; kala iwui vang nathum khamungbing eina awungabingwui mangāli shākhi mikhavai kānganingra.

¹⁰Yur saikorali paokaphā hi rida hāshokphalungra.

¹¹ Nathumli bichar sākhavai athumna khuikhavā kala mikasang tharan nathumna khi hāngra da rida makhanangalu; kha atam chichangli khami chi hānglu, kaja nana khamatui maningmana kha Manglā Katharana khamatuina.

¹²Achinā ngarāna achināngarāli, avāva̱ ngarana naongarāli, naongarāna ava̱ avāli thikhavai sāra;

¹³ iwui mingwui vang mi saikorana nathumli yangkharingra. Kha khanao eina tangda kakhānga chili huimira.

¹⁴ “Kha masaimi kahai ningkakachai ot china maleikharān apamli khalei nathumna kathei tharan(pākakhuibingna bhap tākhuiranu) Judeali khaleibingna phungreili yāmkāranu;

¹⁵Shimtungli leikasāpana mataluiaranu, kala awui shimlungli zangda thongthāng mazangkhuiluiaranu;

¹⁶Luili leikasapa china kachon maungkhuiluiaranu.

¹⁷ Iyavo, atam chili nao vaikasābing kala na̱ shimanda leikasābingwui ka̱lāshāt!

¹⁸Sikachāng atamli mashok khavai seihā sālu.

¹⁹Kaja chitharan atamli Varena okathui kasāwui eina thuilaga aja rāshungda mashoklakrang kaji kala mashokluilaki kaji kakhanang kachot shokra.

²⁰Kala zimiksho chi Prohona masha̱sang ngasakakha mi khipālikha mahuikhuimara; kha kapangkhui kahai athumwui vang eina ana atam chi sha̱sang ngasakhaira.

²¹Chiwui thili kachikathāna nali, ‘Yanglu, Khrista hili lei,’ lah ‘Yanglu, a chili lei!’ — da hānglala mashitsangalu.

²² Minama Khrista kala minama marānbing shokra kala shapakha Varena kapangkhui kahaibingli thanngui khavai khudamla kala matakhak kahai kachungkhala athumna chitheira.

²³Kha ngasharlu; ina nathumli sānngarānda ot saikora hāngchitheihaira.

²⁴“Kha chitharan, kachotkachāng chiwui thili zimikla tangmanghaora, kachāngla mahorluimara,

²⁵sirābingla kazingramwui eina tātungra kala atungshongwui pangshapbingla nganukhaora.

²⁶ Chiwui thili miwui Naomayarana hakkhamahā pangshap kala tekhamatei eina ngasoda muiyālungli kharā nathumna theira.

²⁷Ana kazingraobingli achikun matili chihovāda awui kapangkhui kahaibingli okathuiwui akatang eina thuilaga kazingram akatang eina tangda kazipkhui ngasakra.

²⁸“Khaorarongwui eina tamkhuilu; aphāngli shondhar shokta thingnah matekchim kahai eina yāngyir kachāng raura da nathumna thei.

²⁹Chi tākam eina nathumna hi shokura da kathei tharan a kharā nganaihaira, khamongpheili rāshunghaira da theira.

³⁰ Kachangkhat eina ina nathumli kahāngna, ot saikora hi mashokranglakha thot hi makānthuimara.

³¹ Kazingram kala okathuila shimānhaora, kha iwui tui mashimānlakmara.

³² “Kha zimiksho eina pung chi khipānakha matheimana, kazingramli khalei kazingraobing eina tangdala, Naomayarala matheimana. Kha Avāva̱māngna thei.

³³ Ningngasharda rimpamlu; kaja otshot chi katharan rānikhala da nathumna matheimana.

³⁴ Hiya mi akhana shimwui eina zatkaphok tharan awui raobingli shim chi mayon khavai horsangmihailaga kala mi ava̱va̱li kachichāwui otphun mihailaga kala khamong khamayonali mayonkazakzaklu da kasohailaga kharam vākahai kathāna.

³⁵ Chiwui vang eina mayonkhariklu, kala shimva̱ china ngazinnika, ngayasailunglinikā, harvā kakhonglinika, ngathorshongnika, katharan ungnikhala kaji nathumna matheimana.

³⁶Ana kashuirak hankhaung tharan nathum pisāpaishina.

³⁷Ina nathumli kahāng hi mi kachiva̱li kahāngna: Rimpamlu!”