Read Tangkhul Naga MARK 14 Bible Online

MARK 14 - Tangkhul Naga bible

MARK 14

¹ Atam chi Khawok-makazanga Khamui eina Makānkhami Phanit sākida zimiksho khanithang vatsai. Pāngmon akhokabing eina ain kathemabingna Jishuli ngathum sāda tukkhui khavai kala shaothat khavai khangarān sāda leisai;

²kaja athumna hānga, “Phanitlungli masāpaimara, mibing ngama̱-ngashaopaishina.”

³ Jishuna Bethanyli phārrei kakazā Simonwui shimli phazāda leilakha, sha̱nao akhana aman kasaka nard thao kachara ngalunghamnao akhali sangda khuirai kala hamnao chi ana sākhailaga thao chi Jishuwui akuili heirorra.

⁴Kha chili leikasā athum kaikhana malungvātlak eina hānga, “Khisāda aremali thao hi shimān khangasakkhala?

⁵Kaja hi lupā shākathum lang eina yorkhuilaga kachamabingli mihaipai.” Chieina athumna ali khararra.

⁶Kha Jishuna hānga, “Ali aningkhānranu. Khisāda ali sheikhautkhala? Ana ili khamathā ot sāmihaira.

⁷ Kaja kachāmbingva nathumli ngasopamchingra kala nathumna samikhangai tharan athumli kaphā samipai; kha iva nathumli mangasopamluimara.

⁸ Ana samikashap chi sāhaira; chifa khavai ana sānngarānda iwui phasā thao neomi kahaina.

⁹Kachangkhat eina ina nathumli kahāngna, ali phaningkhaung sāda ana sāmi kahai chi paokaphā hākashokpam kachida hāngmira.”

¹⁰ Chiwui thili tharāda khaniwui ngachaili Judas Iscariotna Jishuli yansai khavai pāngmon akhokabingli vai.

¹¹Athumna chi kashā eina ringphālakhaowa kala lupā mira da khangashit sai. Chieina Judasna Jishuli yansai khavai atam kachā yangphokuwa.

¹² Khawok-makazang khamui Phanitwui kharethang, makānkhamiwui yaonao taikathat tharan awui sākhangatha̱bingna ali ngahāna, “Makānkhamiwui phāzat zakhavai ithumli kali khangarān sālu jikhala?”

¹³Chieina Jishuna awui sākhangatha̱ khanili chihoda hānga, “Keinungli vālu, mi akha tara̱ham phunglaga nanili ngarokra; ali shurvālu,

¹⁴kala ana akakā shimva̱ chili, ‘Ojāna kahāng awui sākhangatha̱bingli ngasoda makānkhami phazat zārumki kaji kā kali leikhala’ da angahānlu.

¹⁵Chieina ana mathāng atoli kā kahaka ngarankhariklaga haikasā chitheira. Chili nanina angarānlu.”

¹⁶Chieina sākhangatha̱ khani china zatphokta keinung chili vai kala anili hāngmi kahai tākam eina samphanga; kala anina makānkhamiwui phazat chi angarāna.

¹⁷ Kala kazing khaying eina Jishuna awui sākhangatha̱ tharāda khani chili ngasoda rai.

¹⁸Athumna tableli phazāmahunglakha Jishuna hānga, “Kachangkhat eina ina nathumli kahāngna, phazārumda khalei nathumwui ngachaili mi akhana ili yansaira.”

¹⁹Sakhangatha̱bing chi wukhananghaoda athum kachiva̱na “Chi ila” da ngahāna.

²⁰Ana athumli hānga, “Tharāda khaniwui ngachaili khongphei akhali ili khamui rurshairumda khalei mipa china.

²¹Kaja kathara lairikli kapi kahai thada miwui Naomayara chi thira; kha miwui Naomayarali yankasaia a chiwui kalāshāt! Awui vanga marāpharākasāna phāmei.”

²² Athum phazāmahungda leilakha Jishuna khamui khuisingda ningkashiwui seihā sakuphailaga khamui serkhaida athumli mida hānga, “Shailu, hi iwui asāna.”

²³ Kala ana tengkot khuida Vareli ningkashi mihailaga athumli mi, kala athum saikorana chiwui eina manga.

²⁴ Kala ana athumli hānga, “Hi kachungkhawui vang heishokmi kahai iwui tuingashitwui asheena.

²⁵Kachangkhat ina nathumli kahāngna, Vare wungramli kadhara drakhāra̱ mangki kaji zimiksho chi marāranglakha eina tangda ina drakhāra̱ hi mamangluimara.”

²⁶ Athumna laa akha sāchang kahaiwui thili Olive phungreishong vāhaowa.

²⁷ Kala Jishuna athumli hānga, “Nathum yāmserhaora; kaja hithada kapihaida lei: ‘Varena yaokahomali sāthathaora kala yaobing chaiyānghaora.’

²⁸ Kha I ringshok kahaiwui thili nathumli ina Galileeli rida vāra.”

²⁹Peterna ngahānkai, “Athum yāmserhailala I mayāmmara!”

³⁰ Chieina Jishuna Peterli hānga, “Kachangkhat eina ina kahāngna, arui ngayā harvāna khanishida makhongranglakha nana ili matheimana da kathumshida hatra.”

³¹Kha Peterna pinglak eina, “Nali ngasoda shaothatrumra jilala ina nali mahatlakmara” da ngahānkai. Khangatei sākhangatha̱bing saikoranala chithada hāngsera.

³² Chiwui thili Gethsemane kaho apam akhali athumna vai kala Jishuna, “Ina seihā salakha nathum hili pamsālu” da hānga.

³³Ana Peter, James, John athumli thankhui, kala kakhanang sikafana pemtinghaowa.

³⁴ Chieina ana athumli hānga, “I wukkakhanangna thiki jiura, hili nathum ningkharikta yangpamsalu.”

³⁵Ana khavāmeilaga ngaleili ngakhumshamzangda sapaisi kaja atam chi awui eina kānthuimihaoranu da seihā sai.

³⁶ Kala ana hānga, “Abba, Avā, nawui vanga saikora sāpaisera, tengkot hi iwui eina kakhuithuimihaolu, thālala iwui kaphaning maningmana kha nawui kaphaningna.”

³⁷Ana hankhaung tharan athum pida leisāda ana Peterli hānga, “Simon, na pihaola? Pung akhamāngla mapamrarthulā?”

³⁸ Kasuili mazang khavai nathum ningngasharda seihā sālu; manglava sāngaikachangkhata kha asāna ngazanhaowa.”

³⁹Chiwui thili valuishitlaga kharewui tākam eina seihā vāsālui.

⁴⁰Ana hankhaung tharan athum piphup eina ungtheilui; kaja athum pingaishun haowa; kala khi ngahānkāsikhala da matheithuwa.

⁴¹Ana hanung kakathumali hithada unghānga, “Aruila pichingda ngasāmda leifala? Shaphaira; morei kaphungbingwui pāngli miwui Naomayarali yorkasang atam chi rāshungura.

⁴²Ngakarthuilu, zatusa, yanglu, ili yorzaki kaje hili rāhaira.”

⁴³ Ana matui mahungda leilakha hengsāda tharāda khaniwuili zangkasa Judas kaho china pāngmon akhokabing, ain kathemabing kala ararbingna kachiho mi kachungkhali ngasoda raighai, thinghun singlaga rai.

⁴⁴Yorkazapa china ingkit akha athumli milaga hānga, “Ina amaya̱ki kaje chi a kho; ali tukkhuilu kala shantri sakazazakta thanthulu.”

⁴⁵Judasna rākhaleoda Jishuwuili vai kala “Ojā!” da hānglaga amaya̱ya.

⁴⁶Chieina athumna ali yonsa̱khuida tukkhuihaowa.

⁴⁷Kha chiwui ngalemli nganingkasā mi akhana awui raighai sutkhuilaga pāngmon kharei rao akhawui khanā yortāmihaowa.

⁴⁸Kala Jishuna athumli hānga, “Ili nathumna khaleli tukkhuiki kaji thada raighai kala thinghun singda kharāla?

⁴⁹ Thangkachida khorumshimli tamchitheida nathumli ngasopama, kha nathumna ili matukkhuimana. Kha kathara lairikli kapi kahai chi ungshungranu.”

⁵⁰Kala athum katongana ali horhailaga yāmserhaowa.

⁵¹Yaronnao akhana khamenga kachon kateonao akhamāng ngavailaga Jishuli shurvai; kala athumna ali tukkhui;

⁵²Kha ana kachon chila raitāhailaga asāmsai eina yongthuihaowa.

⁵³ Athumna Jishuli pāngmon khareiwuili khuivai, kala pāngmon akhokabing ararbing kala ain kathemabing saikora rākazipa.

⁵⁴Peterna athi shurvāda pāngmon khareiwui kayāngli lachāham eina shantribingli ngasoda meili tikpama.

⁵⁵Pāngmon akhokabing eina hangva̱nao katongana Jishuli shaothat khavai shākhi phai, kha akhala masamphangmana.

⁵⁶Mi kachungkhana kakapik shākhi awuitungli rāmi, kha athumwui shākhi khami akhala mangarummana.

⁵⁷Kaikhana nganingkada awuitungli kakapik shākhi mida hānga,

⁵⁸ “‘Miwui pāng eina sākakhui khorumshim hi sakhaihailaga ina kathumthangwui thili miwui pangna masākakhui khangatei akha sakhuira’ da ana kahāng ithumna shai.”

⁵⁹Chithālala athumwui shākhi khami akhala mangarummana.

⁶⁰Chieina pāngmon kharei china alungthungli nganingkāda Jishuli ngahāna, “Nali athumna kaphen hili khikha ngahānkā khavai maleithula?”

⁶¹Kha Jishuna khikha mangahānkāla kasainakha pamhaowa. Chieina pāngmon kharei china ali ngahānlui, “Sokhame Varewui Naomayara Khrista chi nala?”

⁶² Kala Jishuna hānga, “Ilaka, kala miwui Naomayarana Pangshapwui yāshong kapam kala muiyā tongda kharā nathum saikorana theira.”

⁶³ Kala pāngmon kharei china awui kachon serkhaida, “Hili lāngkhamei shākhi khangatei khi darkar sākhala?

⁶⁴ Nathumna awui kachipat tui shāhaira, nathumwui tuikup khikhala?” Athum saikorana ali shaothatngayiphalunga da khayon misera.

⁶⁵Kaikhana Jishuli machora̱ mashorrorphoka, amaila rommi, kashaola shaoda, “Marānlu!” da hānga. Kala shantribingna ali kapheya.

⁶⁶ Kala Peterna kayāng tākhamazeshong pamda leilakha pāngmon khareiwui raosha̱nao akha rai;

⁶⁷Peter mei tikkapam theilaga ali yangkāda “Nala Nazarethpa Jishuli ngasosai” da hānga.

⁶⁸Kha chi ana mamayāmada hānga, “I katheila matheimana, nana kahāng chila bhap matāmana.” Kala khanukvāk shokhaowa. (Chichangli harvā khonghaowa).

⁶⁹Rao sha̱nao china ali theiluishitta chiwui ngalemli khanganingbing chili, “Mipa hi athumwui mina” da hānglui.

⁷⁰Kha Peterna chi mamayaluimana. Khaleilaga chili khanganingbing china Peterli phenda hānga, “Mashoila na athumwui ngachaili akhana, kaja na Galileenaona.”

⁷¹Chieina Peterna khonshāt tui eina shākhi sāda hānga, “Nathumna hāngda khalei mipa hi I matheimana.”

⁷²Chichang chili harvā khongkakhane khonguwa. Jishuna ali hānghaikasa, “Harvāna khanishida makhongranglakha nana ili kathumshida hatra” kaji chi phaningunga. A wukhanangnāhaida chapa.