Read Tangkhul Naga MARK 15 Bible Online

MARK 15 - Tangkhul Naga bible

MARK 15

¹ Pāngmon akhokabingna kazing thangkhaleoda ararbing, ain kathemabing kala hangva̱naobingli ngasoda tui ngacham ngaroka. Athumna Jishuli khalaplaga shimenphungda Pilateli vamisanghaowa.

² Kala Pilatena ali ngahāna, “Na Jihudiwui awunga chila?” Chieina Jishuna “Chi nana hānghaira” da ngahānkai.

³Pāngmon akhokabingna Jishuli apong kachungkha eina phena.

⁴Chieina Pilatena ali ngahānlui, “Na ngahānkā khavai maleithula? Yanglu, athumna nawuitungli kaphen kayākha khuirāda leikhala!”

⁵Kha Jishuna chili lāngda mangahānkāmana, kala Pilate matakhakhaowa.

⁶Chitharan phanit kachida yaruina kapo athishurda phātopli narkahai mi akhali Pilatena chihomichinga.

⁷Ngakukshaoli mi shaokathatli zangda phatopli narkahaibingwui ngachaili Barabbas kaho mi akha leisai.

⁸Yaruibingna Pilateli rālaga rida ana samikasa chi sāmi khavai pophoka.

⁹Chieina Pilatena athumli ngahāna, “Jihudiwui Awungali nathumwui vang chihomi ngasakngaila?”

¹⁰Kaja yuishāt eina pāngmon akhokabingna Jishuli awui pāngli horsangkhamina kaji ana thei.

¹¹ Kha pāngmon akhokabingna yaruibingli Barabbasli chihomi khavai kasata.

¹²Chieina Pilatena yaruili hānga, “Chithākha nathumna Jihudiwui Awunga kahopā hili ili khi sālu jikhala?”

¹³Athumna, “Krushli shaoshānhaolu” da vaowa.

¹⁴Pilatena athumli ngahāna, “Kha khiwui vang kala khi khayon ot ana sahaokhala?” Kha “Ali krushli shaoshānhaolu” da pangmeida vaorai.

¹⁵Pilatena yarui penkhavai athumwui vang Barabbasli chihomi; kala Jishuli lijei eina ngaphitlaga krushli shaothat khavai mihaowa.

¹⁶ Shipaibingna ali governorwui konungwui alung (chiya praetorium)li shimenzanga; kala athumna ashi shipai ashang hupvali hokazipkhui.

¹⁷Kala athumna hungkhamaying kachon akha ali ngavaimi kala ka̱shat eina sākakhui kuihon ngahonmi.

¹⁸Athumna, “Okpeimeiranu, Jihudiwui Awunga” da shālam sai.

¹⁹Athumna akuilila lijei eina ngaphita, machora̱la mashorrora kala khayākashi kachithei sāda khuktizangda khorumkhaninga.

²⁰Athumna ali ngashimshikhui kahaiwui thili hungkhamayinga kachon raimihailaga awui kashankachon ngavaimi kala ali krushli shaoshān khavai athumna shimenthuihaowa.

²¹ Kala Cyrenewui eina keinungli vākida rārākasa, Alexander eina Rufus shavāva̱, Simonli shipaibingna Jishuwui krush phungvā khavai tandi sai.

²² Kala Golgotha (kaja mikuira̱pam) kaho apam chili Jishuli khuivai.

²³Athumna drakhāra̱li myrrh manātlaga ali shimanna, kha ana chi mamangmana.

²⁴ Athumna ali krushli shaoshāna, kala awui kashankachon chi ka̱lā yanglaga ngayar ngaroka.

²⁵Ali krushli shaokashān pung kakathumawui atamlina.

²⁶Ali khayon kaphen tui kapi kahai chiva “Jihudiwui Awunga” kaji china.

²⁷Ali ngasoda khale khani, akhana yāshong kala akhana uishong da shaoshāna.

²⁸(Hithada kathara tuili “Yom kasābingna samphang khangayi chi ala samphangruma.” da kapi kahai chi ungshunghaowa.)

²⁹ Apam chili rākakānbingna kui khayitlaga “Kathumthangwui thili sākāra kaje,

³⁰na khalatta huikhuilaga krushwui eina tunglu” da zeiya.

³¹ Pāngmon akhokabing eina ain kathemabingna zeinganaolaga “Ana kateili huimilaga akhalatta mahuikhuirarmana!

³²Israelwui awunga, Khrista krushwui eina katung yangsa, chieina ithumna ali shitsangpaira” da athum akhana akhali hānga. Ali shaothatrum kahaibingnala zeiya.

³³ Pung katharuka katā eina, apam saikora tangkhamang chi pung kachiko eina tangda tangmanga.

³⁴ Pung kachiko katā eina Jishuna panglāk eina, “Elo-i, Elo-i, lama sabach-thani?” da vaoya, chiwui kakhalata “Iwui Vare, iwui Vare, khisāda ili nana horhaokhala?” kajina.

³⁵Chili nganingkasa kaikhana shāda hānga, “Yanglu, ana Elijahli hoda lei.”

³⁶ Chieina akhana ngasamvāda shon pemting eina kathura atheira̱ thaikhuida thingli khalapshānlaga ali mimangda hānga, “Ngarailu, ali khuitā khavai Elijah marānikhala ithum ngaraiyangsa.”

³⁷Jishuna akhon panglāk eina vaoda thivāhaowa.

³⁸ Kala khorumshimwui chonrān chi atung eina aze tāshungda akai khani sāda kakhaowa.

³⁹ Kala Jishuli yangda nganingkasa shipai shakhawui akhavāna a thihaira kaji kathei eina “Kachangkhat mi hi Varewui Naomayaralaka” da hānga.

⁴⁰ Atam chili khalachāham eina ngashānkhayanga sha̱naobing leisai, chiwui ngachaili Mary Magdalene, James khanganoa eina Joseswui ava̱ Mary kala Solome athum zanga.

⁴¹Athum hi Jishuna Galileeli leilakha athi shurda ali otram ngatha̱khamebingna, kala Jerusalemwui eina ali ngasokhavā sha̱nao kateibingla leisai.

⁴² Sabbathwui khangarān zimiksho sāhaoda kazing khaying tharan

⁴³Arimatheawui Joseph kaho khayākaka hanga̱wui minganin kala Varewui wungram kapha mi china malung pinglak eina Pilateli vāda Jishuwui phasā chi apoi.

⁴⁴Pilatena Jishu thikachanghairala da matakhakhaowa; kala ana shipai shākhawui akhavali hokhuida Jishu thichaohairala da ngahāna.

⁴⁵Shipai akhavāwui eina a thihaira da kashā eina Josephli phasā chi mihaowa.

⁴⁶Chieina Josephna kachon kachara akha lokhuilaga Jishuli khuitāda chi eina romhai, kala lungkaili kashophutkakhui chikhur akhali chizanhailaga akhur chi lungsham eina shirenshānhaowa.

⁴⁷Mary Magdalene eina Joseswui ava̱ Maryna Jishuli chizan kahai apam chi thei.