Read Tangkhul Naga MARK 16 Bible Online

MARK 16 - Tangkhul Naga bible

MARK 16

¹ Sabbath kānthui kahai eina Mary Magdalene, Jameswui ava̱ Mary kala Solome athumna Jishuli thao neomi khavai nganamkaphā thaoyur lokhui.

²Haptāwui kharethang ngathorthakva zimik kashok eina chikhurpam chili athum vai.

³Athum akha eina akha, “Chikhurwui lungsham chi ithumli khipāna khalangshokmira?” da ngazek ngaroka.

⁴Chieina athumna yangkai kala lungsham chi khalangshokhairakasā athumna thei—lungsham chi kahaka lungguina.

⁵Athumna chikhurli kazang eina yaronnao akha charshi kahai kachon ngavaida yāshong pamkasa chi theida athum matakhakhaowa.

⁶Kala ana athumli hānga, “Mamatakhakhaialu, nathum shaoshān kahaia Nazarethwui Jishuli kaphāna. A ringshokhaira, hili maleimana, ali kachipetpam hi yanglu.

⁷ Ara nathumna awui sākhangatha̱bing eina Peterli pao hi unghānglu, kaja ‘Ana nathumli rida Galileeli vara’, da ana nathumli hāngkahai thada nathumna ali chili samphangra.”

⁸Chieina athumna chikhurwui eina shokta yongthuihaowa, kaja kakathir kala kagashui athumli rāshunghaowa; athum ngacheenahaida khipālikha khikhala mahānglakmana.

⁹Haptāwui kharethang ngathorthakva̱ Jishuna ringshok kahaiwui thili Mary Magdalene, kaja ana kameo shini kashamshokmi kahaipāva̱li rimeikapta rāchithei.

¹⁰Ana Jishuli ngasokasābingli unghānga, chitharan athum chapngachāda leisai.

¹¹Kha Jishu ringshokhaira kala ana ali theihaira da kahāng tharan athumna chi mashitsangmana.

¹²Chiwui thili Jishuna azak khangatei eina sākhangatha̱ khanili anina kharam vākida zatta leilakha rāchithei.

¹³Anina latungda kateibingli unghānga, kha athumna chi mashitsangthuwa.

¹⁴Naomeikapta athum tharāda akha chi phazā mahunglakha Jishu rai; ana athumwui mashitkasang kala ning khamakangwui vang, kaja a ringshok kahaiwui thili ali katheibingwui tuili mashitkasangwui vang khararra.

¹⁵Ana hānga, “Okathui apam katongali vālu kala miyur saikorali paokaphā hi hāshoklu.

¹⁶Shitsangda ra̱hik kahai mi chili huimira; kha mashitkasanga mi chili khayon mira.

¹⁷Kala shitkasangbingli machut hi ngasora, iwui mingli athumna kameo kashamshokra; athumna tuiyur kadharla matuira.

¹⁸athumna phara̱ singkhuilala, kathiri manglala china athumli khikha masāza̱mara. athumna kakazānaobingwuitungli pāng parmiakha, kharai samphangra.”

¹⁹Proho Jishuna athumli hangchitheikup kahaiwui thili ali kazingramli khuikāhaowa kala Varewui yāshong chipama.

²⁰Chieina athumna apam kachiva̱li vāda pao hāshoka kala Prohona athumli ngasoda ot sai kala athumwui paokapha chi mashunga kaji chi matakhak kahai ot kasā machut china phongshoka.