Read Tangkhul Naga MARK 2 Bible Online

MARK 2 - Tangkhul Naga bible

MARK 2

¹Zimiksho khani kathumthangwui thili Jishuna Capernaumli hanunga kala a unghaira kaji pao ngayaohaowa.

²Chieina mi kachungkha rākazipta khamongphei eina tangda pamkhavai maleithuwa; kala Jishuna athumli pao hāshokpama.

³ Kala sheikasha̱ mi akhali mi matina ngava̱rai.

⁴Mi chungnāhaida awui ngalemli mazangpaithuda, athumna shimtung lānphutlaga akhur chiwui eina kakazā mipa chili pet eina phonda chihotai.

⁵Jishuna athumwui shitkasang chi theilaga sheikasha̱pali, “Inaomayara, nawui morei pheomihaira.” da hānga.

⁶Chitharan pamkasa ain kathemabingna athumwui ningli machuka,

⁷“Kathada hipāna hithada matuihaokhala? Hi Vareli kachipat tuina. Vare maningla morei pheomishapa khipā leikhala?”

⁸Athumwui ningli khamachuk chi heng sāda theihaoda Jishuna hānga, “Khisāda nathumwui ningli machukphāphākhala?

⁹Sheikasha̱pali ‘Nawui morei pheomihaira’ kaji paimeika ‘Ngakarthuida nawui pet khuiphungda zatulu’ kaji paimeikhala?

¹⁰Kha miwui Naomayarana okathuili morei pheomikashapwui sāshap pangshap lei kaji nathumli ina shākhi mira.” Chieina ana sheikasha̱pali ngareivāda hānga;

¹¹“Ngakarthuilu, nawui pet khuiphungda shimli ungulu.”

¹² Ana ngakarthuilaga hengsāda awui pet khuiphungda athumwui mangāli phongshar eina zatshokhaowa. Chi kathei eina athum matakhakhaida Vareli sochikatta hānga, “Hikatha hi rida ithum matheilakranga.”

¹³Jishuna shamadrupheishong hanvāluishithaowa kala mi kachungkha rākazipta ana tamchithei.

¹⁴ Ana zatvāmamān kaji eina Alphaeuswui naomayara Levi khāshinā khalokpamli pamkasa theida ali hānga, “Ithi shurlu.” Chieina ana ngakarthuida athi shurthuwa.

¹⁵Jishuna Leviwui shimli phāshakta leilakha khāshinā khaloka kala morei kaphunga mi kachungkha athi shurrāda awui sākhangatha̱bingli ngasoda phazāruma.

¹⁶ Kala Jishuna morei kaphungbing eina khāshinā khalokabingli ngasoda phazākhangarum kathei eina ain kathemabing eina Phariseebingna awui sākhangatha̱bingli ngahāna, “Khi sāda ana khāshinā khalokabing eina morei kaphungbingli phazākharumkhala?”

¹⁷Jishuna chi kashā eina athumli hānga, “Kazāt makhaleibingna khānong mahomana, kha kakazābingna kahona. Ina khamashungbingli hokhuikida kharā maningla, kha morei kaphungbingli hokhuikida kharāna.”

¹⁸ Thangkha Johnwui sākhangatha̱bing eina Phariseebing khumda leilakha mi kaikhana ali rāngahāna, “John eina Phariseebingwui sākhangatha̱bingna khumlaga khiwui vang eina nawui sākhangatha̱bingna makhumthukhala?”

¹⁹Chieina Jishuna athumli hānga, “Khām kahaipa china shakzātli kharābingli ngasopamda leilakha athum khumpairala? Khām kahaia china athumli ngasopamda leilakha eina tangda makhumpaimana.

²⁰ Kha mākhām kahaia chili athumwui eina khuikathui atam rārāsāra, chithang athum khumnaora.

²¹Mi khipānakha kachama kachonli kadhara chonsā mataksangmana, tāksangakha kadhara chonsā chi kākshokhaoda zakshimeikhar kākhaowa.

²²Kala khipānakha drakhāra̱ sangkhavai sāhuikhao kachamli drakhāra̱ kadhar mathaisangmana, thaisangakha drakhāra̱ china khao chi ngawokkhaida drākhāra̱la, khaola shimanhaowa, kha drakhāra̱ kadhar chiya kadhara sāhuikhaowui vangna.”

²³ Sabbaththang Jishuna luivāk vai, kala athumna zatmamānda leilakha awui sākhangatha̱bingna mā mazokshai.

²⁴Chieina Phariseebingna ali, “Yanglu, khisāda athumna Sabbaththang ain kakai ot sākhala?”

²⁵Kala ana athumli hānga, “Davidna darkar kasā kala thaikahai tharan ali ngasokazatbingli ngasoda:

²⁶ Abiatharna pāngmon kharei sāda leilakha ana kathada Varewui shimli zanglaga pāngmonbing maningla khangateibingna shaikashar Ngasokhamiwui khamui chi shaihao kala ali ngasokazatbinglila mishaihao kaji mapākhuihaira?”

²⁷ Kala ana athumli hānga, “Sabbath hi miwui vangna, mi hi Sabbathwui vang sākahai maningmana;

²⁸chiwui vang eina miwui Naomayarana Sabbathwui akhavāna.”