Read Tangkhul Naga MARK 6 Bible Online

MARK 6 - Tangkhul Naga bible

MARK 6

¹ Ana apam chiwui eina thuihailaga awui ramli unghaowa; kala awui sakhangathabingna ali shurzata.

² Kala Sabbaththang ana synagogueli tamchitheiphokuwa; kala awui tui nganākakhui mi kachungkhana matakhakhaida hāngngaroka, “Ana saikora hi kachili atamkhui khala? Ali mikahai hi khi thangmeikhala? Apāngna kayakha hakhamahā ot sashapkhala!

³ Hi Marywui naomayara, kala James, Joseph, Judas kala Simonwui achinā mistrypa chi maningmala? Azarva̱ngara ithumli mangasopammala?” Chieina athumna ali mamayāngaithuwa.

⁴Chieina Jishuna athumli hānga, “Marānliva kachichāramli shangnao ramnao kala shimkhurna kajimada apam kachiva̱li khayāmakashi maleimana.”

⁵ Apam chili ana kakazānao akha khaniwuitungli pāng parza̱da raikhami maningla matakhak kahai ot khangatei masāpaithuwa.

⁶ Kala ana athumwui mashitkasang chi theilaga matakhakhai. Chiwui vang ana kha̱kha̱li vāda tamchithei.

⁷ Ana tharāda khani chili hokhuida khanini eina chihovai kala athumli raih kashamshok khavai pangshap mi.

⁸Ana athumli, khāmshui maningla khangatei kaja kashakazā, paidu, kala shāneirali lupā akhala makhuiphung khavai;

⁹kha pheihopva tonglaga, phahonva khani masangkhavai ningmi.

¹⁰Ana hānga, “Nathumna vāzang kahai shim chili nathum mazatranglakha eina tangda pamlu.

¹¹ Kala kachikatha apamli nathumli mazun ngasakakha kala manganāsangakha, nathum kazat tharan athumli makhamayawui shākhi kachithei sāda pheili kakā chifa chi kathangtāhailu.”

¹² Chieina athumna vāda ningngatei khavai pao hāshoka.

¹³ Kala athumna kameo kachungkha kashamshoka kala kakazānao kachungkhali thao neomida raimi.

¹⁴ Herod awungana chi shai, kaja Jishuwui aming ngayaonaphaowa. Mi kaikhana “Ra̱hikme John ringluishithaira, chiwui vang eina ana sākashapna” da matuiya.

¹⁵Kha kaikhana “Elijahna” da hānga kala khangatei kaikhana “Achālakhawui maran kathā akhana” da hānga.

¹⁶Kha Herod awungana chi kashā eina “Ina akui rangtāmi kahai John chi ringlui kahaina” da hānga.

¹⁷ Kaja Herodna agato Philip preiva̱ Herodiasli ngakum kahaiwui vang Johnli tukkhui khavai a khalattana kasoi kala khalaplaga phātopli sanghai.

¹⁸Kaja Johnna Herodli, “Nana nagato preiva̱li khangakum hi ain maningmana” da hānga.

¹⁹ Chiwui vang eina Herodiasna awuitungli malungvātlakhaoda shaothatngai. Kha a chi mararsamana;

²⁰ kaja Herodna John hi khamashunga kala kathara mina da katheiwui vang ali ngacheelaka, chiwui vang eina ana ngākmi. Awui tui shākachida ning pa̱ngapālaklala ana awui tui nganāngailaka.

²¹Kha Herodna awui kapharā zimiksho ungshungthang khangam-kharei, akhavā kasābing kala Galileewui kathānabing saikorali zātkhān kasā chitharan khamahai atam samphanga.

²²Herodiaswui nao ngalāva̱na chakoi rasāda Herod eina awui ngasotnaobingli penngasaka; chieina Herodna ngalāva̱ chili hānga, “Nana ningkachāngchāng polu, ina nali mira.”

²³ Ana “Nana kapopo ina mira, iwui wungram tangkhai eina tangdala mira” da ngashithaisai.

²⁴Ana ava̱va̱li, “Ili khi polu jikhala?” da ungngahāna. Ava̱va̱na “Ra̱hikme Johnwui kui” da ngahānkai.

²⁵Ngalāva̱ china awungawuili totot vālaga “Ra̱hikme Johnwui kui arui khongphei hili sangmilu” da apoi.

²⁶Kala awunga wukhananglakhaowa, chithālala awui tuingahit kala ngasotnaobingwui vang eina ali ngashitsang kahai tui chhi mahatngathuwa.

²⁷Kala awungana hengsāda shipai akha hokhuilaga Johnwui kui khuirā khavai kasoi. Ana phātopli Johnwui kui arangkhui,

²⁸laga kui chi khongpheili sanglaga ngalāva̱ chili khuiungmi kala naongalāva̱na ava̱va̱li mihaowa.

²⁹Johnwui sākhangatha̱bingna pao hi kashā eina athumna awui angun chi akhuilaga chifahaowa.

³⁰ Paokazatbingna Jishuwuili latungda athumna sākahai kala tamchithei kahai unghānga.

³¹Jishuna athumli, “Ngachakyang kahai apam akhali vāhaosa, laga nathum chili angasāmkhuilu” da hānga. Kaja mi chungnā kashok-kazang sāhaoda athum leiyālak eina phākashak-phakazā atamla masamphangmana.

³² Chieina athumna marikhong tonglaga ngachakyang kahai apam akhali vai.

³³Athum zatkahai chi mi kachungkhana theihaoda keinung saikorawui eina athumli kharomrai kala Jishu eina awui sākhangatha̱bingli athumna vāshungrihaowa.

³⁴ Jishuna marikhongwui eina kārkashok tharan mi kachungkha chili theida lumashanlakhaowa, kaja athum yaokahoma makhalei yaobing thai. Chieina ana athumli apong kachungkha tamchitheiphoka.

³⁵Kazing khaying eina sākhangatha̱bingna Jishuli vahānga, “Hiya mi makapāna apamna kala kazingla yingura;

³⁶kachichāwui kashakazā alozā khavai kuikhamareili khalei kha̱ kala keinungbingli athumli chihovāhaosa.”

³⁷ Kha Jishuna ngahānkai, “Nathumna athumli zākhavai khamilu.” Athumna ngahāna, “Athumli mizā khavai denari shākhani sha̱khawui khamui alokhuilu kajila?”

³⁸Chieina Jishuna athumli hānga, “Nathumwuili khamui kayākha leikhala? Angathingyanglu.” Kala athumna ngathingkakhui eina “Khamui phangā, khaih khani leili” da ngahānkai.

³⁹Chieina yarui ashang chi khum-khum sālaga wonuitung chili pamngasaklu da Jishuna sākhangatha̱bingli hānga.

⁴⁰Chieina mibing china shāshā, hangphangānga eina ashang sālaga pama.

⁴¹ Jishuna khamui phangā kala khaih khani chi singkhuilaga kazingramli yangkāda sokhami pomi kala khamui chi serkhaida yaruili yaovā khavai sākhangatha̱bingli mi kala khaih khani chila chithada ngayarmisera.

⁴²Athum saikorana shai kala ningyāng unglakhaowa.

⁴³Athumna khamui eina khaih shaitai chi luk tharāda khani kazipkhui.

⁴⁴Khamui chi kazā mi mashing chi thing phangāna.

⁴⁵ Jishuna yaruili chihomahungda leilakha, hengsāda awui sākhangatha̱bingli marikhong kātong ngasaklaga ali rida lākhavāk vāngasakhaowa.

⁴⁶Athumli ngapak kahaiwui thili ana phungreili seihā sākhavai vai.

⁴⁷Kazing khaying tharan marikhong chi ngayi alungthungli leisai, kha ava ngayipheili leisai.

⁴⁸ Masi chi athumli ngasunglaga phanhaokada athumna marikhong chi khananglāk eina huikazat ana thei. Kala ngaya pung khamate kathali ana ngayitungli zatta athumwuili rai. Athumli rikhui khavai khavāna,

⁴⁹kha ana tara̱tungli kazat chi athumna theilaga kameona da phaninga kala vaotaraiya,

⁵⁰ kaja athumna ali kathei eina ngacheeshunhaowa. Kha Jishuna hengsāda athumli hānga, “Pingmeilu, ilaka, mangacheealu.”

⁵¹Ana athumwuili vālaga marikhonglungli kākatong eina masi chi va̱rihaowa. Sakhangatha̱bing chi matakhakhaowa,

⁵² kaja athumna mi thingphangāli mikazāwui kakhalatla bhap matāthuwa; athumwui ning makanghaowa.

⁵³ Athumna ngayi chi kānkāda Gennesaret ngaleili vashoka kala marikhong chi ngayipheili ahokhai.

⁵⁴Athumna marikhongwui eina kashok tharan mibingna hengsāda Jishuli theihaowa,

⁵⁵chieina athumna apam saikorawui eina kakazānaobingli pet eina phonda Jishu leiyi ji da kashapam kajida khuirai.

⁵⁶ Ana kha̱lila, keinunglila kala ayarlila khavāvāpam kachida mibingna leihngapha̱li kakazānaobing rachipetta awui chontheirali eina tangda saza̱khui ngasak khavai poi, kala saza̱kakhui mi saikora kharai samphanga.