Read Tangkhul Naga LUKE 1 Bible Online

LUKE 1 - Tangkhul Naga bible

LUKE 1

¹Leikashiya Theophilus, ithumwui ngachaili ungshung kahai otshotbingwui khararchān kapishok khavai mi kachungkhana athumwui kashap sāhaira.

² Haokaphok eina thuida mik eina kathei samphang kahaibing kala tui chi hākashokbingna ithumli hāngmi kahai thada athumna kapishok kahaina.

³ Chiwui vang eina khayāshikapaiya amei Theophilus! Shokkahai otshotbing saikora haokaphok eina thuida ina munlak eina kazunyanglaga otshotbing chi nawui vang maron-maron eina kapikhami hi phārada phaninga.

⁴ Chithākha nali tamchithei kahaibingwui khamashung chi nana pongda theikhuipaira.

⁵ Judeawui awunga Herodwui atamli Abijah pāngmonshiwui eina Zechariah kaho pāngmon akha leisai. Apreiva̱li Elezabeth hoi; Aaron pāngmonshi shimkhurwui einana.

⁶Ani khanini Varewui mangāli khamashung-khangarong mi sāda Prohowui ningkhami kala shiyan saikora mayonda shāt makālakla okthuisai.

⁷Kha ani nao maleimana, kachiwui vangkhala kaja Elizabethva nao kashumva̱na kala ani kasarla sarhairasai.

⁸Thang zimikshokha khorumshimli otram khangatha̱ chi Zechariah ashangva̱wui yar sāhaida ana pāngmonwui ot sāda leisai.

⁹ Pāngmonbingwui khangachāyan athishurda Prohowui khorumshimli zangda nganamkaphā riktā khavai ka̱lā yanglaga awuili tāhaowa.

¹⁰Nganamkaphā riktāda leilakha yarui saikora kayāngli seihā sāpama.

¹¹ Prohowui kazingrao akha nganamkaphā riktā khavai hanphut chiwui yāvāk rānganinga.

¹²Zechariahna ali kathei eina kashuihaowa kala khangacheela ngacheehaowa.

¹³ Kha kazingrao china ali hānga, “Zechariah, mangacheealu, Varena nawui seihā kasā shāmihaira, chieina napreiva̱ Elizabethna mayarnao akha pharāra. Nana awui ming John phokra.

¹⁴Nana ringphāda mathānra kala mi kachungkhana awui kapharāli mathānrumra;

¹⁵ Kaja Prohowui miktāli a kahaka mi ngasāra kala zamkhorla, khamaripa otla masāza̱mara, Ava̱wui naopamli leilakhawui eina, ali Manglā Kathara pemtinghaora.

¹⁶Israelnao kachungkhali ana athumwui Proho Vareli latung ngasakra.

¹⁷ Marān Elijahwui thada pangshap leilak eina kala hakmahālak eina zatra; ana avāva̱ eina naongarābingwui ning ngarum ngasakra, kala kahāng makhanganābingli mashun thangmei chili latung ngasakra kala Prohowui mibingli awuivang ngaranpinghaisā ngasakra.”

¹⁸ Chieina Zechariahna kazingrao chili hānga, “Hi ina kathada theikhuipairakhala? Kaja I kasarnaona kala ipreiva̱la sarhaira.”

¹⁹ Kazingrao china ali ngahānkai, “I Varewui mangāli khanganinga Gabrielna, nali ngazek khavai kala khamathā chānpao hi khuirāmi khavai ili chihokharāna.

²⁰Yanglu, na khak mashokmara kala shokki kaji mashokranglakha eina tangda khak ngasha̱ra; khiwui vangkhala kaja ngashitmi kahai atamli ungshungki kaji iwui tuili nana mashitsangthuwa.”

²¹Mibingna Zechariahli ngaraipama. Ana khorumshimli sha̱rākha pamkahaiwui vang eina athum ningkashakhaowa.

²²Kala ana ayarli kashok tharan athumli khichānkhala mangazekrarthuwa. Chieina ali khorumshimli khamahā akha samphang kahaina da athumna phaninga kala ana tui mamatuipaithuda athumli khudam eina sāchithei.

²³Zechariahna awui otram khangatha̱ atam peiuda shimli hanunghaowa.

²⁴Khaleilaga apreiva̱ Elizabeth nao vaihaowa kala kachāng phangā sha̱kha shimli ngathumpama.

²⁵ Ana hānga, “Ara ili Prohona ngachonmida mibingwui mangāli iwui maikashi khuithuimihaira.”

²⁶Elizabethna nao vaida kachāng katharuka kakā tharan Varena kazingrao Gabrielli Galileewui keinung Nazarethli shivāta.

²⁷Ana Davidwui naotun Joseph kaho mayara chili khāmhaikasa kachingva̱ sha̱nao chili pao khuirai, kachingva̱ chili Mary hoi.

²⁸Kazingrao china ali rāhānga, “Ringphālu, he ngahānkhangaiva̱, Prohona nali ngasomida lei.”

²⁹Kha tui chi shālaga a ning kazāhaowa kala hāngda khalei tui chi khi ngasānikhala da ningli machuka.

³⁰ Chieina kazingrao china ali hānga, “Mangacheealu, Mary, kaja na Varewui lukhamashan samphanghaira.

³¹ Yanglu, nana nao vaida mayarnao akha pharāra kala nana awui ming Jishu phokra.

³²A kahaka ngasāra, kala juikhamataia Varewui Naomayara hora; Proho Varena avāva̱ Davidwui wungram chi ali mira,

³³ Jacobwui ara̱-azāli katang mavaila ana mungra kala awui wungpam katang mavaimara.”

³⁴ Chieina Maryna kazingrao chili hānga, “Hi kathada shokpairakhala, iva gaharala maleimana?.”

³⁵ Kala kazingrao china ali hānga, “Manglā Katharana nawuitungli tāra, kala juikhamataiawui pangshap china nali rakhayinmira; chiwui vang eina pharāki kaje nao chili kathara Varewui Naomayara hora.

³⁶Yanglu, nawui athei-asā kashokva̱ Elizabethla asarlam mayarnao akha vaihaira. Kashumva̱ hokasā ana nao vaida hina katharuka kachāngna.

³⁷ Kaja Varewui vang saknā kahai khikha maleimana.”

³⁸Chieina Maryna ngahānkai, “Yanglu, iya Prohowui rao sha̱naona, nawui kahāng athishurda shokranu.” Chiwui thili kazingrao chi awui eina thuihaowa.

³⁹Chiwui thili Maryna ngakarthuida kaphungli khalei Judeawui keinung akhali hengsāda vai.

⁴⁰Ana Zechariahwui shimli azunda Elizabethli samphang khangarokwui shālam sai.

⁴¹Elizabethna Marywui shālam tui shāngasha̱da awui naopamli khalei nao chi ngasonkai kala Elizabeth Manglā Katharana pemtinghaowa.

⁴² Chieina ana panglāk eina “Sha̱naowui ngachaili na hi somi kahaiva̱ ngasaranu; kala nawui naopamwui eina shokki kaje athei chi sokhami kala khamahai ngasāranu! da hānga.

⁴³Khiwui vang eina ili hiyākha ka̱lā mahai ngasakta iwui Prohowui ava̱va̱ iwuili kharākhala?

⁴⁴Yanglu, nawui shālam tui shākhaleoda iwui naopamli khalei nao hina khamathānwui vang ngasonkai.

⁴⁵Prohona ali hāngkahai chi ungshunglakra da shitkasanga sha̱nao chi sokhami ngasāranu.”

⁴⁶Chieina Maryna hānga, “Iwui wuklungna Proholi sochikata.

⁴⁷Iwui Huikhame Varewui mangāli imanglā mathāna.

⁴⁸Kaja ana awui khangazanva̱ rao sha̱naoli phaningmihaira. Khikhalajila yanglu, aja eina thuida thot kachiva̱na, ili somi kahaiva̱ da hora.

⁴⁹Khikhalajila Reikhamataia Varena iwui vang hakkhamahā ot sāmihaira, kala Kathara kaho hi awui mingna.

⁵⁰Ali khangacheebingwuitungli awui lukhamashan thot-thot kachida lei.

⁵¹Awui pāngthei katingshokta sāshap pangshap chithei, kala langkasobingli athumwui wuklungwui khangarān chi sākhayangmi.

⁵²Ana Pangshapa khamungabingli wungpamkhong eina khuishoka, kala khangazanbingli khāngkāmi;

⁵³Ana kathaibingli kaphā ot eina thongasaka, kala kashāngbingli khamasai eina chihohai.

⁵⁴Ana awui lukhamashan phaningungda awui rao Israelli ngachonmi,

⁵⁵ ana ishāvā ngarā Abraham eina awui naotunbingli katang mavaila ngazeka.”

⁵⁶Maryna Elizabethli kachāng kathum sha̱kha angasopamlaga shimli hanunghaowa.

⁵⁷Ara Elizabethwui naosak atam ungshunguda ana mayarnao akha pharai.

⁵⁸Prohona ali hakkhamahā lukhamashan miya kaji awui khongnainaobing kala athei-asābingna shai kala ali ringphārumma.

⁵⁹ Kachishatathang nao chili athumna ahui rimshokmi khavai rai kala avāva̱wui ming khuida ali Zechariah phokki jihairasai.

⁶⁰Kha ava̱va̱na “Chi maningmana, ali John hora” jihaowa.

⁶¹Chieina athumna ali hānga, “Nashi theisā khipālikha hikathā aming maphoklakranga.”

⁶²Chiwui thili athumna avāva̱li awui ming khi phokrakhala da ingkit eina ngahāna.

⁶³ Chieina ana kapi khavai slate akha poi kala chili “Awui ming John” da kapimi. Chieina athum saikora matakhakhaowa.

⁶⁴Kala ngalāngda a tui matuipaihaoda ana Vareli masochikata.

⁶⁵Chieina khongnainaobing saikora ngacheeshunhaowa kala shokkahai otshot saikora hi Judea kaphungwui kha̱wung kachida ngazeklophaowa.

⁶⁶Kashā mi saikorana shākakhui tui chi athumwui ningli tipsanghailaga “Nao hi kachikathā ngasāsānikhala” da matakhakhai, kaja Prohowui pāng chi ali ngasomi.

⁶⁷Avāva̱ Zechariahli Manglā Katharana pemtinghaoda ana marānda hānga;

⁶⁸“Israelwui Proho Vareli sosersa, kaja ana awui mibingli rāngachonmida athumli ngatangkhuihaira.

⁶⁹Awui rao David shimkhurwui eina ana ithumwui vang pangshap khaleia Huikhame akha shokngasakhaira;

⁷⁰ana achālakhawui eina awui kathara marānbingwui khamor eina hāngmarānmi kahai thada,

⁷¹ithumli yangkashebing kala ithumli yangkakharinga saikorawui einala kanmira;

⁷²ishāvā ngarāli lukhamashan chithei khavai, kala awui kathara tuingashit phaningung khavai.

⁷³ithumwui avāva̱ Abrahamli ngashitmi kahai tuingashit,

⁷⁴ithumli samphang ngasaki kaji chiya; yangkashe pāngwui eina kanmi kahai mibing ngasāda, khangachee maleila ali otram ngatha̱paira.

⁷⁵kala awui mangāli ithum mirin peichaoda kathar kala khamashung-khangarong eina otram ngatha̱paira.

⁷⁶ “Chieina inao, nali Juikhamataiya Varewui marān hora, kaja awui shongfa ngarānmi khavai nana Proholi rida zatra,

⁷⁷ awui mibingli huikhamiwui awor tamchithei khavai; morei pheokhami lungli huimira da.

⁷⁸ Varewui lukhamashan mangā eina, ithumwuitungli ana huikhamiwui kahor shokkhangasak chitharan,

⁷⁹ tangkhamang kala kathi khaya̱lungli kapambingli kahor mira, kala chingri kahai pongli zatkhavai thānmira.”

⁸⁰ Kala nao chi rarsangmamānda manglārinla pangsanga kala Israelnaobingli phonglāk eina machitheiranglakha eina tangda ana lamhāngli pama.