Read Tangkhul Naga LUKE 10 Bible Online

LUKE 10 - Tangkhul Naga bible

LUKE 10

¹ Chiwui thili Jishuna khangatei hangshinili kapangkhuida ana vāki kaji keinung kachiva̱li mi khanini eina ali rida chihovai.

² Kala hithada hānga “Hātkhavai mā kachungkhaya, kha kahāta mi kateokhamānga; chiwui vang eina awui mā kahātli kahāta mi chungmeida shirāt khavai seihā sālu.

³ Nathumna vāki kaji chili vaulu; yanglu, ina nathumli kharangwui alungli yaonao chihokhavā thada kachihona.

⁴Lupākhaola, paidula, pheihopla makhuiphungalu; kala shongfali khipālikha chānjam masānganaohaialu.

⁵ Nathumna vākazangzang shim chili ‘Shim hili chingrihairanu’ da hāngrikaplu.

⁶Chili chingri kahai mi leisaakha, nathumwui chingri kahai awuitungli leira, maningakha chi nathumwuili latungra.

⁷ Nathum shim chili thada pamalu, athumna khamimi chi khuishak khuizālu, kaja ot kasā mi china awui ngalangman samkaphang khangachāna. Shim shimli mazangzatalu.

⁸Nathumna keinung akhali akazang tharan athumna nathumli zang ngasakakha, athumna khamimi chi zālu;

⁹chili kakazā khaleibingli raimilaga, athumli ‘Vare wungram chi nathumli ranganailakhaira’ da hānglu.

¹⁰Kha nathumna keinung akhali vākazang tharan athumna mazang ngasakngaiakha chānreili shokta hānglu,

¹¹ ‘Nathumwui makhamayāwui vang ithumwui pheili kakā nathumwui keinungwui chifa eina tangda kathangkatāna. Kha hi theilu kaja Vare wungram chi nganailakhaira.’

¹² Ina nathumli kahāngna, chithanghon, keinung chiliva Sodomna khāngpaimeira.

¹³ “Chorazin! Nali kakhanang ringkashi ngasāranu! Bethsaida! nali kakhanang ringkashi ngasāranu, kaja nathumwui alungli hakkhamahā ot sākahai chi Tyre eina Sidonli sāsāsi kaja athumna borāshi ngavaida kala hotlātungli ngaleoda achā ning ngateihairara.

¹⁴Kha Bichar sāthanghon nathumliva Tyre eina Sidonli bichar kasāna paimeira.

¹⁵Kala Capernaum, naliva kazing kāzokta masot mimaraolā? Nali kazeiram tāshungda khuitāra.

¹⁶ “Nathumli khanganā mi chi ili khanganāna, kala nathumli makhamayā chi ili makhamayāna, ili makhamayā chi ili kashirātali makhamayāna,” da Jishuna sākhangatha̱bingli hānga.

¹⁷Hangshini china mathānthathup hanungda hānga, “Proho, nawui ming singda kakaso tharan kameo eina tangda ithumwui kahāng nganai!”

¹⁸ Chieina athumli hānga, “Ina kazingramwui eina rikhān khangashei thada Satan tākatung thei.

¹⁹Yanglu, nathumli phara̱ eina seithattungli naizatshap khavai kala yangkashewui pangshapli yuishap khavai ina sāshap pangshap mihaira; khinakhala nathumli khamā mazararmara.

²⁰ Chitha-ilala nathumna kameobingli yuihaowa kajiwui vang mamathānhailu, kha nathumwui ming kazingramli kapihaili kajiwui vang mathānlu.”

²¹ Pung chichangli ana Manglā Katharawui mangā eina khamathān samphangda hānga, “He Avā, kazingram eina okathuiwui Proho, ina nali masotchikatli kaja nana otbing hi thangkhamabing eina theishingkakhuibingwui eina ngathumihailaga angangnaobingli chitheimihaowa; mha, Avā, hikathā hi nawui lukhamashanwui kaphaningna.

²² “Ot saikora iwui Avāna ili horsangmihaira, kala Anaomayara hi khipākhala da Avā maningla khipānakha matheimana; kala Avāva̱ hi khipākhala da Anaomayara maningla khipānakha matheimana, kala Anaomayarana kachikathāli kapangkhuida chitheikhami maningla khipānakha matheimana.”

²³ Chiwui thili sākhangatha̱bingli ngareivāda ngathumsāda hānga, “Nathumna kathei chi kathei ka̱lā mahai!

²⁴Ina nathumli kahāngna, marān kala awunga kachungkhana nathumna theida khalei hi theingailaksai, kha matheimana; kala nathumna shāda khalei hi shāngailaksai, kha mashākhuimana.”

²⁵ Yanglu, ain kathema akhana Jishuli chāng tamyangkida nganingkāda hānga, “Ojā, ina makashimān mirin mathunkhui khavai khi sarakhala?”

²⁶Jishuna ali hānga, “Ain lairikli khi kapihaida leikhala? Nana chi kathada pākhuikhala?”

²⁷Chieina ana ngahānkai, “Nawui Proho Vareli nawuklung tongda, manglā tongda, napangshap tongda kala naning tongda leishiphalungra; kala nawui khongnainaoli na khalattali leikashi thada leishiphalungra.”

²⁸ Jishuna ali hānga, “Nana mashunglak eina ngahānkāhaira; chi sālu, na ringra.”

²⁹Kha khalatta mashungkhuikhangaiwui vang Jishuli ngahānluishita, “Chithākha iwui khongnainao chi khipākhala?”

³⁰Jishuna ngahānkai, “Mi akha Jerusalemwui eina Jericholi tākida zatlakha phama̱kashaobingwui pāngli zanghaoda athumna awui kashankachon ngaponkhui kala kashaola shaomida kathi mayuk eina haimihailaga zatthuihaowa.

³¹Khaleilaga shongfa chili pāngmon akha rāchamrāsai. Ana ali kathei eina shongfa lākhavāk theithuihaowa.

³²Chi tākam eina Levi akhala chili vāshungda ali ayanga kala shongfa lākhavāk eina thuihaowa.

³³ Kha Samarianao akha kha̱ram vākida zatta leilakha mipā china khalei apam chili vāshunga, kala ali kathei eina lumashanlakhaowa.

³⁴Ana awui ngalemli vālaga thao eina drakhāra̱ neomi kala khamā saikora rommihai. Chiwui thili gadhātungli ali chipamhailaga shimzun akhali khuivai kala ali mathālak eina ngahāmi.

³⁵Akhama kathā ana denarii khani khuishoklaga shimva̱a chili mida hānga, ‘Ali mathālak eina ngahāmilu, hili lāngda zangkahai saikora I hankhaungli minaora.’”

³⁶Athum kathumwui ngachaili pha̱ma̱ shaomikahaipāwui khongnainao chi kachipāna da nana phaningkhala?”

³⁷Ana ngahānkai, “Lukhamashan kachitheipā china.” Chieina Jishuna ali hānga, “Ungulu kala chithada sālu.”

³⁸ Chiwui thili athumna vāmamānda zatlakha kha̱ akhali ashoka kala Martha kaho sha̱nao akhana ali awui shimli zunngasaka.

³⁹Kala agatuiva̱ Mary kaho akhala leisai, ana Jishuwui pheizingli pamda awui tamkachithei chi nganāpama.

⁴⁰Kha Marthana sheba kasāwui vang khananghaoda awui ngalemli vālaga hānga, “Proho, igatuiva̱na imangli otram ngatha̱ khangasak hili nana khikha maphaningmimaralā? Ili ngachon khavai ali kahāngmilu.”

⁴¹ Jishuna ngahānkai, “Martha, Martha, nana tarākhawui vang khanangda malungringhaira,

⁴²kha khavāt akha lei, Maryna awui eina makhuithuiki kaji chi kapangkhuihaira.”