Read Tangkhul Naga LUKE 11 Bible Online

LUKE 11 - Tangkhul Naga bible

LUKE 11

¹ Jishuna apam akhali seihā asālaga kupkahaiwui thili sākhangatha̱ akhana ali hānga, “Proho, Johnna awui sākhangatha̱bingli seihā kasā tamkachithei thada ithumlila tamchitheimilu.”

² Chieina Jishuna athumli hānga, “Nathumna seihā kasā tharan hithada sālu: “Avā, naming tharmathengmeiranu. Nawui wungram shokmilu,

³Ithumli thangthangwui kashakazā thangkachida khamilu;

⁴ kala ithumli ithumwui morei pheomilu; khikhalajila ithumli khayon kasā mi kachiva̱li ithumna pheomi; kala ithumli kasuili mathānzangmialu.’”

⁵ Jishuna athumli hānglui, “Chānjam sāda nathumwui ngachaili mi akhana awui ngasotawui shimli ngayāsailung vālaga, itao, khamui kathum khamisālu:

⁶kharam kazata iwui ngasotnao akha ishili rāzangda ali mizā khavai khikhala maleithuwa da apolaga

⁷ana ‘Ili masheikhautalu; ara khamongla tākhailaga inao ngarāli thānpili, I mangakarthuirarmara kala nali khikhala mamirarmara’ da shimlungwui eina ngahānkāralā?

⁸Ina kahāngna, ana ali awui ngasotana kajiwui vang ngakarthuida khikhala mamirarmara jilala ngasotana poshonhaora kajiwui vang ngakarthuilaga awui kapo chi thuikapeomira.

⁹ “Chiwui vang eina ina kahāngna; Polu mira, phālu samphangra, shaolu shomira.

¹⁰Kaja kapo mi kachiva̱li mira, kaphā mi kachiva̱na samphangra kala kashao mi chili shomira.

¹¹Nathumwui ngachaili avāva̱ khipāna anaomayarana khaih polaga phara̱ mikhala?

¹²Lha harra̱ polaga seithat mikhala?

¹³Maphasālala nana naongarāli khamathā ot mitheiakha, kazingramli khalei Avāva̱na ali kapobingli kayākha mataida Manglā Kathara mirakhala?”

¹⁴ Chiwui thili Jishuna khak khangasha̱ kameo akha kashamshokmida leisai, kala kameo china shokkahai eina mipā chi tui matuipaihaida mibing chi matakhakhaowa.

¹⁵Kha athum kaikhana hānga, “Ana kameobingwui akhavā Belzebulwui mangā eina kameo kashamshoka.”

¹⁶ Khangatei kaikhana ali chāng yangkida “Kazingramwui eina machut akha chitheilu” da poi.

¹⁷Kha athumwui kaphaning theihaoda Jishuna athumli hānga, “Wungram chi khalatta ngakaikazamhaiakha shimānhaora, kala shimkhurwui alungli ning mangarumakha kaiphalungra.

¹⁸Chithada sāda Satan akhalattala ngakaikazamakha, awui wungram leisarala? Kaja ina Beelzebulwui mangā eina chipee kashamkashokna da nathumna hāngli.

¹⁹Ina Beelzebulwui mangā eina chipee kashamkashokna jisi kaja nathumwui thikashurabingna khipāwui mangā eina chipee kashamshokrakhala? Chithākha athumna nathumwui bicharsame ngasāhaora.

²⁰Kha Ina Varewui pangshap eina chipee kashamshokakha Varewui wungram chi nathumwuili rāshunghaira.

²¹“Kapanga mi akhana khutlai peida shaksālaga awui konung khamayon tharan awui lan mashimānmana,

²²kha ali pangkhameia akhana shim rākaida yuihaiakha ana chihānkasa khutlai saikorala ngapaikhuihaora kala ngaponkakhui otla athum ngayarhaora.

²³ “Ili makazanga mi chi ili makhamayāna, kala ili ngasoda homkakazipli makazanga mi chi kasham kahaiana.

²⁴ “Makathar manglā china mi chiwui eina shokkahai eina ngalei kathengli awui ngasām khavai apam phāvai, kala akhala masamphangthuda akhalatta matuiya, ‘Ina pamkasā shim chili latungura’.

²⁵Ana latkhaung tharan shim chi pha̱mathāhaida mathasek eina leisai.

²⁶Chiwui thili ana shokluishitta ali maphākhamei manglā shini thanungda shim chili ungpamma. Chieina mipā chiwui khare mirinli khanaowa mirin china zakshimeikharhaowa.”

²⁷ Ana hi hāngmahunglakha yaruilungwui eina sha̱nao akhana panglāk eina vaoda ali hānga, “Nali pharākakhui kala nganaokakhuiva̱ chi sokhami ngasāranu!”

²⁸ Kha Jishuna ngahānkai, “Varewui tui nganākhuida chi khamayonbing sokhami ngasāranu.”

²⁹ Mi chungsangmamān kaji eina Jishuna yirphoka, “Thot hi makaphā thotna; thot hina machut phai, kha Jonahwui machut chi maningla machut khangatei mamimara.

³⁰Kaja Jonahna Nineveh mibingwui machut akha khangasā thada miwui Naomayarana thot hiwui machut sāra.

³¹ Bichar sathanghon Azingshongwui Philava̱na thot hiwui mibingli ngasoda anganingrumda athumli khayon mira; kaja sha̱nao china Solomonwui thangkhamei nganā khavai okathui akatangawui eina rai. Kha yanglu, Solomonli reikhameia akha hili lei.

³² Ninevehwui mibingna thot hili ngasoda bichar sāthanghon anganingrumda athumli khayon mira; kaja athumna Jonahna paokhamathā hākashok chi khuisangda ningkhangatei samphanga, kala yanglu, Jonahli reikhameia akha hili leili.

³³ “Mi khipānakha thaomei sharkāhailaga pongrunli mahaimana lah luk eina makhumhaimana; kha rākazangabingna kahor chi theikhavai meishongli hai.

³⁴ Namikna naphasāwui thaomei na, namik makhamathing tharan naphasāla tangmangting haowa.

³⁵Chiwui vang eina nawuili khalei kahor chi matangmanghai khavai ningngasharlu.

³⁶Naphasā tongtingda tangkhamang maleilakla kahorna pemtinghaiakha thaohmeiwui kahorna horrorkhami thada horchamrihaora.”

³⁷ Jishuna matuikup kahaiwui thili Pharisee akhana phazāt rāngarummi khavai hoi. Chieina Jishuna vāda aphazāngaruma.

³⁸ Jishuna phazā khavai rida pāng makhamazik chi Phariseepā china theilaga matakhakhai.

³⁹ Chieina Prohona ali hānga, “Arui nathum Phariseebingna tengkot eina khongpheiwui ayar pheokhaninga, kha nawui alungliva kākharām kala makaphā-makhayāna pemtinghai.

⁴⁰Mangkhama̱bing! ayar kasaa china alungla kasā maningmalā?

⁴¹ Kha alungli khalei chi kachāmabingli milu, chithākha nathumwui vang ot saikora thara.

⁴² Kha Phariseebing, nathum kakhanang ringkashi ngasāranu, kaja nathumna suirihan, sāchikom kala hanthothāpwui tithe milaga mashunkasā eina Varewui leikashiliva mahengsangmana; kha khangatateibingla mayansānghaila hibing hi nathum sāphalungki kajina.

⁴³ “Phariseebing! nathum kakhanang ringkashi ngasāranu! kaja nathumna synagogueli khayākakāpam kala leihngapha̱li khayākashiwui shālam ningchanga.

⁴⁴ Nathum kakhanang ringkashi ngasāranu! Kaja nathum hiya mibingna matheimada naiung-naivā kaje makatheia chikhur kathāna.”

⁴⁵Ain kathemabingwui ngachaili akhana ali ngahānkai, “Ojā, hi kahāng hiya nana ithumli khayak khangasakna.”

⁴⁶ Kha Jishuna ngahānkai, “Ain kathemabing, nathumla kakhanang ringkashi ngasāranu! kaja nathumna mibingli maphungkhararra ot chiphuna, kha nathum khalattana kharita ot chili pāngmarengnao einala masāza̱mana.

⁴⁷ Nathum kakhanang ringkashi ngasāranu! kaja nathumna marānbingwui chikhur sakāmi, kha athumli navā ngarāna shaokathatna.

⁴⁸Chieina nathum hiya navā ngarāwui otsak chili khamayābing kala shākhi khamibingna. Kaja athumna shaothata kala nathumna chikhur sāmi.

⁴⁹ Chiwui vang eina Varewui thangmei china hānga, ‘Ina marānbing eina paokazatbing athumwuili shivātvāra, athumna kaikhali shaothatra kala kaikhali rekharekra.’

⁵⁰Chiya, okathui haokaphokwui eina thuilaga marān saikorawui ashee tākahai chiwui vang mithot hili kashong rāngra.

⁵¹ Abelwui eina thuilaga Zechariah tāshungda hanphutpam eina tharkhamathengpamwui ngachaili shaothat kahaiwui vang mithot hili kashong rāngra. Mha, ina nathumli kahāngna, athumwui vang mithot hili tandi mira.

⁵² “Ain kathembing, nathum kakhanang ringkashi ngasāranu! kaja nathumna theishingkakhui aworwui sho khuithuihaida, nathum khalattala kazangla mazang kala zangkida khaleibinglila haphaowa.”

⁵³ Apam chiwui eina Jishuna zatkathui eina ain kathemabing eina Phariseebingna ali panglāk eina ngayātlaga apong tarākhali khangahānla sai

⁵⁴kala ana khayon tui khamatui rimkhuilaga tukkhui khavai khalenla sanga.