Read Tangkhul Naga LUKE 12 Bible Online

LUKE 12 - Tangkhul Naga bible

LUKE 12

¹ Mi thingthing rākazipta mi akhana akhali naiza̱ ngarokta leilakha, Jishuna rimeikapta awui sākhangatha̱bingli hānga, “Phariseebingwui khawok makazang phākakhaning chili ningngasharlu.

² Maphongshoki kaji faror kahai khikha maleimana lah matheiki kaji ngathum kahaila maleimana.

³Nathumna ngayā tangkhamangli khangazek chi ngashun kahor atamli shāsera kala ngathumda shimlung kāli saisaida hāngkasang chila shimtungwui eina vaomalānra.”

⁴ “Itao ngarā, ina nathumli kahāngna, phasāli shaothatshaplaga chiwui thili khikha masākhararbing chili mangacheealu.

⁵ Kha khipāli ngacheerakhala kaji ina chitheira; chiya, shaothathailaga meifali horsangkashapwui pangshap khalei a chili ngacheelu, mha, ina nathumli kahāngna, ali ngacheelu.

⁶“Konghi phangāli pheisā khani eina mayormalā? Chithālala Varewui miktāli athum akhalila yangkhei kahai mavaimana.

⁷ Nathumwui kuisam eina tangda shānkahaina, mangacheealu; konghi kachungkhali nathum aman sakmeikhara.

⁸“Ina nathumli kahāngna, kachikathāna ili mibingwui mangāli phongshar eina hāngphatakha, miwui Naomayaranala ali Varewui kazingraobingwui mangāli phongshar eina hāngphatra,

⁹ kha mibingwui mangāli ili kākhalan mi chili Varewui kazingraobingwui mangāli inala khalanra.

¹⁰ “Miwui Naomayarawuitungli makhamayā tui khamatui saikora pheomira, kha Manglā Katharali kachipata chili mapheomimara.

¹¹ “Athumna nathumli synagogueli, khamungabing kala khangam khareibingwui mangāli shimen khavā tharan nathumna kathada khi ngahānkārakhala lah khi hāngrakhala da malungmaringalu;

¹²kaja Manglā Katharana nathumli atam chichangli nathumna hāngkhangayi chi tamchitheimira.”

¹³Yarui ngachaiwui eina mi akhana ali hānga, “Ojā, ishāvāna haimi kahai shimlui chi ilila ngayarmi khavai ishameili kahāngmilu.”

¹⁴Kha Jishuna ali hānga, “Mayara, nani khaniwuitungli bicharwo kala ngayarme sākhavai ili khipāna kapangsanghaikhala?”

¹⁵ Chieina ana athumli hānglui. “Ningkhariklu kala khangamarli ningngasharlu; kaja mikumo akhawui mirin hi awui lan tarākha khalei chili khalei maningmana.”

¹⁶Ana chānjam akha hānga, “Kashānga akhawui luili heiun tarākha unga;

¹⁷kala akhalatta chukmaja̱ya, ‘Iwui heiun hi kazip khavai apam maleithura, kathāusikhala?’

¹⁸Chieina akhalatta phaninga, ‘Ina hithada sāra; ina iwui chum pheihailaga hakkhamei akha sākhuira; kala chili iwui mā kala thongthāngbing kazipra.

¹⁹Chiwui thili ina imanglāli hāngra, Manglā, nana zingkum shirakha shichin khavai khamathā ot kachungkha chi kazipsanghaira, leiyālak eina okthuilu, zālu, manglu kala ringphākhuilu.’

²⁰ Kha Varena ali hānga, ‘Mangkhama̱a! Arui ngayā nawui manglā khuithuihaora’ chithākha ana kazip kahai lan saikora chi khipāwui ngasārakhala?”

²¹Chi tākam eina akhalattawui vang lan tarākha kazipsanghailaga Varewui miktāli makashāng mi chi chithai” da Jishuna hānga.

²² Chieina Jishuna awui sākhangatha̱bingli hānga, “Chiwui vang eina ina nathumli kahāngna, nathumwui mirinli khi zāra, naphasāwui vang khi ngavaira da malung maringalu.

²³Kaja mirinna kashakazāli mataimei kala phasāna kashankachonli mataimei.

²⁴ Vānaobingli machukyanglu, athum khayaola mayaomana, kahātla mahātkhuimana, athumna kazip khavai shimla, chumla maleimana, chithālala Varena athumli mizai. Nathumna vānaobingli kayākha sakmataimeikhala?

²⁵Kala nathumwui ngachaili khipāna malungringhaowada awui mirin okthot khuiningkha mataisangkhuishapkhala?

²⁶Nathumna chikathā kateowa ot chi masārarlaga khiwui vang eina khangatei otbingwui vang malungringkhala?

²⁷ Timrāwonbingna kathada rarsangkhala da machukyanglu; athum otla masāmana, sakla masāmana, vatla mashireimana, chithālala ina nathumli kahāngna, Solomonna hekmaheilak eina okthuilala awon akhawui khamathayakkha mangavaimana.

²⁸Kha aja luili wonlaga akhama meili horsanghaoki kaje awonrongbingli Varena chiyākha mathada samiakha nali ana kayākha mataimeida samirakhala? Oh, shitkasang khangazanbing!

²⁹Chieina nathumna khi zāra, khi mangrakhala da maphaalu lah malung maringalu.

³⁰ Kaja okathuiwui yur saikorana hikathā otbing hi phai; kha nathumna otbing hi leingayiphalunga da nathumwui Avāna theisera.

³¹Kha awui wungram pharifalu, chithākha ot saikora nathumli ngarumsangmira.

³² “Mangacheealu, he kateowa ashangva̱ kaja wungram chi nathumli khami hi nathumwui Avāva̱wui ringkaphāna.

³³ Nathumwui khalalei lan yorhaolu kala kathai-kachāmbingli milu; nathum khalatta kakān makhavai pheisākhao sākhuilu kala nathumwui lan chi kakānla mavailuiki kaji kazingramli phārihailu. Chili khalenala maleethuirarmara kala magungnala mazāmara,

³⁴kaja nathumwui lan khaleipamli nathumwui ningla leira.

³⁵ “Kharārā kachiva̱li ngasung khavai shaksākhariklu kala thaomei sharkāhailu.

³⁶Akhavāna ngalā shakazāwui eina shimli hankhaung ngaraikapam raobing thada sālu, chithākha ana ungda khamongli kakakung chitharan athumna heng sāda shomira.

³⁷ Akhavāna latkhaung tharan ningkharikta honpamkasā raobing ka̱lā mahai; kachangkhat ina nathumli kahāngna, ana shāneira̱ neikhuilaga athumli tableli pamngasakra, kala rāda sheba samira.

³⁸Ana rākakhanelila, rākakathumalila ningkharikta rimpamkasā raobing ka̱lā mahai.

³⁹ Kha hi theikazaklu kaja shimva̱ china khale china katharān rāra̱khala da theisāsi kaja ana mipā chili rimpamda khale chili awui shim makaizang ngasakmara.

⁴⁰Chieina nathumla ngarānpinghailu; kaja nathumna maphaningkasā pung chili miwui Naomayara rāra.”

⁴¹Peterna hānga, “Proho, chānjam hi ithumli kahāngkā mi saikorawui vangkhala?”

⁴² Chieina Prohona ngahānkai, “Chithākha atam horzakta kashakazā ngayarmi khavai shimvana pangshap horsangmi kapai ningkhamazinga kala chukhamaja̱ khalei kashina chi khipākhala?

⁴³Shimva̱ china shimli hankhaung tharan ngarakzak eina sākasā rao chi ka̱lā mahai.

⁴⁴Kachangkhat eina ina nathumli kahāngna, shimva̱ china rao chili awui khalalei lan saikorawui kashina sāngasakra.

⁴⁵Kha rao china khalatta ‘Iwui akhavā maungfamara’ da phaninglaga rao mayarnaolila, rao sha̱naolila, kashaola shaoda amāng phāshak phazāpamda marippamakha

⁴⁶rao china maphaningkasa zimiksho kala makathei pungli akhavā china hanungda ali tandi mida mashitkasangbingna kapam apamli haihaora.

⁴⁷ “Akhavāwui ningkachāng chi thatheilaga chi sākhavai makhangarāna kala akhavāwui ningkachāng athishurda makasā rao chi lijei shaira.

⁴⁸Kha akhavāwui ningkachāng makatheiwui vang khalāng ot sākahai a china tandi samphanglala teomeira, kachungkha mikahai mi kachiva̱wui eina kachungkha khuishokpapamra kala chungmeida chisin kahaipawui eina chungmeida pora.

⁴⁹ “Ina okathui hi mei sa̱tā khavai kharāna kala mei chi chuiphokhaira̱sasi kaja teokha phāralā!

⁵⁰ Kha ina ra̱hikphalungki kaji akha lei kala chi makupkhuiranglakha ining chotlakli!

⁵¹ Ina kharā hi okathuili chingri kahai mikhavai kharāna, da nathumna phaninglā? Maningmana, chingri kahai mikhavai kharā maningmana, kha ngakaikhai khavai kharāna,

⁵²kaja hiwui eina thuida shimkhur akhali mi phangā khalei chi kaira, kathumna khanili kala khanina kathumli mamayāngarokmara.

⁵³Shimkhur chi kaingarokta avāva̱na anaomayarali, anaomayarana avāva̱li, ava̱va̱na anaongalāva̱li, anaongalāva̱na ava̱va̱li, aniva̱na arihāva̱li, arihāva̱na aniva̱li mamayā ngarokmara.”

⁵⁴ Jishuna mi kachungkha chili hānga, “Nathumna zingtunshong muiyā kashing chitharan hengsāda, ‘kazing roki jiura’ da hānga; kala rokachanga,

⁵⁵kala azingshong masi kaphan tharan nathumna ‘kazing kāngmaranglakra’ da hānga, kala chithada shokpapama.

⁵⁶Phākakhaningbing! nathumna okathuili kala khamasaili kashok chi yanglaga zingyatwui pongli hāngshapa; kha khiwui vang eina aruihon atamwui kakhalat mahāngmirarthukhala?

⁵⁷ “Khi sāda khamashung khangarong ot sākhavai nathumna khalatta bichar masāthukhala?

⁵⁸Nathumli kaphenapāli ngasoda kārotli vākida zatlakha ali chamnā khavai shongfali hotnālu. Chi maningakha ana nali bicharwoli shimenvāra kala bicharwona nali kārotwui kashina akhavā akhawui pāngli horsangmida ana nali phātopli sangra.

⁵⁹Ina nathumli kahāngna, nathumna shongrān chi marunngakanranglakha eina tangda nathumli mashok ngasakmara.”