Read Tangkhul Naga LUKE 13 Bible Online

LUKE 13 - Tangkhul Naga bible

LUKE 13

¹Chitharan Galileewui mi kaikhawui ashee Pilatena pha̱kaphayāli manatmi kahaiwui pongli mi kaikhana Jishuli rāhānga.

²Chieina athumli hānga, “Shaothat kahai Galileenaobing hina khangatei Galileenaobingli morei phungmei kahaiwui vang chithada kachotkachang samkaphangna da nathum phaninglā?

³Maningphutmana! Ina nathumli kahāngna, nathumla ning mangateiakha chithada shimānra.

⁴Lha Siloamli dolanshim tektāda tākthat kahai mi tharāda chishat chi aja Jerusalemli panda khalei mibingli yonmeikhara da nathum phaninglā?

⁵Maningphutmana! Ina kahāngna kaja nathumla ning mangateiakha chithada shimānra.”

⁶ Chieina ana chānjam akhala hāngchithei, “Mi akhana awui yāmguili khaorārong akha lingsanghai, kala athei aphākhavai khavā eina athei akhala masamphangthuwa.

⁷ Chieina ana yāmgui khamayonapā chili hānga, ‘Yanglu, kum kathum ina khaorārong hiwui athei phākhui khavai rāchinga, kha akhala maphākhuilakranga. Hi ta̱tekhaolu! Khi kannāda hina ngalei hiyākha sāshimān ngasakrakhala?’

⁸Kha yāmgui khamayonana ngahānkai, ‘Amei ajakumāng haisāsa, ina arong hili kuimareida chuilaga hār sangmira.

⁹Chiwui thili zingkuma athei matheiakha phālakhaira, kha kalikha mamatheisaakha ta̱tekhainaolu.’”

¹⁰Jishuna sabbaththang synagogue akhali tamchitheida leisai.

¹¹Apam chili zingkum tharāda chishat kameoraih kazā kahai sha̱nao akha leisai; Ava khum tekhaida ngatartei eina manganingrarmana.

¹²Jishuna ali kathei tharan ali hokhuida hānga, “He sha̱nao, nali nawui kazātwui eina chihomihaira.”

¹³Ana awuitungli pāng parza̱ya, chieina ngalāngda ngatartei nganingkāda Vareli masot chikata.

¹⁴Kha Synagoguewui akhavā china sabbaththang Jishuna raikhamiwui vang malungvāthaoda mibingli hānga, “Ot sākhavai zimiksho tharukthang lei, chiwui alungli rālu kala rāraikhuilu kha sabbaththang marālu.”

¹⁵ Chieina Prohona ngahānkai, “Phākakhaningbing! Nathumna sabbaththang nathumwui sei lah gadhā seishimwui eina chihomilaga tara̱ shimān khavai mahomvāmala?

¹⁶ Chithākha Abrahamwui naongalāva̱ kashokva̱li Satanna kum tharāda chishat narkahaiwui eina sabbaththang machihomingayimala?”

¹⁷Ana hi kahāng eina awui yangkashebing saikora khayaklakhaowa; kala mi saikorana ana matakhak kahai ot sākahai chiwui vang mathāna.

¹⁸ Chieina ana hānga, “Vare wungram hi khi eina ngaraichākhala? Khili ngaheosikhala?

¹⁹Hiya mi akhana kayānghanthā apā akha khuida awui yāmguili yaohailaga chi haksangda arong khangasā eina yongkazata vānaobingna aphāngbingli athip rākasā kathāna.”

²⁰ Ana hāngluishita, “Vare wungram hi ina khili ngaheosikhala?

²¹Hiya sha̱nao akhana khawok ari khuilaga phazāt kathumwui angarakli manāthailaga katonga chi makapchungranglakha eina tangda haikahai kathāna.”

²²Jishuna keinung kala kha̱ kachiva̱li tamchitheimamānda Jerusalemli vai.

²³ Chitharan kachikathā mi akhana ali rāngahāna, “Ojā mi kateokhamāng kahui samphangrala?” Jishuna ngahānkai,

²⁴“Nathumna khamasha̱ khamong eina zangkhavai hotnālu, khiwui vangkhala kaja mi kachungkhana chili zangkhavai hotnāra kha mazangrarmara.

²⁵Shimva̱na ngakarthuilaga akhashida khamong ta̱kkahai tharan nathumna kayāngli nganingda khamong kakunglaga, ‘Amei, ithumli shomilu’ da hāngra. Chieina ana nathumli ‘Nathum kachiwui eina kharākhala, I matheimana’ da ngahānkāra.

²⁶Chitharan nathumna ngahānkāra, ‘Ithum nali ngasoda phāshak phazāruma; ithumwui keinunglila nana rātamchithei.’

²⁷Kha ana, ‘Ina kahāngna, nathum kachiwui eina kharākhala da I matheimana; iwui eina thulu, He makaphā makhayā ot kasābing’ da hāngra.

²⁸ Nathumna Vare wungramli Abraham, Isaac, Jacob kala marān saikora kathei tharan, kha nathumliva horshok kahai tharan nathumna kachapla chapta ahāla tarira.

²⁹Kala mibingna zingsho, zingtun, ato, azewui eina rāda Vare wungramwui nitreili rāzangra.

³⁰ Chieina yanglu, riki kaje kaikhana naora, naoki kaje kaikhana rira.”

³¹Atam chichangli Pharisee kaikhana ali rāhānga, “Na apam hiwui eina zatthuimihaolu kaja Herodna nali shaothatngailak eina leili.”

³² Chieina Jishuna ngahānkai, “Vālu kala ramfa chili ahānglu; ‘Yanglu, ina ajala, akhamala, chipeeli kashamshokra kala kakazāla raimira kala kakathumthang ina sāki kaji ot sākupra.

³³Chithālala ina vāphalungki kaji chili ajala, akhamala kala khanaothangla vāphalungra kaja marān akhala Jerusalemli maningla apam khangateili mashimānpaimana.

³⁴ “Iyavo, Jerusalem! Jerusalem! Marānbingli shaokathata keinung, kala nali chihokharābingli lunggui eina horkathata! Ina nawui naongarabingli harva̱na anaobingli angachangzingli kazipkakhui thada kayākhashira, laga chi nana mamayāmana!

³⁵ Yanglu, nathumwui shim choda haimihaira kala ina nathumli kahāngna, nathumna ‘Prohowui mingli kharā mi chi sokhami ngasāranu’ da mahāngranglakha eina tangda nathumna ili matheiluimara.”