Read Tangkhul Naga LUKE 14 Bible Online

LUKE 14 - Tangkhul Naga bible

LUKE 14

¹ Sabbaththang Jishuna Phariseebingwui kathāna akhawui shimli aphazā khavai khavā tharan mibingna ali yangpama.

²Yanglu, suichung kakazā mayarnao akha awui mangāli leisai.

³ Chieina Jishuna ain kathembing eina Phariseebingli ngahāna, “Sabbaththang kakazā raikhami hi ainwui athishurda sāpaikā, masāpaimakhala?”

⁴Kha athumna khikha mangahānkāmana. Chieina Jishuna ali singkhuida raimihaowa kala shiunhaowa.

⁵ Ana athumli hānga, “Nathumwui ngachaili kachikathāna naomayara lah mukvā leilaga khorjopli tāzanghaiakha sabbaththang ngalāngda makhuishokmarala?”

⁶Kha hiwui pongli athumna mangahānkārarthuwa.

⁷Khaleilaga phakazāli kharā mi kaikhana mathāmeikap kaji pam kakapang Jishuna thei. Chiwui vang chānjam hi athum saikorali hānga,

⁸ “Nali kachikathā mi akhana shakazāwui phanitli kaho tharan khangam khareipamli mapamalu, kaja nali ngamkhamei mili ana hohaisāpai;

⁹kala nani khaninili kahopā china nali, ‘Mipa hili pam chikāmihaolu’ da rākahāng eina nala zakshikhamei apamli apamkida khayakhaora.

¹⁰Kha nali kaho tharan zakkashi apamli apamlu, chithākha kaho akhavā china kharā tharan nali ‘Itao, mathākhamei pamvāk apamsa’ da rāhāngpai. Chitharan nali ngasoda phazākharumbingwui mangāli nali maiyā ngasaka.

¹¹ Kaja khalatta hakkakhuiya mi chili teongasakra kala khalatta teoda kaphaninga mi chili khayā kāngasakra.”

¹² Chiwui thili Jishuna shimva̱ chilila hānga, “Nana ngathor phazātli nilala, ngazin phazātli nilala, phāchizātka jiakha nawui ngasotnaobingli nilala, nachināngarāli nilala, athei-asābingli nilala, kashānga khongnainaobingli nilala mahoalu, kaja athumnala nali hokhuida nana sāmi kahai chi runhaipai.

¹³ Kha nana phākachizāt tharan kathai kachāmbing, khangazanbing, pheikatekbing, khangapeobingli holu.

¹⁴Chithākha nali somira; khiwui vangkhala kaja athumna nali marunrarmara. Kha mashunkasā mibingna ringshokthanghon nali Varena runmira.”

¹⁵ Phazākharumbingwui ngachaili akhana tui hi kashā tharan Jishuli hānga, “Vare wungramli phazārumki kaji mi chi sokhami ngasāranu!”

¹⁶ Kha Jishuna ali hānga, “Atam akhali mi akhana zātkhān kahaka akha sāda mi kachungkhali hoi.

¹⁷Phazāranhaira kaji eina ana hokahaibing chili ‘Rālu, saikora ngarānkupserhaira’ da aho khavai awui raoli chihovai.

¹⁸Kha athum akhala, akhala marā khavai apong phāhaowa. Kharepana ali hānga, ‘I lui akha lohaida lei, chieina chi mavākhayang masāpaimarali, kashi masāmilu’ da poi.

¹⁹Khangatei akhana hānga, ‘Ina mukvā churā phangā lohaida lei, chi arāk khavai kazatna, chieina kashi masāmilu!’

²⁰ Khangatei akhanala hānga, ‘I ngalā shakzākhuichamda lei, chiwui vang eina I marārarmarali.’

²¹“Chieina rao china latungda ali kahāng saikora chi awui akhavāli unghāngsera. Pao kashā eina shimva̱ malungvātlakhaowa. Chieina araoli hānga, ‘Thakta keinungwui shongrei-shongrāli vāda kachāmbing, khangazanbing, khangapeobing kala katekabingli ahokhuilu.’

²²Rao china hānga, ‘Amei, nana kaso kahai chi sāserhaira, kha aruila mi kachungkha zangpaifarali.’

²³Chieina akhavā china raopā chili hānglui, ‘Shongkhar kala khoreipam kachiva̱li vālu kala chili leikasāsā mibingli tandi eina rāngasaklu, chithākha iwui shim hi chipempaira.

²⁴Ina kahāngna kaja hokahaibingwui ngachaili mi khipānakha iwui zātkhān hili khamazap masamphangluimara.’”

²⁵Atam akhali Jishuli mi kachungkha shurkazat tharan ana ngareiungda athumli hānga,

²⁶“Ili kharā mi kachiva̱na ava̱ avā, preiva̱, naongarā, achināngarā, azarva̱ ngara kala khalattawui mirinli mahorhairarakha, a iwui sākhangatha̱ masāpaimana.

²⁷ Kachikathāna akhalattawui krush maphungla ithi shurraakha a iwui sākhangatha̱ masāpaimana.

²⁸“Nathumwui ngachaili kachikathā akhana shim khamathā akha sākhuira da phaningakha rimeikapta aman kayākha sha̱kha zangra kala shim chi sākhuishap lupā kayākha leili da mangachākmarala?

²⁹Chi maningakha shim chi shimphungmāng sāhunhailaga makupkhuikharar tharan mibingna chi theida ali mana̱shida hāngra,

³⁰‘Mipa hiya shim sāphokkhaninghailaga makupkhuitheithura.’

³¹Lha awunga khipana raimi thingtharā thānlaga raimi thingmaga̱ kathāna awungali kathada ngasungsikhala da pamzangda mamachukmarakhala?

³²Mararmara jiakha akhapā chi katāva̱li leilakha ana paophunga chihovāda mashit khavai ahāng ngasakra.

³³Chithada sāda kachikathāna awui khalalei saikora mahorhairarakha iwui sākhangatha̱ masāpaimana.

³⁴ “Machi hi phālaka; kha machiwui katum shimānhaiakha, kathada tumngasakluipairakhala?

³⁵Chikathā machi chi ngaleiwui vangla hār sādala shikachin makannāthuda thada horhaowa. Khanā kakaa mi china shākhuiranu!”