Read Tangkhul Naga LUKE 16 Bible Online

LUKE 16 - Tangkhul Naga bible

LUKE 16

¹Anala awui sākhangatha̱bingli hānga, “Atam akhali kashānga mi akhawui lan kasinga mi akha leisai. Ana akhavāwui lan leimamāngli sāshimānmihaoda awuitungli kaphen leihaowa.

²Chieina ana lansina chili hokhuida ngahāna, ‘Nawuitungli kaphen hi khikhala? Nawui lansin saikorawui hishap khuirālu, kaja na aja eina thuilaga lansina masāluipaimara.’

³Chieina lansina china akhalatta hānga, ‘Kathāusido? Iwui akhavāna ili lansinpam eina khuishokhaora jihaira! Pangshap maleithuda tin singda otla masārarmarali, kala pokazāla khayakrali.

⁴Ili lansinpam hiwui eina khuishok kahai tharan mibingna ili athumwuili shimzun sākhavai kathada sāsikhala kaji theihaira.’

⁵Chieina akhavāwui leiman kazangbing ava̱va̱li hokhuida khare chili ngahāna, ‘Nana iwui akhavāli kayākha shukhaili?’

⁶Ana ngahānkai ‘Thao tin shākha shukhaida lei.’ Chieina ana ali hānga, ‘Lairik kapi kahai chi khuilu kala thākta pamzanglaga hangphangāna da kapilu.’

⁷Chiwui thili khangatei akhali ngahāna, ‘Nana kayākha shukhaida lei?’ Ana ‘Kehu tin shākha shukhaili’ da ngahānkai. Chieina ali hānga, ‘Lairik kapi kahai chi khuilu kala hangchishatna da kapilu.’

⁸ “Akhavā china ningmakathar lansinawui arah kathem chiwui vang soi kaja okathui hiwui mibingna athumwui thotliva kahorwui naobingli thangmeimeikhara.”

⁹ Kala ina nathumli kahāngna, “Nathum khalatta makathar okathuiwui lan eina ngasotnao phākhui, chithākha lan chi shimān kahai tharan athumna nathumli makashimānpamli zangngasakra.

¹⁰ Kateowa otli ningkhamazing mi china kahaka otlila ningmazinga, kala kateowa otli ningmakathar mi chi kahaka otlila ning matharmana.

¹¹Chieina nathumna okathuiwui lanli ningtharda masārarakha nathumli khipāna khamashunga lan chi horsangmingairakhala?

¹²Kala nathumna kateiwui otli ningmazingda masingmirarakha nathum khalattawui lan chi khipāna nathumli mirakhala?

¹³ “Rao akhana akhavā khanili otram mangatha̱paimana; kaja ana akhali yangkharinglaga akhapali leishira, maningakha akhali mashitlaga akhapāli ningkachaira. Nathumna Vare eina okathuiwui lanli otram mangatha̱rumpaimana.”

¹⁴Lupāli khangamara Phariseebingna tui hi shālaga Jishuli mana̱shiya.

¹⁵ Kha ana athumli hānga, “Mibingwui miktāli nathum khalatta mashungkhui khavai sāzata, kha Varena nathumwui wuklung theisera, kaja mibingwui miktāli khamathāna da kakhui hiya Varewui miktāli ningkakachaiya otna.

¹⁶“Ain kala marānbingwui tui chi Ra̱hikme Johnwui thot eina tangda leisai, chiwui thili Vare wungramwui paokaphā hi hāshokphoka; kala mi kachiva̱na chili nganurzanga.

¹⁷Kha Ainwui tui sampārikkha sākakhailiva kazing eina okathui shimān kahaina paimei.

¹⁸ “Preiva̱li pānghailaga khangatei akhali kakhui kachiva̱ phokaphāna, kala gaharali pāngkahaiva̱ sha̱nao chili khangakuma mi chila phokaphāna.

¹⁹“Atam akhali kashānga mengchin kahai kashankachon khangavai kala thangkachida hekmaheilak eina phāshak phazākapam mi akha leisai.

²⁰Awui ngaveili Lazarus kaho chāmlak kahai kala ngapharhok kahai mi akha leisai.

²¹Ana kashāngpawui zāneng tātung kahai chi ngamuizāngaiya; chili lāngda fanala awui khangaphār chi rāmaleklek ji.

²² “Khaleilaga kachāma chi thihaowa kala kazingraobingna ali Abrahamwui makāli khuikai. Kashānga chila thihaida chifahaowa;

²³kala kazeiramli chotlakhaoda ana yangkai kala Lazarusna Abrahamwui makāli kapam chi tālāk eina ngashānthei.

²⁴Chieina ana hānga, ‘Avā Abraham, ili khalumashanmilu kala Lazarusli awui pāngmarengnao chi tara̱ simkhuilaga imale hili kharāmakuimi ngasak khavai chihotāmilu kaja I meilung hili chotnāhaira.’

²⁵ “Kha Abrahamna hānga, ‘Inaomayara, phaningunglu, kaja na ringda leilakha khamathāthāmāng samphanga kala Lazarusva zakkashimāng samphanga; kha ara nana kachot samkaphang tharan ana hili ringkaphā samphangda lei.

²⁶Chili langmeikharda nathum eina ithumwui marakli chāngam akha lei, hiwui eina nathumli vākhangaibingna mavāpaimana kala nathumwui eina hili kāka kajebingnala makāpaimana.’

²⁷Chieina ana hānga, ‘Avā, chithākha ali ishāvāwui shimli kashiunmilu;

²⁸kaja ichināngara phangā lei, athumnala kachotkachāngpam hili marā khavai unghāngmachinmi ngasaklu.’

²⁹ “Kha Abrahamna hānga, ‘Athumli hāngmachinmi khavai Moses eina marānbing leida lei: athumna athumwui tui nganāranu.’

³⁰ Chieina ana ngahānkai. ‘Maningmana avā Abraham, kachikathā akhana kathiwui eina unglaga athumli unghāngakha ning ngateira.’

³¹Abrahamna ali hānga, ‘Athumna Moses eina marānbingwui tui manganaakha kachikathā kathiwui eina ringshokta unghānglala makhuisangmara.’”