Read Tangkhul Naga LUKE 17 Bible Online

LUKE 17 - Tangkhul Naga bible

LUKE 17

¹ Chiwui thili Jishuna awui sākhangatha̱bingli hānga, “Morei sākhavai kasui kachungkha rāra, kha kasui rākhangasakpā chili kakhanang ringkashi ngasāranu.

²Khangazanbingli morei sāngasaki kachiliva akahungli lungriham hokthāngmihailaga ngayilungli horsang kahaina awui vang phāmei.

³ Nathumwui ot kasāli ningngasharlu! “Nachināna yonhaiakha ali hāngmachinlu kala ana ning ngateiakha pheomilu:

⁴kala ana nawuitungli khayon ot thangkhali shini shida sāhaiakha, kala shini shida ‘I yonhaira’ da ning ngateiakha nana ali pheomiphalungra.”

⁵ Paokazatbing china Proholi hānga, “Ithumwui shitkasang mataisang ngasakmilu.”

⁶Chieina Prohona hānga, “Nathumwui shitkasang kayānghanthārikha leisi kaja hikathā khaorārong hili ‘Angayung eina phurkhuilaga ngayilungli aphorlu’ da nathumna hāngshapra kala chinala nathumwui kahāng nganāra.

⁷“Nathumwui ngachaili khipāna rao akha ngavālaga ana luili vālaga lah yao ahomlaga shimli hankhaung eina ‘thākta ungphāzaulu’ da hangra?

⁸ Chiwui mahutle nana ‘Iwui zākhavai ngarānlu kala sāri shaksākharikkhuida ina maphāshak maphazākhuiranglakha eina tangda otram ngatha̱lu kala chiwui thili nana phāshak phazāpaira’ da mahangmarala?

⁹Rao china awui kakaso sāhaowa da ali ningkashi mimaraola?

¹⁰Chi tākam eina nathumli kaso kahai saikora sākup kahai tharan ‘Ithum khikha masā khavai raobingna; ithumna ithumwui angalang chimāng sākahaina’” da hānglu.

¹¹ Jishuna Jerusalemli vākhavai Samaria eina Galileewui amarakli akāna.

¹² Ana kha̱lung akhali zanguki kaji eina phārrei kakazā mayarnao tharā ngarokta athumna lachāhamsam nganingda,

¹³ panglāk eina vaoda hānga, “Amei Jishu, ithumli khalumashanmilu.”

¹⁴ Jishuna athumli kathei eina hānga, “Zatulu, kala nathum khalattana pāngmonbingli achitheilu.” Athumna zatmamānlakha athumli tharmihaowa.

¹⁵Athumwui ngachaili akhana ali tharmihaira kaji kathei eina panglāk eina vaoda Vareli masot chikatlaga latunga.

¹⁶Kala Jishuwui pheizingli ngakhumshāmzangda ningkashi tarākha miya. Mipā hi Samarianaona.

¹⁷Chieina Jishuna ngahāna, “Mi tharāli tharkhami maningmalā? Athum chiko chi kali vāhao?

¹⁸Miyur khangateipa hi maningla khangatei akhala Vareli masot chikat khavai malatungthulā?”

¹⁹ Chieina ali hānga, “Ngakarthuilu, kala nashi shimli ungulu, nawui shitkasang china nali tharchao ngasakhaira.”

²⁰ Pharisee kaikhana Jishuli Vare wungram katharān rārakhala da khangahān eina athumli ana ngahānkai, “Vare wungram chi mik eina yangkhuikapai machut eina rāki kaji maningmana.

²¹Khipānakha ‘Yanglu, hili leili, chili leili’ da mahāngmara; kaja yanglu, Vare wungram chi nathumwui alungli lei.”

²² Chiwui thili ana awui sākhangatha̱bingli hānga, “Nathumna miwui Naomayarawui atam chi thangkhamāngla theingailala matheirarki kaji zimiksho rārāsāra.

²³ Chitharan nathumli, ‘Hivāk, chivāk’ da hāngra kha mayāmhaialu, chikathāli kashurla mashuralu.

²⁴ Kaja rikhān khangashei tharan achikun akhawui eina achikun akhali horkhavā thada miwui Naomayarana awui zimiksholi chithada rāra.

²⁵ Kha rimeikapta ana kachot kachāng kachungkha phungphalungra kala thot hina ali makhuisangmara.

²⁶ Noahwui atamli kashok thada miwui Naomayarawui atamlila shokra.

²⁷Noahna marikhong kātongkhuida tara̱ phongshilongda ot saikora mashimānranglakha eina tangda athumna phāshak phazāpama, ngalā khuipama, fathuipama.

²⁸Lotwui atamlila chi tākam eina sāsai—athumna phāshak phāzai, khalola loi, khayorla yora, luila vai, shimla sai,

²⁹Kha Lotna Sodomwui eina shokthanghon kazingramwui eina meiwon eina raichiri rotāda athum saikorali shimān ngasaka.

³⁰miwui Naomayarali phongmithanghon chi tākam eina shokra.

³¹ “Chithanghon shimtungli leikasā china shimlungli haikahai awui thongthāng chi mazangkhuiaranu, chi tākam eina luili leikasā chinala mahanungaranu.

³² Lotwui preiva̱li phaningunglu!

³³ Kharing samphang khavai kaphā mi chi shimānra, kha chi kashimāna chili ringngasakra.

³⁴ Ina nathumli kahāngna, chithanghon ngayā pet akhali mi khani pisāra, akhali khuithuihaora, akhapāli nothāhaora;

³⁵sha̱nao khani mā rungsāra, akhali khuithuihaora, akhapāva̱li nothāhaora;

³⁶luili mayarnao khani ot sārumsāra, akhali khuithuihaora, akhapāli nothāhaora.

³⁷ Chieina sākhangatha̱bingna ali ngahāna, “Proho, kalikhala?” Jishuna ngahānkai, “Kathingun khaleipamli khalāng sāshaiala rākazipra.”