Read Tangkhul Naga LUKE 18 Bible Online

LUKE 18 - Tangkhul Naga bible

LUKE 18

¹ Jishuna athumli atam kachida seihā sāching khavai kala ning masuitā khavai chānjam akha hāngchithei.

²Ana hānga, “Kachikathā keinung akhali Vareli makhangacheea kala milila mautkashita bicharwo akha leisai.

³Keinung chili ‘Mashun bichar sāmida khamashunga tuitak tāmilu’ da ali rāhāngching kaje rameinao akhala leisai.

⁴Atam kasāngkhawui vang ana mamayāmana, kha naolak eina akhalatta chukmaja̱laga hānga, ‘Ina Vareli mangacheesālala kala mikumoli mautshitsālala

⁵rameiva̱ hina sheikhautlakli, chiwui vang eina mashun bichar chi ina sāmihaora. Chi maningakha thangkachida ana rākahāng hina ning koktarāklakhaora.’”

⁶ Chieina Prohona hānglui, “Makhangaronga bichawona khi hāngkhala kaji nganālu.

⁷ Chithākha ngashun ngayā mateila ngachonmi khavai chapta kapo awui kapangkhui kahai miyurli Varena mashun bichar masāmimaralā; ana ngarainganaoralā?

⁸Ina nathumli kahāngna, ana thaklāk eina mashun bichar sāmira. Chithāmāngmada miwui Naomayarana rāthanghon shitkasanga mi okathui hili leisaralā?”

⁹Khalatta khamashungana da kaphaninga kala mi saikorali machāpkhame athumlila Jishuna chānjam hi hāngchithei:

¹⁰“Atam akhali mi khani khorumshimli seihā sākhavai vai, akhana Phariseena kala akhapāna khāshinā khalokana.

¹¹ “Phariseepā china kha-lāchāda anganinglaga hithada seihā sai, ‘O Varivara, ina nali ningshilaka kaja iva mi khangatei thada ngaponkazā, ning makathar, phokaphā lah khāshinā khalokapā kathā maningmana.

¹² Ina haptākhali khanishida khuma, kala samkaphang saikorawui tithebing michinga.’

¹³“Kha khāshinā khaloka china achithek akhali nganinglaga kazingramshongla mayangkalengla amathikli kapheda, ‘He Varivara, morei kaphunga ili khalumashanmilu’ da poi.”

¹⁴ Ina nathumli kahāngna, “Phariseepā maningla khāshinā khalokapāna pheokhami samphangda shimli hanunghaowa; kaja khalatta hakkakhui mi kachiva̱li teongasakra kala khalatta kateowana da kaphaninga mi chili hakngasakra.”

¹⁵ Kachikathā mi kaikhana Jishuwui ngalemli angangnaobingli ana pāng parrormi khavai khuirai; kala chi sākhangatha̱bingna kathei tharan athumli khararra.

¹⁶Kha Jishuna athumli hokhuida hānga, “Naoshinaobingli iwui ngalemli rāngasaklu, athumli mahaphaialu; kaja Vare wungram chi athum kathāwuina.

¹⁷Kachangkhat eina ina nathumli kahāngna, naoshinao thada Vare wungram hi makhuikasanga mi china kachilikha chili mazangrarlakmara.”

¹⁸ Chiwui thili Jihudiwui kathāna akhana Jishuli rāngahāna, “Kaphā Ojā, makashimān kharing samphang khavai ina khi sārakhala.”

¹⁹Jishuna ngahānkai, “Ili khisāda kaphā hokhala? Vare maningla kaphā khipākha maleimana.

²⁰ Ningkhami chi nana thei: ‘maphophāpaimana, mashaothatpaimana, maleepaimana, minama shākhi mamipaimana, nava̱ navāli khayāshilu.’”

²¹Chieina ana ngahānkai, “Ina saikora hi nganuilakhawui eina thuida mayonrā kahaina.”

²² Jishuna chi kashā eina ali hānga, “Nawui khavāt akha leifaya. Nawui khalalei saikora yorhailaga kachāmnaoli yaohaolu, chithākha kazingramli nawui lan leira, laga rālu, ithi shurlu.”

²³Ana hi kashā tharan wukhananglakhaowa, kaja a kashānga mi akhana.

²⁴ Jishuna ali yangkālaga hānga, “Lan kachungkha khaleinaobingwui vang Vare wungramli zangkida kayākha sakrakhala?

²⁵Kaja, kashānga mina Vare wungramli zangki kachiliva utna kapimkhurli ngara̱kashokna paimei.”

²⁶Hi kashā mibingna ngahānna, “Chithākha khipā kahui samphangrakhala?”

²⁷ Kha ana ngahānkai, “Mibingwui vang masākapai chi Varewui vanga sāpaisera.”

²⁸ Chieina Peterna hānga, “Yanglu, ithumwui shim horhailaga ithum nathi shurhaira.”

²⁹Jishuna hānga, “Kachangkhat eina ina nathumli kahāngna, Vare wungramwui vang shimlui nilala, preiva̱ nilala, achinā ngarā nilala, ava̱ avā nilala, naongarā nilala horhaida zatthui kahai mi china

³⁰aruihonwui thotli mataimeikharda rārāda khalei thotli makashimān kharing masamphangki kaji khipākha maleimana.”

³¹ Jishuna tharāda khani chili ngateida hokhuilaga hānga, “Nganālu, ithum Jerusalemli vāra kala marānbingna miwui Naomayarawui pongli kapi kahai saikora chi ungshung ngasaksera.

³²Kaja ali miyur khangateibingwui pāngli horsangmihaida athumna ali mana̱kashila mana̱shira, kakhayakla khayak ngasakra kala machora̱la mashorrorra.

³³Athumna khangaphitla ngaphitta shaothatra, kha kakathumathang ana ringshokra.”

³⁴Hāngda khalei tui chi sākhangatha̱bingna akhala bhap matāmana; tui chiwui kakhalat chi athumwui eina ngathummihaoda Jishuna khi kahāngkhala da matheikhuirarthuwa.

³⁵ Jishuna Jericho vāshungnanai khangapeoa mi akha shongfapheili zāt popamsai.

³⁶Ana mi kachungkha rakakānwui akhon kashā tharan, “Khi kasākhala?” da ngahānna.

³⁷Athumna ali ngahānkai, “Nazarethwui Jishu rārāda lei.”

³⁸Chieina ana, “Davidwui naomayara Jishu, ili khalumashanmilu.” da vaowa.

³⁹Awui ngalemli khanganinga mi kaikhana kasainakha pamlu da kahara, kha ana juimei pangmeida “Davidwui Naomayara, ili khalumashanmilu” da vaolui.

⁴⁰Chieina Jishuna ngasāmda khangapeowa chi awuili khuirā khavai kasoi, kala ana rākhanganai tharan ali ngahānna,

⁴¹“Nawui vang ili khi sāmilu jikhala?” “Proho, imik theingasakmilu” da ngahānkai.

⁴² Chieina Jishuna ali hānga, “Theihaoranu! Nawui shitkasang china nali theingasakhaira.”

⁴³Chieina ana ngalāngda kathei samphangda Vareli masot chikatta athi shurthuwa; kala mi saikorana chi kathei tharan Vareli masochikata.