Read Tangkhul Naga LUKE 19 Bible Online

LUKE 19 - Tangkhul Naga bible

LUKE 19

¹ Jishuna Jericholi azangda keinung chi akāna.

²Keinung chili Zacchaeus kaho mi akha leisai. A khāshinā khaloka akhavāna kala shānglaka.

³Ana Jishu chi kachipākhala da theikhavai ngarāna. Kha akho kasha̱ mi sāhaoda yaruilungli anganinglala Jishuli matheirarthuwa.

⁴Chieina Jishuna rāki kaji shongfali rida ana ngasamvai kala ali yangkhuipai khavai sycamorerong akhali vākai.

⁵Jishuna apam chili rākashung eina yangkāda hānga, “Zacchaeus, thākta tunglu, aja nawui shimli ngasāmkhuiphalungra.”

⁶Chieina ana totot tunglaga Jishuli mathanthathup samphangkhui.

⁷ Mi saikorana chi kathei tharan athumna, “Ana morei kaphunga mi akhawui shimli azangra jihaira” da kapumkaseoda matuisera.

⁸ Zacchaeusna nganingkāda Proholi hānga, “Nganāmilu, Ojā! Iwui khalalei lan ngakaipakta kachāmabingli mira, kala ina kachikathā akhali kateizāhaisaakha akhum mati mataida ali hanmira.”

⁹ Chieina Jishuna ali hānga, “Mipā hila Abrahamwui ara̱-azā ngasahaoda aja shimkhur hili huikhami rāshunghaira.

¹⁰Kaja miwui Naomayarana shimān kahaibingli phākhuida huimi khavai kharāna.”

¹¹ Mibingna tui chi nganāmahungda leilakha Jishuna athumli chānjam akhala hāngchithei. Chitharan a Jerusalem vāshungnanaihairasai kala mibingna Vare wungram chi thākta rāra da phaningsai.

¹² Chieina ana hānga, “Atam akhali khangama akha ngalei katāva̱ akhali vālaga awungawui pangshap samphangda shim hanung khavai khangarān sāsai.

¹³Ana mazatphokranglakha awui rao tharāli hokhui kala athum avāva̱li lupā akharip milaga, ‘I mahanungranglakha hi eina leih sāsālu’ da hānga.

¹⁴Kha aramnaobingna ali yangkharinghaoda a zatthui kahaiwui thili, ‘Ithumwuitungli mipā hina khamung maningchāngmana’ da ahāng khavai minganin chihovai.

¹⁵Mipā china awungawui pangshap samphangda hankhaung tharan heng sāda ana lupā mikahai raobing chili athumna kayākha tongkhuikhala da theikhui khavai rāserlu da kasoi.

¹⁶Khare china awuili rāda, ‘Amei, nawui lupā chieina tharā tongkhui’ da hānga.

¹⁷ Chieina ali hānga, ‘Phālakhaira! kaphā rao! Nana kateowa otli ningmazinglak eina kasāwui vang nana keinung tharāwui akhava sāra’

¹⁸Kakhane chinala, ‘Amei, nawui lupā chi eina lupā phangā tongkhui’ da rāhānga.

¹⁹Chieina ali hānga, ‘Nana keinung phangāwui akhavā sāra.’

²⁰“Chiwui thili khangatei akhanala rāhānga, ‘Amei, hi ina chonsakainao akhali romtitlaga haikahai nawui lupā china;

²¹kaja nali ngacheelaka, khiwui vangkhala kaja na sākashe mina; nawui makhaning chila nana khui, nana makhayao chila nana hātkhuiya.’

²²Ana ali hānga, ‘He makaphā rao! Ina nali nawui chanhān tākam eina bichar sāra. Nana I sākashena, iwui makhaning chi kakhuia kala makhayao chi hātkakhuiana da thei jihaira!

²³Chithākha khi sāda hankhaungli iwui lupā chi atar zangda samphang khavai lupā kazip khavaili masanghaithukhala?’

²⁴“Ana chiwui ngalemli khanganingbingli hānga, ‘Lupā chi awui eina khuida lupā tharā kasingapāli mihaolu.’

²⁵Kha athumna hānga, ‘Amei, awui lupā thara leilagavā?’

²⁶ Ina nathumli kahāngna, khaleia mi kachiva̱li chungmeida mirorra, kha makhaleia mi chiwui eina awui kateokha khalei chila khuithuihaora.

²⁷Athumwuitungli ili mamung ngasak khangaia yangkashebing chiva hili khuirāda iwui miktāli shaothathaolu.’”

²⁸ Jishuna hi hānghailaga athumli rida Jerusalem vākhavai zathaowa.

²⁹ Ana Olive kaphungli khalei Bethphage eina Bethanyli vāshungnanai tharan awui sākhangatha̱ khanili chihovāda hānga,

³⁰“Mangāshong khalei kha̱ chili vālu kala nanina chili kazang eina mina matonglakrang kaji gadhānao akha hokhaisāra; chi akhalākhuilaga hili khuiunglu.

³¹Nanili kachikathāna ‘Khiwuivang khala?’ da ngahānakha ‘Prohona sāvai khavai lei’ da ngahānkālu.”

³² Chieina kachihopā khani china vāhaowa kala ana hāngkahai tākam eina samphanga.

³³Anina gadhānao chi khalāmahunglakha akhavā china ngahāna, “Khiwuivang eina kakhalākhala?”

³⁴ Chieina anina, “Prohona ot sākhavai lei” da ngahānkai.

³⁵Anina chi Jishuli khuiungmi kala gadhānao chiwuitungli athumwui kachon hamihailaga Jishuli kātong ngasaka.

³⁶ Ana tongzatmamānlakha mibingna athumwui kachon shongfali hamizata.

³⁷Ana Jerusalem vāshungnanai Olive kaphungwui atun katā vākashung chitharan athi shurkazata mi saikorana ringphākhaihaowa kala athumli hakkhamahā ot kachungkha theikhangasakwui vang panglāk eina vaoda Vareli masot chikatta hānga,

³⁸ “Proho mingli kharā awungali ka̱lā mahairanu! Kazingramli chingrihairanu kala juikhamataiyali tekmateirānu.”

³⁹ Chieina yaruili zatrumkasā Pharisee kaikhana Jishuli hānga, “Ojā, nawui sākhangatha̱bingli hāngmachinlu!”

⁴⁰Ana ngahānkai, “Ina nathumli kahāngna, athum chingri eina pamhailala lungguibingna vaoshokra.”

⁴¹ Ana vānganaimeida keinung chi akathei tharan keinung chiwui vang khanangda chaplaga hānga,

⁴²“Chingri kahai hi kachiwui eina kharākhala da nathumna aja theisāsi kaja jong! Kha ara chila nathumwui eina thumihaira,

⁴³ kaja nathumwuitungli ka̱lākashi atam chi rārāsāra, chitharan nathumwui yangkashebingna raipan sālaga rākuinamhaora kala achithek kachiva̱wui eina muirāra.

⁴⁴ Athumna nathumli kala ngaveilungli leikasā naongarā saikora shimān ngasakra; lunggui akhawuitungli lunggui akhala maleiluimara, kachiwui vangkhala kaja Varena nali huikida kharā atam nana matheimana.”

⁴⁵ Chiwui thili ana khorumshimli azanga kala ot khayorabingli kashamkhayangda hānga,

⁴⁶“Hithada kapihaida lei: ‘Iwui shim hi seihā sākhavai shim hora’ kha nathumna hi pha̱ma̱kashaobingwui shim sāngasakhaira.”

⁴⁷ Kala thangkachida ana khorumshimli tamchitheichinga, kha pāngmon akhokabing, Ain kathembing kala kathānabingna ali shimān ngasakida apong phai.

⁴⁸Thālala apong akhala masamphangthuwa kaja mi saikorana awui tamkachithei chi ningsanglak eina nganāngaichinghaowa.