Read Tangkhul Naga LUKE 2 Bible Online

LUKE 2 - Tangkhul Naga bible

LUKE 2

¹ Chitharan Caesar Augustusna Rome shorkarwui azingli khalei mi mashing shānkhuilu da hukhum sai.

²Hi mishān kharena; kala chitharan Quiriniusna Syriawui governor sāsai.

³Mi saikora mishānli zangkhavai kachichāramli ungsera.

⁴ Josephla Galileeli khalei Nazareth keinungwui eina Judeali khalei Bethlehem kaho Davidwui keinung chili vai, kachiwui vangkhala kaja Joseph hi Davidwui naotunna.

⁵Awui khām kahaiva̱ Maryli ngasoda ming chankhavai khavā tharan Mary nao vaisai.

⁶Ani apam chili leilakha Marywui naosak atam ungshunghaowa.

⁷Kala awui naochizai mayarnao akha pharai kala ali naokhalui eina khaluilaga sigui khongsaili chipethai, khiwui vangkhala kaja kha̱ chili ani shimzun mangarinthuwa.

⁸Ngalei chili yaokahomabingna luili athumwui yao ashangva̱ ngayāshong mayonpisai.

⁹ Athumwui ngalemli Prohowui kazingrao akha rāda Prohowui tekhamatei hingpik kahai china athumli kuimareida hora kala athum ngacheelakhaowa.

¹⁰Chieina athumli kazingrao china hānga, “Mangacheealu, kaja yanglu, mi saikorawui vang ringphākhailak kahai paokhamathā ina nathumli khuirākhamina.

¹¹ Aja Davidwui keinungli nathumwui vang Huikhame akha pharāhaira, ava Proho Khristana.

¹² Hina nathumwui vang machut akha ngasāra kaja nathumna angangnao akha naokhalui eina khaluilaga sigui khongsaili chipet kahai samphangra.”

¹³Kashuirak eina kazingrao chili ngasoda kazingramwui rao tarākha rāda Vareli masochikatta hānga;

¹⁴ “Juimeikap kaje Vareli tekmateiranu, kala okathuili ana ningyāngkhaunga mibingwui alungli chingrihairanu.”

¹⁵Kazingraobing china athumwui eina thuihaida kazingli latung kahai tharan, yaokahomabing chi akha eina akha ngazek ngarokta hānga, “Ithum Bethlehemli vāusa, kala Prohona ithumli chitheikhami shokkahai otshot chi vāyangsa.”

¹⁶Chieina athumna thaklāk eina vāda Mary eina Joseph kala sigui khongsaili chipet kahai angangnao chili vāsamphanga.

¹⁷Athumna nao chi kathei eina kazingraona angangnao chiwui maramli hāngmi kahai chi hāngchithei.

¹⁸Yaokahombingwui tui chi kashā saikora matakhakhai.

¹⁹ Kha Maryna ot saikora chi machuklaga awui wuklungli tipsanghai.

²⁰Yaokahombing china athumwui theikakhui shākakhui saikora chiwui vang Vareli tekmatei khangasak eina ngasoda masochikatta latunghaowa. Kaja chi athumli hānghairasai.

²¹ Zimiksho chishatthangwui thili angangnao chili ahui rimkashok tharan ali Jishu phoka, aming hi ava̱va̱na ali mavairanglakha kazingraona phoklu da hāngmi kahaina.

²² Moseswui Ain athishurda pheomatharkhami atam ungkashung tharan anina nao chi Prohowui mangāli chigat khavai Jerusalemli khuikai.

²³ Kaja Prohowui ainli hithada kapihai, “Naochizai mayarnao kachiva̱ Proholi tharchigatphalungra.”

²⁴Kala Prohowui ainli kaso kahai pha̱phayā khavai nasha̱ khani lah khana̱ khanila khuiphunga.

²⁵ Chitharan Simeon kaho mayarnao akha Jerusalemli leisai, a khamashung-khangarong, shitkasang khangazipa Israelli makarkhami honkapama kala Manglā Katharana ngasokhame mina.

²⁶Prohowui Khrista chi matheiranglakha eina tangda a mathimara da Manglā Katharana phongmihairasai.

²⁷Manglāna thānkhami mangā eina ana khorumshimli rai, kala angangnao Jishuli ainwui khangachā athishurda sāmi khavai ava̱ eina avāva̱na khorumshimli khuikakā tharan,

²⁸Simeonna ali vamkhuida Vareli sochikatta hānga,

²⁹“Proho, ara naraoli chingri eina thuingasakmihaolu, Nawui tuingashit athishurda;

³⁰ Kaja imik eina theihaira nawui huikhami chi.

³¹Hi nana ngarān kahaina, miyur saikorawui mangāli,

³² Hi nawui kaphaning Gentilebingli phongshokmi khavai kahorna, kala nawui miyur Israel tekmatei khavaina.”

³³Angangnao chiwui pongli kahāng chi shālaga ava̱ eina avāva̱ matakhakhaowa;

³⁴kala Simeonna somida ava̱va̱ Maryli hānga, “Yanglu, angangnao hi Israel kachungkha konglui khavai kala ngakarthui khavai, kala hānghaikasawui khudam sāda kapangkhui kahaina

³⁵(raighai akhana namanglālila tophutshokra) Chieina kachungkhawui ngathum kahai kaphaning phongmira.”

³⁶ Ashershi shangli Phanuelwui naongalāva̱ Anna kahova̱ marān akha leisai, a sarhairasai kala fathuida zingkum shinimang agaharali ngasopama,

³⁷kala kum hangchishata mati kakā eina tangda ra̱meipama. Ana ngashun ngayā mateila kakhumla khum, seihāla sāda Vareli khorumlaga khorumshimwui eina mathuilakmana.

³⁸Ana atam chichangli khorumshimli kāda Vareli ningkashi mi kala Jerusalemli ngatangkhami honda khalei saikorali nao chiwui pongli hāngchithei.

³⁹Prohowui ain athishurda athumna ot saikora sākup kahai eina Galileeli khalei athumwui keinung Nazarethli latunghaowa.

⁴⁰ Nao chi rarsangmamānda kapangla pangsanga, aworla pemtinghaowa kala Varewui khalum chi awuitungli lei.

⁴¹ Ava̱ eina avāva̱na kum kachida Makānkhami phanit Jerusalemli azangchinga.

⁴²Jishuna kum tharāda khani kākashung eina khangachā athishurda phanitli azanga.

⁴³Phanitpei athumna latkhaung tharan nao Jishuva Jerusalemli pamsanghaowa. Chi ava̱ eina avā matheisāthuwa.

⁴⁴Kha yaruili ngasozatta leira da phaninghaoda thangkhawui shongzā zatkahaiwui thili athei-asābing eina ngasotnaobingwuili ngathingvai;

⁴⁵masamkaphang eina anina ali phākhavai Jerusalemli latvai.

⁴⁶Zimiksho kakathumathang Jishuna khorumshimli ojābingwui ngachaili pamda athumwui tuila nganā kala khangahānla sāda leikasā chi athei.

⁴⁷Awui theishingkakhui kala ngahānkakā kashā mi saikorana matakhakhai.

⁴⁸ Anina ali kathei eina matakhakhaida ava̱va̱na ali hānga, “Inao nava khi kasāniji? Yanglu, navā iniva malung tātungnanai nali phāhaira.”

⁴⁹Chieina ana ngahānkai, “Nanina ili phākazat kathakahaini ji? I iwui Avāwui shimli pamra kaji nani matheithulā?”

⁵⁰Ana kahāng tui chi anina bhap matārarthuwa.

⁵¹ Chiwui thili anili ngasophungda Nazarethli latungda ana aniwui kahāng nganai kala ot saikora hi ava̱va̱na wuklungli tipsanghai.

⁵² Jishuna aworla, pha̱sakla mataisangmamānda Varenala mikumonala lumkālaka.