Read Tangkhul Naga LUKE 20 Bible Online

LUKE 20 - Tangkhul Naga bible

LUKE 20

¹ Thangkha Jishuna khorumshimli tamchitheida pao hāshokta leilakha pāngmon akhokabing eina ain kathemabingna hangva̱naobingli ngasoda rai,

² kala ali hānga, “Hāngmilu, nana khipāwui pangshap eina hi kasākhala, lah nali khipāna pangshap hi mikhala?”

³Jishuna ngahānkai, “Ina nathumli khangahān akha sāga, hāngmilu,

⁴Johnwui ra̱hikkhamiwui pangshap hi kazingramwui einakā, miwui einakhala?”

⁵Chieina athum akha eina akha kasupta ngazek ngaroka, “Ithumna ‘Kazingramwui einana’ jiakha, ana khisāda ali mashitsangthukhala? jira;

⁶ ‘Miwui einana’ jisa, mibingna ithumli ngalung eina horthathaora; kaja John hi marān akhana kaji athum saikorana mayāchao kahaina.”

⁷Chieina athumna kachiwui eina kharākhala matheimana da ngahānkai.

⁸Chieina Jishuna athumli hānga, “Chithākha inala khiwui pangshap eina ot saikora hi kasākhala da mahangmara.”

⁹ Chiwui thili Jishuna mibingli chānjam akha hāngchithei, “Mi akhana drakhā yāmgui akha sai kala chi drakhā yāmgui khavā mi akhali masā ngasakhailaga atam kasāngkhawui vang kha̱ram vāhaowa.

¹⁰Atam ungkashung tharan khamasābingli amasātman akhui khavai awui rao akha chihovai. Kha khamasābing china ali shaomihailaga khamasai eina shiunhaowa.

¹¹Ana khangatei rao akhala shivātlui, kha alila athumna shaoda khayaklak eina sāmihailaga khamasai eina shiunluihaowa.

¹²Chithālala kakathuma rao akha chihovāluishita, alila khama za̱mihailaga ayarli horshokhaowa.

¹³Chiwui thili drakhā yāmguiwui akhavā china hānga, ‘Khi kasāna phameinikhala! Iwui khaluma naomayarali chihovāra; kachangkhat athumna aliva khayāshira.’

¹⁴Kha drakhā yāmgui khavābingna ali kathei tharan athum akha eina akha ngazek ngarokta hānga, ‘Shimluikatpa chi hina, ali shaothathaosa; chithākha shimlui chi ithumwui ngasāpaira.’

¹⁵Chieina athumna ali drakhā yāmguiwui ayarli shimenshoklaga shaothathaowa. Chithākha yāmgui chiwui akhavāna athumli khi sāmaraokhala?

¹⁶ “Ana rālaga khamasābing saikora chili sāthatserhaora kala yāmgui chi mi kateibingli masā ngasakhaora.” Mibingna chi kashā eina “Chi Varena mamayāmana” da hānga.

¹⁷ Kha Jishuna athumli yanglaga hānga, “Chithākha kapi kahai hi khikhala? ‘Shim kasānaobingna horkahai lunggui china achithekwui khamakhoka ngalung ngasāhaira.’

¹⁸Lunggui chiwuitungli kongluikazang kachiva̱ akha̱-akhā ngasāra, lunggui china kachikathāli takkharor tharan chifa ngasāda chaiyānghaora.”

¹⁹ Ain kathembing eina pāngmon akhokabingna pung chichangli Jishuli tukkhuingai, khikhalajila ana chānjam kahāng chi athumli kahāngna da athumna thei, kha athumna mibingli ngacheehaowa.

²⁰ Chieina athumna atam kachā chi rimpama kala kachikathā kaikhali pheizā mida khamashung-khangarong sārek ngasaklaga Jishuna khayontui matuiakha tukkhuilaga khamunga pangshap khaleiya Governorwui pāngli horsangmi khavai mi chihovai.

²¹ Chieina athumna ali ngahānna, “Ojā, na khamashung-khangarong tui matuida tamchithei kaji ithumna thei, kala khipālikha mijang masāla Varewui apongli mashungrik eina tamchithei.

²²Caesarli khāshinā khami hi mingayikā mamingayimakhala?”

²³Kha athumwui mareimarā chi theilaga athumli hānga,

²⁴“Ili lupāsā akha chitheilu; chili khipāwui azak kala khipāwui aming kapihailikhala?” Athumna “Caesarwuina” da ngahānkai.

²⁵ Ana athumli hānga, “Chithākha Caesarwui chi Caesarli milu, kala Varewui chi Vareli milu.”

²⁶Chieina athumna mibingwui mangāli ana kahāng tui chiwui lungli khayon matukkhuirarthuwa. Kha awui ngahānkakā chili matakhakhaida kasainakha pamhaowa.

²⁷ Ringkhalui kaho maleimana da kahānga Sadducee kaikha awuili rai,

²⁸ kala ali rāngahāna, “Ojā, ‘Achinā akhana ngalā khuilaga nao mapharāla apreiva̱ horhaida thihaiakha agatona preiva̱ chi ngakumphalungra kala awui vang nao pharākhuiphalungra da Mosesna ithumwui vang kapimihai.’

²⁹Atam akhali chinaongarā shini leisai, khararra china ngalā khuilaga nao maleila thihaowa.

³⁰Kakhanenala chithai,

³¹kakathumana preiva̱ chili ngakumlui, chithada sāda athum shini chi nao maleilakla thiserhaowa.

³²Chiwui thili preiva̱ chila thihaowa.

³³Chithākha, ringkhalui atamli sha̱naopava̱ chi khipāwui preiva̱ sārakhala? Kaja shini china ali ngakumsera.”

³⁴Chieina Jishuna athumli ngahānkai, “Mithot hiwui naobingna ngalāla khui kala fakathuila fathui,

³⁵kha ringkhaluili kala rāki kaji okthotli zangkhangayibing chiva ngalā makhuiluimana, fakathuila mafathuiluimana.

³⁶Athum mathiluimara, khikhalajila athum ringkhaluiwui naobing ngasāhaoda kazingraobingli ngaraichai kala Varewui naobing ngasāhaowa.

³⁷ Kha Mosesna kathebing ringluishithaora kaji hi khangapoma thingrongli mei kachui chili ana Proholi Abrahamwui, Jacobwui kala Isaacwui Varena da kaho china chitheimihaira.

³⁸Chithākha a kathewui Vare maningmana kha kharingawui Varena; kaja saikora awuili kharingna.”

³⁹ Chieina ain kathembing kaikhana, “Ojā nana mathālak eina ngahānkāmihaira” da hānga.

⁴⁰ Kaja athumna khangatei mangahānlengluithuwa.

⁴¹ Kha Jishuna athumli hānga, “Kathada athumna Khrista hi Davidwui Naomayarana da hangpairakhala?

⁴²Kaja David khalattana Laa lairikli hānga: ‘Prohona iwui Proholi hānga, Iwui yāshong pamlu,

⁴³nawui yangkashebingli Ina nawui pheinai masāngasakranglakha eina tangda.’

⁴⁴Chithada sāda Davidna ali ‘Proho’ hoi; chithākha kathada awui naomayara ngasāpaira̱khala?”

⁴⁵ Mibing saikorana nganāmahungda leilakha sākhangatha̱bingli hānga,

⁴⁶“Katuma phahon ngavailaga yaothuizatkhangaiya kala leihngapha̱lungli khayāshilak eina shālam sāngasakkhangaibing kala synagogueli mathāmeikap kaji pam kala zātkhān kasāli khayākakāpam kaphābing,

⁴⁷rāmeinaobingwui lan khangaponbing kala sāchithei khavai seihā kasangsang sākharekabingli ningngasharlu. Athum hakkhamei khonshāt samphangra.”