Read Tangkhul Naga LUKE 21 Bible Online

LUKE 21 - Tangkhul Naga bible

LUKE 21

¹ Jishuna munlak eina yanga kala kashāngabingna khorumshimwui lupā sangkhavai okoli athumwui kachigat kasang chi thei.

²Kala kachāma ra̱meinao akhana pheisā khani kasang chila thei.

³Chieina ana hānga, “Kachangkhat eina ina nathumli kahāngna, kachāma rameiva̱ hina athum saikorali chungmeida sanghaira.

⁴Kaja athumna athumwui kachungkha khalei chiwui eina chigata, kha rameiva̱na awui makhalei tungli awui ringkhavai khalei katonga chi mikahaina.”

⁵ Sākhangatha̱ kaikhana khorumshim hi ngalung khamathāthā kala Vareli kachigat otbingna kayākha mathā ngasakhala kajiwui pongli matui mahungda leilakha, Jishuna hānga,

⁶ “Nathumna theida khalei, ngalung akhawuitungli ngalung akha maleiluiki kaji atam rārāli; ngalung kachiva̱ phukshoklaga horkathānserhaora.”

⁷ Chieina athumna ali ngahānna, “Ojā, hi katharan shokrakhala kala atam chi ungshungrārāli kajiwui machut katharakhala?”

⁸ Chieina ana hānga, “Nathumli mathānngui khavai ning ngasharlu; kaja mi kachungkhana iwui ming singda rālaga ‘I ana’ kala ‘Atam chi nganailakhaira’ da hāngra. Chithālala athumwui thi mashurlakalu.

⁹Nathumna raipao kashā tharan machipāhaialu; kaja chi shokriphalungra, kha khangachang atam chi hengsāda marāfamara.”

¹⁰ Chiwui thili ana athumli hānglui, “Yur akhana akhawuitungli, wungram akhana wungram akhawuitungli rai sāra;

¹¹chitharan neina̱ panglāk eina khanukra kala apam kachungkhali chāmrei eina mao rāra; matakhak kahai kala khangachee machut kachungkha kazingramwui eina shokra.

¹² Kha saikora hi mashokranglakha athumna nathumli tukkhuida rekhareklaga synagogueli khuivāra kala phātoplila sangra kala nathumli iwui mingwui vang eina awungabing eina governorbingwui mangāli nganing khavai khuivāra.

¹³ Hi shākhi mikhavai nathumwui vang kachā atamna.

¹⁴ Chiwui vang eina nawui ningli ina kathada ngahānkārakhala da rida machukmaja̱mara da phaninglu;

¹⁵kaja ina nathumli matuikatheila, thangkhameila mida nathumwui yangkashe khipānakha nathumna kahāng chili ngateida makhalatkhuirarmara kala mamashungmana dala mahāngrarmara.

¹⁶ Nathumli nava̱ navā ngarānala, nachinā ngarānala, athei-asānala yansaira kala nathum kaikhali sākathatla sāthathaora.

¹⁷ Nathumli imingwui vang mi saikorana ningkachaira.

¹⁸ Kha nathumwui sampānao akha eina tangda mashimān ngasakmara.

¹⁹ Nathumwui khāngkathei china nathumwui manglā kharing samphangra.

²⁰ “Kha Jerusalemli raimina kuikhanam tharan kashimān atam nganaiura da theilu,

²¹chitharan Judeali leikasābingna kaphungli yāmvāranu; keinunglungli leikasābingna yāmshokranu, kala luili vākahaibingna keinungli mahanungluiaranu.

²²Kaja kathara lairikli kapi kahai tui chi ungshung khavai athut kakhui atamna.

²³ Iyavo! chitharan nao vaikasābing kala na̱ shimanda leikasāva̱bingli lumashan! Kaja okathuili chotchanglak kahai rāra kala Varewui tandi mibing hiwuitungli tāshungra.

²⁴ Athum kaikhali raighai eina shātthatra, khangateibingli narkahai rao sāda yur saikorali khuivāra; kala yur khangateibingna Jerusalemwuitungli naikazamra.”

²⁵ “Zimik, kachāng, sirā saikorali matakhak kahai kachungkha shokra, kala shamadruwui tara̱ khangaphaokhon shāda khangachee eina okathuili pa̱khangapāwui kachotkachāng rāra.

²⁶Okathuili rāshoki kaji chi phaningpamda mibingna khangachee eina ning shimānra; kaja, kazingramwui pangshapbing nganuk ngasakra.

²⁷ Chiwui thili athumna miwui Naomayarana hakkhamahā pangshap kala tekhamatei eina ngasoda muiyā tongda kharā theira.

²⁸ Chieina otshotbing hi shokkaphok tharan nathumwui kui khāngkāda yanglu, khikhalajila nathumwui ngatangkhami atam chi nganailakhaira.”

²⁹ Jishuna athumli chānjam akhala hāngchithei; “Khaorārong kala thingrong saikorali yanglu;

³⁰thingnā shonkhaleoda mayo kachāng nganaiura da nathum khalattana thei.

³¹Chithada sāda nathumna otshotbing shokkaphok tharan Vare wungram nganaiura da theira.

³² “Kachangkhat eina nathumli kahāngna, ot saikora hi mashokserranglakha thot hi mashimānmara.

³³ Kazingram eina okathuila shimānhaora kha iwui tuiva kachilikha mashimānmara.

³⁴ “Ngasharda rimpamlu! Okathui hiwui lumkhalao, khamarip kala mirinwui vang kaphaning china nathum khalattali mayui ngasakalu, atam chi kashuirak eina khale thada rārāsāpaishina.

³⁵Kaja hi okathuili khalei saikorawuitungli rāra.

³⁶ Kha atam kachida ningngasharlu kaja rashokki kaji ot saikora hiwui eina yāmshokshap khavai kala miwui Naomayarawui mangāli nganingshap khavai seihā sāchinglu.”

³⁷ Thangkachida Jishuna ngashun khorumshimli tamchithei, kha ngayā kachida ana Olive phungreili vathuihaowa.

³⁸Kala ngathorthak mi saikorana awui tui nganā khavai khorumshimli rā-rā ji.