Read Tangkhul Naga LUKE 22 Bible Online

LUKE 22 - Tangkhul Naga bible

LUKE 22

¹ Chitharan Khawok-makazang Khamuiwui phanit, Makānkhami phanit kaho chi nganaiuwa.

²Chieina pāngmon akhokabing eina ain kathembingna ali kathada sāthatsikhala da apong phai, kaja athumna mibingli ngacheehaowa.

³Satanna tharāda khaniwui ngachaili Iscariotla kaho Judaswuili rāzanghaowa.

⁴Chieina Judasna zatthuihailaga pāngmon akhokabing eina shipai akhavābingli kathada Jishuli yorsangmipairakhala kajiwui apongli angazeka.

⁵ Athum ringphāhaoda lupāla mira da mayāngaroka.

⁶Ana mayāhaoda mibingli mathei ngasakla athumwui pāngli horsangmi khavai atam kachā phai.

⁷ Khawok makazanga Khamuiwui Phanitli Makānkhami zātkhānwui yaonao taithat khavai zimiksho chi ungshunghaowa.

⁸ Jishuna Peter eina Johnli chihovāda hānga, “Vaulu, laga ithum zākhavai Makānkhamiwui zātkhān angarānlu.”

⁹“Apam kachili nana inili angarānlu kajikhala” da anina ngahānna.

¹⁰Ana ngahānkai, “Yanglu, nanina keinungli akazang tharan mayarnao akhana tara̱ham phunglaga nanili ngarokra, ana akazang shim chili shurvālu,

¹¹kala shimva̱ chili, ‘Ojāna nali awui sākhangatha̱bingli ngasoda Makānkhamiwui zātkhān zākhavai kā chi kali leikhala ji’ da hānglu.

¹²Ana nanili mathāng khamatoli sāmathakharik kahai kahaka kā chi chitheira, chili ngarānlu.”

¹³Ani vāhaowa kala ana hāngkahai tākam eina samphangda Makānkhami zātkhān chi apam chili angarānhai.

¹⁴ Phazāt atam ungkashung eina ana paokazatbingli ngasoda phazā khavai pama.

¹⁵ Ana athumli hānga, “Ina kachotkachāng maphungranglakha nathumli ngasoda Makānkhamiwui zātkhān hi phazārumngailaka.

¹⁶ Ina nathumli kahāngna, kaja hi Vare wungramli maungshungranglakha eina tangda ina hi mazāluimara.”

¹⁷ Chiwui thili ana tengkot khuida ningkashi mihailaga athumli hānga, “Hi khuida nathum ngayarmanglu;

¹⁸ kaja ina nathumli kahāngna, chiya aruiwui eina thuida Vare wungram marāranglakha eina tangda ina drakhāra̱ mamangluimara.”

¹⁹ Chiwui thili ana khamui khuida ningkashi mijang kahai eina serkhailaga athumli mida hānga, “Hi iwui asāna, nathumwui vang mikahaina. Ili phaningungda hi sāchinglu.”

²⁰Kharewui tākam eina shaikup kahai tharan tengkot chi athumli mida hānga, “Nathumwui vang heishokmi kahai tengkot iwui ashee eina sākahai kadhara tuingashitna.

²¹ “Kha yanglu, ili yorzaki kaje mipa chi ili ngasoda phazārumda lei.

²²Kaja miwui Naomayarana Varena ngarān kahai chiwui athishurda thira kha ali yorkazāpa chili kakhanang ringkashi ngasāranu.”

²³Chieina athum khalatta athumwui ngachaili khipāna yorzāki kajikhala da ngahān ngaroka.

²⁴ Athumwui ngachaili kachipāli reimeithuiya da khuirakhala kajiwui pongli athum ngapai khangarok shokhaowa.

²⁵ Chieina Jishuna athumli hānga, “Gentilewui awungabingna athumwuitungli akhavā sai kala athumwuitungli pangshap kasingbingli kaphā sākhamebing hoi.

²⁶ Kha nathumliva chi maningmana, nathumwui ngachaili reimeithui kajena nganuimeikap kaje kala kathāna china otram ngatha̱khame sathalu.

²⁷Kaja phazatpamli kapampā eina ngatha̱khame khani chiwui ngachaili kachipana hakmeikhala? Phazatpamli kapamapā china reikhamei maningmala? Kha ina nathumwui ngachaili otram ngatha̱khame chi ngasāda lei.

²⁸ “Nathum hi iwui kasak atam saikorali ngasorashum kahaibingna;

²⁹ iwui Avāna ili mungkhavai mashun khami chithada ina nathumlila chi khamina.

³⁰ Chiya nathumna iwui wungramli phāshak-phazāpamra kala wungpamkhongli pamlaga Israelwui shang tharāda khaniwuitungli nathumna mungra.”

³¹ “Simon, Simon! yanglu! Satanna nathumli mā kahei thada heilaga chāng yangkhavai ningchāngda lei.

³² Kha Simon, ina nawui shitkasang mangachei khavai seihā sāmihaira, kala nana ili hanungluishit kaji tharan navānaobingli ngatar ngasaklu.”

³³ Chieina Peterna ngahānkai, “Proho, ina nali ngasoda phātopli vākhavai kala thirum khavai ngarānpinghaira.”

³⁴Ana hānga, “Peter ina nali kahāngna, aja ngayā nana ili matheimana da kathumshida mahangranglakha eina tangda harvāna makhongmara.”

³⁵ Chieina ana athumli hānga, “Ina nathumli lupākhaola, paidula, pheihopla mazangla chihokhavā tharan nathum khikha khavāt leihaolā?” “Khikha khavāt maleimana” da athumna ngahānkai.

³⁶ Ana hānga, “Kha ara, lupākhao khaleianala khuiphungranu kala paidu khaleia chinala chitharanu, kala raighai makhaleia a chinala awui kachon yorkhuilaga raighai lokhuiranu.

³⁷ Kaja ina nathumli kahāngna, ‘Ali khayon kasābing mishānli shānsanga’ da kathara lairikli hāngkahai chi iwuili ungshungphalungra, kaja iwui pongli kapi kahai chi ungshungmamānhaira.”

³⁸Athumna hānga, “Yanglu, Proho, hili raighai khani lei.” “Chi shapa” da ana ngahānkai.

³⁹ Jishuna keinungwui eina shokta ana khangachā eina khavāpam Olive kaphungli vai, kala awui sākhangatha̱bingna athi shurvai.

⁴⁰ Apam chili vākashung chitharan ana athumli hānga, “Nathum kasuili matāzang khavai seihā sālu.”

⁴¹Ana athumwui eina khavameinakta khuktizanglaga seihā sai.

⁴² “Avā, nana mayāmiakha, tengkot hi iwui eina kakhuithuimihaolu, chithālala iwui kaphaning maningmala kha nawui kaphaning eina vaimilu.”

⁴³Apam chili kazingramwui eina kazingrao tāda ali pangsang ngasaka.

⁴⁴Khanangnāhaoda a thukmeida seihā sai kala awui shairanra̱ chi ngaleitungli ashee atangtangnao thada ngaya̱tai.

⁴⁵Awui seihā kasāwui eina ngakarthuilaga sākhangatha̱bingli ungyanga, kala athum kakhanangwui vang pida leisai.

⁴⁶Chieina ana athumli hānga, “Khisāda nathum pihaokhala? Ngakarthuilu kala kasuili matāzang khavai seihā sālu.”

⁴⁷ Jishuna matui mahungda leilakha tharāda khaniwui ngachaili Judas kaho china mi kachungkhali thanrārāsai. Ana Jishuli maya̱kida awui shong rai.

⁴⁸Kha Jishuna ali hānga, “Judas, nana miwui Naomayarali maya̱tkha eina yansaira̱lā?”

⁴⁹ Kuimareida nganingkasā awui sākhangatha̱bingna shokki kaji chi theilaga hānga, “Proho, ithumna raighai eina shatusilā?”

⁵⁰Athumwui ngachaili akhana pāngmon khareiwui rao akhali shātta yāshongwui akhanā yortāmihaowa.

⁵¹Kha Jishuna, “Thāhaolu, masāluipaimara,” da hānga kala akhanāli singza̱da raimihaowa.

⁵²Chiwui thili ali tukkhuikida kharā pāngmon akhokabing, khorumshimwui akhavābing kala hangva̱naobingli Jishuna hānga, “Khaleli tukkhuiki kaji thada raighai eina thinghun singda kharālā?

⁵³ Ina thangkachida nathumli khorumshimli ngasokapam tharan nathumna ili pāng maparmana. Kha tangkhamangwui pangshapna munghaokida aja hi nathumwuina.”

⁵⁴ Chiwui thili athumna ali tukkhuida pāngmon khareiwui shimli shimenvai. Peterna khalachāhamsam shurvai.

⁵⁵Athumna kayāng alungthungli mei shātrunglaga athum saikora pamsera. Chili Peterla athumli ngasopama.

⁵⁶ Peterna mei tikkapam chi rao sha̱nao akhana kathei eina ali yangkazazaklaga hānga, “Mipā hila Jishuli ngasosai.”

⁵⁷Kha ana mamayāmada hānga, “Sha̱nao, I ali matheimana.”

⁵⁸Khaleilaga mi khangatei akhana theilaga, “Nala athumwui ngachaili akhana?” da Peterli hānga. Kha Peterna, “Maningmana” da ngahānkai.

⁵⁹Kala pung akha sha̱kha shānglaga khangatei akhana, “Kachangkhat mipā hila ali ngasosai; kaja ala Galileenaona,” da hānga.

⁶⁰Kha Peterna, “Mayara, nana khi kahāngkhala kaji I matheimana” da ngahānkai. Ana matui mahunglakha heng sāda harvāna khonghaowa.

⁶¹ Prohona kapeiungda Peterli munlak eina yanga. Kala “Aja, harvāna makhongranglakha nana ili kathum shida hatra” da Prohona hāngkahai tui chi Peterna phaningunga.

⁶²Chieina ana kayāngli soso shokchapa.

⁶³ Chitharan Jishuli shantri kasābingna ali mana̱shida kashaola shaowa.

⁶⁴Athumna mikla rommihailaga “Nali kashao chi khipākhala?” da ngahānnganaowa.

⁶⁵Kala athumna ali kachipat tuila kachungkha matui.

⁶⁶ Kazing kathang eina hangva̱naobing, pāngmon akhokabing kala ain kathembing rākazipngaruma. Jishuli hanga̱shimli khuivāda hānga,

⁶⁷ “Na Khrista china jiakha ithumli hānglu.” Kha ana ngahānkai, “Ina nathumli hānglala nathum mashitsangmara;

⁶⁸kala ina nathumli ngahānlala nathum mangahānkāmara.

⁶⁹Kha aruiwui eina thuilaga miwui Naomayarali Varewui pangshapwui yāshong chipamhaora.”

⁷⁰ Chieina athum saikorana hānga, “Chithākha na Varewui Naomayaralā?” Ana athumli hānga, “Chi nathumna hānghaira.”

⁷¹Chieina athumna hānga, “Ithumna hili lāngda shākhi khangatei khi phāluira! Ithum khalattana awui khamor eina kahāng chi shāhaira.”