Read Tangkhul Naga LUKE 3 Bible Online

LUKE 3 - Tangkhul Naga bible

LUKE 3

¹ Caesar Tiberiusna mungda tharāda kaphangā kum Pontius Pilatena Judeawui governor, Herodna Galileewui tetrarch kala agato Philipna Iturea eina Trachonitiswui tetrarch kala Lysaniasna Abilenewui tetrarch sāda leilakha,

² Annas eina Caiaphasna pāngmon kharei kasā atamli Zechariahwui naomayara Johnna lamhāngli leilakha Varewui tui chi rāphongmiya.

³ Chieina Jordanwui kuikhamareili khalei apam saikorali vāda morei pheomi khavai ningngateida ra̱hiklu da pao hāshoka.

⁴ Kaja Isaiah marānwui lairikli hithada kapihai; “Akhon akhana lamhāngli vaozatta lei: Prohowui shongfa ngarānlu, awui apongbing ngatar ngasaklu.

⁵Tampāk kachiva̱ chipemkāra, kala phungrei phungrā kachiva̱ nemngasakra. kala khamakhui ngatar ngasakra, kala kokatro apongbing khayammira;

⁶ kala phasā khavaia saikorana Varewui huikhami theisera.’”

⁷ Chiwui vang eina ra̱hikmilu da kharā mi ashangva̱ chili ana hānga, “He, phara̱wui dharābing! Rāki kaji malungkhavātwui eina yāmkhavai nathumli khipāna hāngkhala?

⁸ Ning khangateiwui ngarakzak kahai athei mathei ngasaklu kala nathum khalatta ‘Ithumwui avāva̱ Abraham lei’ da mahāngalu, kaja ina nathumli kahāngna, ngalungbing hiwui eina Varena Abrahamli nao kachungkha semmishapa.

⁹ Arui eina tangda thingngayungli ngahā parhaida lei, chiwui vang eina athei khamathā makhamathei thingrong kachiva̱ ta̱teklaga meilungli horsanghaora.”

¹⁰Chieina mi kachungkha china ali ngahāna, “Chithākha ithumna khi sarakhala?”

¹¹ Ana athumli ngahānkai, “Phahon khani khaleia mi china akhala makhaleia mipā chili ngayarmilu; kala kashakazā khaleia chinala makhaleia chili chithada miranu.”

¹²Khashinā khalokabingla ra̱hikmi khavai rāda ali hānga, “Ojā, ithumna khi sarakhala?”

¹³Chieina ana athumli ngahānkai, “Nathumna ngashaiki kaji chili lāngda mangashaialu.”

¹⁴Shipaibingnala ali ngahāna, “Thākha ithumna khi sara̱khala?” Chieina ana athumli hānga, “Khipālikha tandi sāda mangaponalu, kaphenla maphenphāphaalu, nathumwui tolop chi shapa da phaninglu.”

¹⁵ Mibingwui kachihān leihaogada athum saikorana John hi Khrista chiralā da athumwui wuklungli machuklakha,

¹⁶ Johnna athum saikorali hānga, “Ina nathumli tara̱ eina ra̱hikmi kha ili reikhamei a chi rārāli, I awui pheihop khara̱ eina tangda khalāmikida matik machāmana. Ana nathumli Manglā Kathara kala Mei eina ra̱hikmira.

¹⁷Lanpumwui mā chi heikhui khavai kala kapanga mā chi kazipkhuida chumli haikhavai yāmkok chi awui pāngli lei, kha ana ahikbing chi masāshimitkapai meilungli chithothaora.”

¹⁸Hithada sāda apong kachungkha eina ana kasatkasang eina ngasoda mibingli paokaphā hāshoka.

¹⁹ Kha Johnna Herod Governorli agato preiva̱ Herodiasli ngakum kahaiwui vang kala ana makaphā ot kachungkha sāhaida hāngkhamachinwui vang,

²⁰Herodna makaphātungli makaphā ngarorda Johnli phātop sanghaowa.

²¹ Mi saikorali ra̱hikmi kahaiwui thili kala Jishulila ra̱hikmihailaga seihā sāmahunglakha kazingram shohaowa;

²² kala Manglā Katharana nasha̱wui azak khuida awuitungli tapa̱ya kala kazingramwui eina akhon akha vaorai, “Na iwui khaluma Naomayarana, Ina nali ningyāng unglaka.”

²³ Jishuna awui ot sākaphok tharan, awui zimgkum thumra sha̱kha kāhairasai. Ava (mina kaphaning thada) Heliwui naomayara Josephwui naona,

²⁴Heli Mathatwui nao, Mathat Leviwui nao, Levi Melchiwui nao, Melchi Janna-iwui nao, Janna-i Josephwui nao,

²⁵Joseph Mattathiaswui nao, Mattathias Amoswui nao, Amos Nahumwui nao, Nahum Esliwui nao, Esli Nagga-iwui nao,

²⁶Nagga-i Maathwui nao, Maath Mattathiaswui nao, Mattathias Seme-inwui nao, Seme-in Josechwui nao, Josech Jodawui nao,

²⁷Joda Joananwui nao, Joanan Rhesawui nao, Rhesa Zerubbabelwui nao, Zerubbabel Shealtielwui nao, Shealtiel Neriwui nao,

²⁸Neri Melchiwui nao, Melchi Addiwui nao, Addi Kosamwui nao, Kosam Elmadamwui nao, Elmadam Erwui nao,

²⁹Er Joshuawui nao, Joshua Eliezarwui nao, Eliezar Jorimwui nao, Jorim Matthatwui nao, Matthat Leviwui nao,

³⁰Levi Simeonwui nao, Simeon Judahwui nao, Judah Josephwui nao, Joseph Johnamwui nao, Johnam Eliakimwui nao,

³¹Eliakim Meleawui nao, Melea Mennawui nao, Menna Mattathawui nao, Mattatha Nathanwui nao, Nathan Davidwui nao,

³²David Jessewui nao, Jesse Obedwui nao, Obed Boazwui nao, Boaz Salmonwui nao, Salmon Nahshonwui nao, Nahshon Amminadabwui nao,

³³Amminadab Adminwui nao, Admin Arniwui nao, Arni Hezronwui nao, Hezron Perezwui nao, Perez Judahwui nao,

³⁴Judah Jacobwui nao, Jacob Isaacwui nao, Isaac Abrahamwui nao, Abraham Terahwui nao, Terah Nahorwui nao,

³⁵Nahor Serugwui nao, Serug Reuwui nao, Reu Pelegwui nao, Peleg Eberwui nao, Eber Shelahwui nao,

³⁶Shelah Cainanwui nao, Cainan Arphaxadwui nao, Arphaxad Shemwui nao, Shem Noahwui nao, Noah Lemechwui nao,

³⁷Lamek Methuselahwui nao, Methuselah Enochwui nao, Enoch Jaredwui nao, Jared Mahalaleelwui nao, Mahalaleel Cainanwui nao, Cainan Enoswui nao,

³⁸Enos Sethwui nao, Seth Adamwui naona kala Adam Varewui naona.