Read Tangkhul Naga LUKE 4 Bible Online

LUKE 4 - Tangkhul Naga bible

LUKE 4

¹ Manglā Kathara pemting eina Jishuna Jordanwui eina latunga kala Manglāna lamhāngli thānvai.

² Chili zimiksho hangmatithang ali chipeena suipama. Ana zimiksho chirankha khikha mazā-mamang kajiwui vang akuplamva thailakhaowa

³Chipeena ali hānga, “Na Varewui naomayarana jiakha lunggui hi khamui onkhavai kasolu.”

⁴ Chieina Jishuna ngahānkai, “Hithada kapihaida lei; ‘Mina khamuimāng eina maringmana.’”

⁵Chiwui thili chipeena apam kajui akhali thānkai, kala okathui wungram saikora mikkhayip akhawui alungli chithei.

⁶ Kala ana hānga, “Ina nali pangshap kala tekhamatei saikora hi mira. Hi ili mikahaina. Chieina ina mikhangaiali mishapa,

⁷nana ili khorumakha saikora hi nawui sāserra.”

⁸ Chieina Jishuna ngahānkai, “Hithada kapihaida lei, ‘Nana Proho nawui Varemāngli khorumra, kala amāngli otram ngatha̱ra.’”

⁹Chiwui thili chipee china ali Jerusalemli thanvāda juimeikap kaje khorumshim atonli kānganing ngasaklaga hānga, “Na Varewui naomayarana jiakha hiwui eina ngawoktālu,

¹⁰ kaja hithada kapihaida lei, ‘Nali yangmi khavai Varena awui kazingrao chihorāra;

¹¹kala naphei lungguili mangaphokza̱ khavai, athumwui pāng eina nali ngayuikhuira.’”

¹² Chieina Jishuna ngahānkai, “Hithada kapihaida lei, ‘Nana Proho nawui Vareli masuipaimara.’”

¹³ Kala chipee china suiki kaji suikuphailaga atam kachā masamphangranglakha eina tangdawui vang awui eina thuihaowa.

¹⁴ Chiwui thili Jishuna Manglā Katharawui pangshap eina Galileeli latunga kala chiwui kuikhamarelili khalei apam saikorali awui ming ngayaovāserhaowa.

¹⁵ Ana athumwui Synagogueli tamchithei kala mi saikorana ali soi.

¹⁶ Chiwui thili ana ali nganaokakā ram Nazarethli hanunga kala khangachā sākasā thada ana sabbaththang Synagogueli vai. Kala ana lairik pākhavai thuinganinga.

¹⁷Kala Isaiah marānwui lairik chi ali mi. Ana lairik chi harkhayang eina hithada kapi kahai tuipam chi samphanga;

¹⁸ “Prohowui Manglā chi iwuitungli lei. Khikhalajila kachāmabingli paokaphā hashok khavai, ana ili thao neomihaira. Narkahaibingli chihomi khavai, khangapeobing theiluishit khavai, chāngkhareng kahaibing ningkhān khavai.

¹⁹Prohowui mayākhami zingkum rāhaira da, vaomalānmi khavai ili kashirātna.”

²⁰Ana lairik chi khaluikhuida rao chili mihailaga pamkazang eina, chili leikasā mi saikorana ali yangvāsera.

²¹Chieina ana athumli hāngphokuwa, “Varewui tui chi aja nathumna kashā eina ungshunghaira.”

²² Mi saikorana sosera kala awui khamor eina lukhamashan tui kashok chi shālaga matakhakhaida hānga, “Hi Josephwui naomayara chi maningmalā?”

²³ Chieina ana hānga, “Makahatlakla chānjam tui hi nathumna ili hāngra, ‘Khanong, na khalatta raikhuilu, nana Capernaumli sākahahai ithumna shākahai chi naram ngaleilila sālu’ jira.”

²⁴ Chieina ana hānglui, “Kachangkhat eina ina nathumli kahāngna, marān khipālikha khalattaramli khamayā maleimana.”

²⁵ Kha ina nathumli mashuntui hi kahāngna, “Elijahwui atamli zingkum kathum, kachāng tharuk Varena kazing maro ngasakthuda apam hupva̱li chāmrei kharā tharan Israelli ra̱meinao kachungkha leisai,

²⁶thālala Elijahli, Sidon ngaleiwui Zarephatli khalei rameiva̱wuili maningla khangateiwuili mashivātmana.

²⁷ Kala Elisha marānwui atamli Israelli phārrei kakazā mi kachungkha leisai; thālala Syriawui Naaman maningla khangatei khipālikha matharmimana.”

²⁸Tui chi kashā eina Synagogueli leikasā mi saikorana malungvātlakhaowa.

²⁹ Chieina athumna ngakarthuida ali keinungwui eina shimenshoka kala athumwui keinung sakā kahai kaphungton chiwui eina sha̱tā khavai ali thānvai.

³⁰ Kha ana yaruiwui ngachaili ngara̱thuihaowa.

³¹ Chiwui thili ana Galileewui keinung Capernaumshong tāda sabbaththang athumli tamchithei.

³² Athumna awui tamkachithei chili matakhakhaowa, kaja ana sāshap pangshap eina matui.

³³Chitharan Syngogueli raih kazanga mi akha leisai, ana panglāk eina vāoshoka,

³⁴“He Nazarethwui Jishu! nana ithumli khi sāki kajikhala? Ithumli shimān ngasak khavai kharāla? Na khipākhala da ithumna thei; na Varewui Tharkhamathengpā china.”

³⁵Kha Jishuna makathar manglā chili kaharda hānga, “Akhon mashoklu, awui eina shokhaolu.” Makaphā manglā china ali horkarsanghailaga zakkashi khikha masāla awui eina shokhaowa.

³⁶Mibing chi matakhakhaida akha eina akha ngazek ngarokta, “Hi khitui khala? Ana sāshap pangshap eina makathara manglā chili kakaso eina athumnala yāmshokli” da matuiya.

³⁷ Chieina ngalei chiwui kuikhamareili khalei apam saikorali awui pao hi ngayaonaphaowa.

³⁸ Jishuna ngakarthuida Synagoguewui eina shoklaga Simonwui shimli vai. Chitharan Simonwui aniva̱ kharurda leisai.

³⁹Ana preiva̱ chiwui ngalemli anganingda kakharur raikhavai kakaso eina raihaowa kala ana hengsāda ngakarthuilaga athumli otram ngatha̱mi.

⁴⁰Zimik tunkahaiwui thili kazātyur khangatateiwui eina kakazānaobing awuili khuirai. Ana mi kachiva̱wuitungli pāng parrorda athumwui kakazā raimi.

⁴¹Mi kachungkhawui eina chipeebing china “Na Varewui naomayarana” da panglāk eina vaolaga yāmshoka. Kha ana athumli khararda tuila mamatui ngasakmana, khiwui vangkhala kaja athumna a Khrista china da theihaowa.

⁴² Kazing kathang eina Jishuna ngachakyang kahai apam akhali vai kala mibingna ali phāda samkaphang eina ali mathui khavai sai.

⁴³Kha ana athumli hānga, “Ina khangatei keinungbinglila Vare wungramwui paokaphā hi hashokphalungra; kaja hi sākhavai ili kashirātna.”

⁴⁴ Chieina ana Judeali khalei Synagoguebinglila pao hāshoka.