Read Tangkhul Naga KHALATLUI 1 Bible Online

KHALATLUI 1 - Tangkhul Naga bible

KHALATLUI 1

¹Jordan kong kānlaga, Arabahwui lamhāngli, kaja Suphli kāroda khalei Paran kala Tophel, Laban, Hazeroth kala Dizahabwui ngachaili leilakha Mosesna Israel saikorali kahāng tuibing chi hina.

²Seir Kaphung shongfa eina vaakha Horebwui eina Kadesh-barneali tharāda akhathang zata.

³Kala kum hangmati, kachāng tharāda akhawui kharethang PROHOna khami ningkhami chiwui athishurda Mosesna Israel mibingli hānga.

⁴ Hi ana Amornaobingwui awunga, Heshbonli pānkasā Sihon, kala Bashanwui awunga Og, Ashtaroth kala Edre-ili pānkasābingli yuikahaiwui thilina.

⁵Jordan kānvāda Moab ngaleili leilakha Mosesna ain hi pheichitheida hānga,

⁶“Horebli leilakha ithumwui PROHO Varena hānga, ‘Nathum phungrei hili sangnā pamhaira;

⁷ngareikhuida Amorbingwui phungreiram chili, kala Arabahli athumwui luinganai saikora phungreiramli, kala tampākli, kala Negebli, shamadrupheili, Canaannaobingwui ngaleili, kala Lebanon kongrei, Euphrates kong vāshungda nathumwui shongzā zatvālu.

⁸Yanglu, ina ngalei chi nathumwui mangāli haimihaira; vāda navā ngarā, Abraham, Isaac, kala Jacobli, kala athumwui ara̱-azāli mirada PROHOna ngashit kahai ram chi akhuilu.’

⁹ “Atam chitharan ina nathumli hānga, ‘Nathum saikorali imāngna kathān hi maphungkharar otna;

¹⁰PROHO nathumwui Vare china nathumli kachungkha mayāsangmihaira, kala yanglu, ara nathum kazingramwui sirāli ngayāhaira.

¹¹Ana nathumli ngashit kahai athishurda aruila navā ngarāwui PROHO Varena nathum khaleiyākha thingthing mataida ngarumsangmiranu, kasola somiranu!

¹²Kha nathum hiyākhawui kharit otphun kala nganang khangazai imāngna kathāda phungra?

¹³Nathum shang-shangwui eina thangkhama, theishingkhui kathei, kala kashok-khangakhang theithangkhamei mi kapangkhuilu, chiwui athishurda ina athumli nathumwui akhava sākhavai sangra.’

¹⁴Kala nathumna ili ngahānkāda, ‘Ithumli nana hāngkhami otsak chi ithumwui vang phālaka’ da hānga.

¹⁵Chieina ina shang-shangwui eina thangkhama kala kashok-khangakhang theithangkhameiya athumli khuilaga nathumwuitungli akhava sāda thingthingwui, shāshāwui, hangphangāngāwui kala tharārāwui raithānabing kala otva̱bing nathumwui shang vāpeida sāngasaka.

¹⁶ Kala chitharan nathumwui bichar samebingli ina hānga, ‘Nachinā ngarāwui ngachaili nilala, kha̱mi eina athumwui ngachaili nilala mashungrik eina bichar sāmilu.

¹⁷Nathumna bichar kasā atamli mijang masālu, kharei kateo ngaraichada sāmilu; kala mimai mayangalu; kaja hi Varewui bicharna; kala tuingaphun chi nathumwui vang saknāhaiakha, nathumna ili khuirāda ina yangmira.’

¹⁸kala nathumna sāki kaji ot saikora ina atam chitharan kasoser kahaina.

¹⁹“Kala ithumwui Varena kagaso athishurda ithumna Horebwui eina zatphokta nathumna theikahai khamashā kala khangachee-khangachā lamhāngli zatta Amor phungreiramli vai, kala Kadesh-barneali vāshunga.

²⁰Kala ina nathumli hānga, ‘Ithumwui PROHO Varena mikahai Amor phungreiramli rāshunghaira.

²¹Yanglu, ngalei chi PROHO nathumwui Varena nathumwui mangāli haimihaira; navā ngarāwui PROHO Varena hāngkahai thāda chili vāda asompamlu; mangacheealu; lah ning masuitaalu.’

²² Chieina nathum saikorana ili rānganaida hānga, ‘Ithumli rimeida mi chihosa, chithāda athumna ithumwui vang ngalei chi vāyangkhuida ithumwui vākhavai kala keinungbing chili zangkhavai shongfabing kala pao khuiungmiluishitranu.’

²³ina chi phārada theihaoda, shang-shangwui eina mi ava̱va̱ khuilaga athum tharāda khani chihoi;

²⁴kala athumna phungreiramli vāda Eshcolwui tampākli khalalei chi ara̱yangkhui.

²⁵Kala apam chiwui athei-araila athumna khuiungda ithumli pao saikora unghānga, kala ‘ithumwui PROHO Varena ithumli mikahai lam chi ngalei khamathā apamna’ da hānga.

²⁶“Chithālala nathumna mavāla PROHO nathumwui Varewui kagasoli ngakaishiya;

²⁷kala nathumwui kachonshimli kharopta hānga, ‘Kaja PROHOna ithumli ningkakachaiwui vang ana ithumli sāshimān khavai Amorbingwui pāngli mikhavai ithumli Egyptwui eina khuikashokna.

²⁸Ithum kali vauki kajikhala? Ichinā ngarāna ithumli ning shimān ngasakta, “Mibing chi ithumli hakmei kala juimei; keinungla haklāka kala kazing kazokta ngaveitithai; chili lāngda Anakimwui naomayarabingla chili thei.”’ da hānga.

²⁹Chieina ina nathumli hānga, ‘Athumli maningkhariklu lah mangacheealu.

³⁰PROHO nathumwui Vare china nathumwui miktāli Egyptli nathumwui vang sāmi kahai thāda nathum mangalila rizatta nathumwui vāng ngararmira;

³¹ kala nathum hili marāshungranglakha eina tangda nathumwui kazāt-kakar kachida avāvana anaomayarali phungkazat thāda, PROHO nathumwui Vare china nathumli kathāda apam hili khuirākhala da nathumna katheina.’

³²Kha tui hi hānghailaga nathumna PROHO nathumwui Vare chili mashitsangmana,

³³ana nathumli rizatta nathumli ngayā mei eina thānmi, ngashun muiyā eina thānmida nathumwui kachonshim khaning khavaipam phākhuimi, kala nathumna kachikathā shongfa eina vāra kajila chitheimi.

³⁴“Kala nathumwui tui shālaga PROHOna malungvātta hānga,

³⁵‘Navā ngarāli ina mirada ngashit kahai lam khamathā chi, makaphā makhayā thot hiwui mibing akhala kathei masamphangmara;

³⁶Jephunnehwui nao Calebmāngna kathei samphangra, khikhalajila ana PROHOli ningtongda shura chiwui vang ana phei naisang kahai ngalei chi anao ngarāli ina mira!’

³⁷Nathumwui vang eina ilila PROHOna malungvātta hānga, ‘Nala chili mazangmara;

³⁸nawui mangāli nganingda khalei Nunwui nao Joshuana zangra, ali katomlu, kaja ana Israelnaoli thānzangra.

³⁹Chili lāngda nathumna sāshai ngasāhaora da kaphaninga nathumwui naongarābing, kala aja kashi-kaphā matheirang kaje athumna chili zangra, kala ina athumli chi mida athumwui ngasāra.

⁴⁰Kha nathumva, ngareikhuida Red Seashong vāda lamhāngli kuizatlu.’

⁴¹“Chieina nathumna ili ngahānkai, ‘PROHOwui mangāli ithum morei sāhaira, PROHOna kagaso athishurda ithum vāda rai ngararra.’ Kala phungreiram chili khavā pailaka da phaningda nathumna raisāri ngavaikhuiripa.

⁴²Kha PROHOna ili hānga, ‘Athumli hānglu, mavaalu, khangararla mangararalu, kaja ina athumli mangasomana; yangkashibingwui pāngli maishipaishina.’

⁴³Chi eina ina nathumli hānga, kha nathumna PROHO chiwui kagaso chili ngakaishi kala nathumna yuihenra da phungreiram chili kai.

⁴⁴Chieina phungreiram chili kapama Amornaobingna khui khalor thāda Seirli nathumli ngararlaga Hormah vāshungda kharomvai.

⁴⁵Chieina nathumna hanungda PROHOwui mangāli chapa; kha ana nathumwui khangakaokhon mashāmimana lah kakhuila makhuisangmithuwa.

⁴⁶Chiwui vang nathumna Kadeshli chirankha pamkahaina.