Read Tangkhul Naga KHALATLUI 10 Bible Online

KHALATLUI 10 - Tangkhul Naga bible

KHALATLUI 10

¹“Atam chili PROHOna ili hānga, ‘Kharewui tākam eina lungphek khani sākhuiluilu kala phungreili ili kālu; kala thing oko akha sākhui jilu.

²Kala nana sakhai kahai lungphekli kapi kahai tui chi ina kapimiluira, chi nana oko chili sanghailu.’

³“Chieina ina acaciathing eina oko akha sākhui, kala kharewui thāda lungphek khani shānkhuida chi ipāng eina singphungda phungreili khuikai.

⁴Kala yaruina kazipthang, phungreili meilungwui eina PROHOna nathumli kahāng tui, ningkhami tharā chi, kharewui thāda apāng eina lungphek khani chili kapimi, kala PROHOna ili mi.

⁵Chiwui thili ina ngareikhuida phungreiwui eina tai kala ina sākakhui lungphek chi oko chili sanga; kala PROHOna ili kagaso athishurda chibing chi chili leili.”

⁶(Israelwui mibingna Be-eroth Bene-jaakan [1] eina thuilaga Moserahli vai. Apam chili Aaron thihaida chili chifahaowa; kala anaomayara Eleazarna awui mahut pāngmon sāda otram ngatha̱mi.

⁷Chiwui eina athumna Gudgodahli vai, kala Gudgodahwui eina Jotbathah kaho tara̱ khalong ngalei chili vāshunga.

⁸Atam chitharan PROHOna Levinaoli ngateida khaishoklaga, PROHOwui tuingashitwui oko chi phungzat ngasaka kala awui mangāli nganingda otram ngatha̱ khavai, awui ming eina somi khavai sāda aja eina tangda chikathāna.

⁹Chiwui vang Levina achinā ngarāwui thāda shimluiyar masamkaphangna; PROHO nathumwui Varena hāngkahai thāda, PROHO hi athumwui lanna).

¹⁰ “Kharewui thāda ina phungreili ngashun ngayā hangmatithang kāpamlui kala atam chilila PROHOna iwui kapo khuisangmiluishita, PROHOna nathumli masāshimānngaithuwa.

¹¹Kala PROHOna ili hānga, ina avāva̱ ngarāli ngashit kahai ngalei chi akhui khavai ngakarthuida mibing hili thānzatlu.

¹²“Israelnaobing, ara PROHO nathumwui Varena nathumwui eina khi ningchāngkhala kaji chiya; PROHO nathumwui Vareli khangachee, awui shongfali kazat; ali leikashi, kala nawui ningla, manglāla tongda PROHO nathumwui Vareli otram khangatha̱,

¹³kala nathumwui phākhavai ina kahāng hiwui athishurda PROHOwui ningkhami, shiyan-chikan khamayon hi maningmala?

¹⁴Yanglu, kazingramla kala kazingramwui kazingramla; okathuila kala chiwui alungli khalei saikorala PROHO nathumwui Varewuisera.

¹⁵Chithālala, navā ngarāli PROHOna ningli haida leishimihaokada athumli kala athumwui ara̱-azā nathumli kapangkhui, kala ajawui hithāda yur kateiwui alungli leikhangasakna.

¹⁶Chiwui vang eina nathumwui wuklungwui ahui rimshoklu kala mangakaishichingalu.

¹⁷ Kaja PROHO nathumwui Vare hiya varebingwui Varena, kala prohobingwui PROHOna; reikhamataiya, pangshapa, khangachee-khangachā Vare, mijang makasā, kala akhangei makakhuiya Varena.

¹⁸Marānaowui vang kala ra̱meinaowui vang mashun bichar sāmi, kala kha̱milila leishida kashakazā kala kashankachonla ngarānmi.

¹⁹ Chiwui vang nathum kha̱mili leishitheilu; khikhalajila nathumla Egypt ngaleili kha̱mi sāda leisai.

²⁰PROHO nathumwui Vareli ngacheelu; nathum ali ngavapta otram ngatha̱lu, kala awui mingli mingzailu.

²¹A nathumwui masot mikhavaina; nathumwui mik eina theikahai hakkhamahā khangachee-khangachā ot sakhame Varena.

²² Navā ngarā athum hangshinimāng Egyptli tai; kha ara PROHO nathumwui Varena nathumli kazingramwui sirāyakha thāda mataisangmihaira.