Read Tangkhul Naga KHALATLUI 11 Bible Online

KHALATLUI 11 - Tangkhul Naga bible

KHALATLUI 11

¹“Chiwui vang eina PROHO nathumwui Vareli leishilu, kala awui kagaso, awui ain kala shiyan-chikan mayonchinglu.

²Kala aja zimiksho, (kaja ina mathei-mashārang kaje nanao ngarāli kahāng maningmana), PROHO nathumwui Varewui hāngkhamachin [2] phaningkhuilu, awui hakkhamahā kala awui pāngthei kharei machukkhuilu,

³Egyptli leilakha Egyptwui awunga Pharaohli kala awui pam saikorali awui khudambing kala awui otsakbing chi phaningkhuilu;

⁴ kala ana Egyptwui raimibingli, athumwui siguili, kala athumwui siguigaribingli, khi sāmameikhala kaji; athumna nathumli kharomkharā atamli ana kathāda Red Seali ngaphumthat ngasak; kala aja eina tangda athumli kathāda PROHOna shimān ngasak;

⁵kala nathumna lamhāngli zatta, nathumna apam hili marāshungranglakha eina tangda ana nathumwui vang khi sāmimamei kajila;

⁶ Reubenwui naomayara, Eliabwui naomayarabing Dathan eina Abiramli ana khisa; kathāda ngaleina khamor makālaga, anilila, ashi shimkhur, athumwui kachonshimbing, kala aniwui thi kashura katongali manglākapai saikorali ngasoda mayuisangkhala kaji katonga hi Israelwui alungli shoka;

⁷kaja PROHOna sākahai hakkhamahā ot saikora nathumwui mik eina theikahaina.

⁸“Chiwui vang eina nathum aja zimiksho ina kagaso chi nganālu, chithāda sāda nathumna vāzangda akhuiki kaji lam chi kapang kaping eina akhuishapra.

⁹Chieina nathumli mira da navā ngarāli ngashit kahai, seina̱ eina khuira̱ khalong ngalei chili nathumna sāngmeida okthuira.

¹⁰Khikhalajila nathumna samphangki kaji ngalei chi, nathumna shokkhavai Egypt ngalei thāda yāmguili athā yaoda pāng eina tara̱ chailaga hanthing-hanrā lingkashai kathā maningmana;

¹¹kha nathumna vākhuiki kaji ngalei chi kazingram eina zingrot tāmida vazāki kaji kaphung eina tampākna,

¹²PROHO nathumwui Varena yangkhami ngaleina; kum haokaphok eina thuilaga kum kapei eina tangda PROHO nathumwui Varewui mikyan ngalei chiwuitungli leimiching kaje ngaleina.

¹³ “Kala PROHO nathumwui Vareli, ningla manglāla tongtingda otram ngatha̱ khavai kala leishi khavai ina aja kagaso ningkhami hi nathumna mayonakha,

¹⁴ngalei chili luivāt atam chalāk eina ana khari-khanao zingrot tāmida zātla, nathumwui drakhāthei, nathumwui thao, kachungkha kazipkhuira.

¹⁵Kala nathumwui seihomphungli seizātla kharngasakra; kala nathumna zāda thotinghaora.

¹⁶Ningngasharlu, ningngacheihaida vare kateibingli otram ngatha̱da khorumhaipaishina,

¹⁷chithāda PROHOwui malungkhavāt nathumli tāshungda kazing marokhami eina ngalei chiwui theishirai mashokpaishina, chieina PROHOna nathumli khami khamathā ngalei chiwui eina nathum thaklāk eina thaichāmda shimānhaipaishina.

¹⁸“Chiwui vang eina iwui tuibing hi nathumna wuklungli kala ningli phārihaira; kala chibing chi nathumwui machutkhui khavai pānglila masa̱hailu, kala khaveili naphailu.

¹⁹Kala chibing chi nathumna shimli pamlala, shongfali zatlala, kapi atamli kala kathui atamli nanao ngarāli tamchitheiki kajina.

²⁰ Kala nathumna shimwui khāmonglila, ngaveithinglila kapihailu,

²¹okathui mashimānranglakha eina tangda nathumli mira da navā ngarāli PROHOna ngashit kahai ngalei chili nathumla, nanao ngarāla okpeimeira.

²²“Kaja ina kaso kahai ningkhami hi ningsanglak eina mayonda PROHO nathumwui Vareli leishida kala ali ngavapta awui apongli zatakha,

²³yur kateibingli PROHOna kashammihaida, nathumli chungkhamei kala pangkhamei athumwui lam nathumna ngapaikhuira.

²⁴ Nathumna phei naikasang pam kachiva̱ nathumwui sāra; nathumwui leiret lamhāng eina thuida Lebanon shangshungda, Euphrates Kong eina thuida zingtun shamadru vāshungra.

²⁵Mi khipānakha nathumli mangasungrarmara; ana ngashit kahai thāda nathumna vāki kaji ngalei saikora nathumli ning chipāda ngachee khavai PROHO nathumwui Varena malung ngatha̱ ngasakra.

²⁶“Yanglu, ina aja nathum mangāli sokhami kala khonkashi haimili:

²⁷ina kagaso, PROHO nathumwui Varewui ningkhami nganaakha, sokhami samphangra,

²⁸kha PROHO nathumwui Varewui ningkhamibing chi manganāmada, kala ina kagaso ningkhamibingwui eina ngareithuida nathumna makathei khangatei varebingli phaningakha khonkashi ngasāra.

²⁹ Kala nathumna akhuiki kaji lam chili PROHO nathumwui Varena thānkhavā chitharan, Gerizim Kaphungli sokhami tui hāngtāra kala Eball Kaphungli khonkashi tui hāngtāra.

³⁰Athum chiya Jordan kānlaga shongfawui zimiktunshong, zimik tunkhavai shong Canaannaobingna pānda khalei Arabah, Gilgal ngaheili khalei Morehwui shirimthing phorkhavai chili khalei maningmala?

³¹PROHO nathumwui Varena khami ngalei chi vākhui khavai nathumna Jordan kānvāki kajina. Kala nathumna chi samphangda chili akapān chitharan,

³²nathum ning ngasharlu, kaja aja zimiksho ina kagaso khami ain kala shiyan-chikan saikora chi mayonra.