Read Tangkhul Naga KHALATLUI 13 Bible Online

KHALATLUI 13 - Tangkhul Naga bible

KHALATLUI 13

¹“Nathumwui eina marānbing nilala, mang kathei mi nilala shokta nathumli matakhak kahai lah khudam chitheilala,

²kala awui kahāng khudam chi ungshungkachangda, kala ana nathumna makatheiya chili, ‘Ithumna khangatei varebingli khorumsa kala ithum athumli otram ngatha̱sa’ da hānglala,

³marānbing nilala, mang katheiapali nilala manganāsangalu; kaja nathumna PROHO nathumwui Vareli wuklung kala manglā kala ningtongda leishikā maleishikhala da PROHO nathumwui Varena nathumli chāng katamna.

⁴Nathum PROHO nawui Varewui thi shurda ali ngacheelu kala awui ningkhami mayonda awui kahāng nganālu kala ali ngavapta otram ngatha̱lu.

⁵Kha marānbing lah mang katheiya chili shaothatphalungra, kaja Egypt raopamwui eina ngatangkhuikhame kala thānshokkhame PROHO nathumwui Vareli ana ngakaishida kala PROHO nathumwui Varena nathumli ningkhami mikahai chili ngateida zatkhavai kasāna. Hikatha mili shaokathat hi eina nathumwui alungli khamakhao tharkhui khavaina.

⁶“Ava̱ akhana kapharā nachināna nilala, nanao mayarana nilala, nanao ngalāva̱na nilala, nawui leikashi preiva̱na nilala, nawui mashitmeikap kaje ngasotnaona nilala, nali athumna ngathumda suida, nathumna, lah navā ngarāna matheikasa khangatei varebingli vākhorumsa da hāngakha,

⁷nathumwui kuikhamareiliranu, khanaili khaleiranu, katāli khaleiranu, okathui akatang akhawui eina khangatei akhaliranu, nathumna makathei varebingli khorumsā kachipa chile,

⁸nathum awui tui makhuisangalu lah manganāsangalu, lah chikathā mili lukhamashanla malumashanalu, nathum ali kachihola machiholu, lah ali kathumla mathumhaialu.

⁹Kha nathumna ali shaothatki kajina; shaokathat chili nana pāng parrikapra, kala chiwui thili katei mibingna kānaora.

¹⁰Egypt ngaleiwui raopamwui eina thānshokkhame PROHO nathumwui Varewui eina nali khuithui khavai kasāwui vang chikathā mi chile nathum ngalung eina horthatphalungra.

¹¹Kala chi Israel saikorana shālaga ngacheera, kala nathumwui ngachaili hikathā makhayā ot masālengluimara.”

¹²“Nathumwui pamkhavai apam, PROHO nathumwui Varena khami kachikathā keinung akhali,

¹³kachikathā makhangatun mi china nathumna makatheiya chili, ‘Ithumna vāda khangatei varebingli khorumda otram ngatha̱sa’ da mi khangatei thānthui kahai, nathumna kashā leiakha,

¹⁴nathumna meisā eina ngathingkhui kazaklu; kala hikathā ningkakachai ot hi nathumwui alungli shok kachangkhathaiakha,

¹⁵keinung chili khalei mi hupta, chili khalei sha̱keibingla nathumna raighai eina sakazamserphalungra.

¹⁶Nathumna chiwui thongthāngbing saikora kayāng khamaseli kazipkhuida, kala chiwui ot saikora PROHO nathumwui Vareli rikkatā kachigat sāda keinung chi mei sa̱talu, khanao eina tangda chuita kahai chi leichingda chi naoda masākāluimara.

¹⁷Chiwui otyur nathum akhala pāngli mangathānpaimara; chithāda sāda PROHOna malungkhavāt nemhaida nathumli phaningmida lumashanmira kala navā ngarāli ngashitmi kahai thāda nathumli mataisang ngasakra.

¹⁸Nathumna PROHO nawui Varewui khon shāda kahāng nganākha, kala awui kagaso aja ina nathumli kahāng saikora mayonda PROHO nathumwui Varewui mangāli khamashung ot sāchingakha, ana lumashanmira.”