Read Tangkhul Naga KHALATLUI 14 Bible Online

KHALATLUI 14 - Tangkhul Naga bible

KHALATLUI 14

¹ “Nathum PROHO nathumwui Varewui naongarāna; nathum khalatta kathinaowui vang phasā reoda ashee mashok ngasakalu lah kuila masipaimana.

² Kaja nathum hiya PROHO nathumwui Varewui vanga kathara yurna, kala okathuili khalei yur saikorawui ngachaili awui mi sākhavai PROHOna nathumli kapangkhui kahaina.”

³ “Nathum ningkakachai ot akhanidala mashaipaimana.

⁴Nathumna shaikapai sāyurbing chi hina: sei, yao, me,

⁵seichui, chaonao, chaoyur, sirao, ibex, kala ramyao.

⁶Asho khani khangapāka sāyur kachiva̱, kala sāyurwui ngachaili sheilaga khaluikazā sābing nathumna shaipaisera.

⁷Sheilala lah asho khani ngapāklala mashaiki kaji sābing chiya: ut, theba kala lungkaihok; kaja sheilaga khaluizālala asho makhangapāk hiya makathar sāyurna.

⁸Kala hok asho ngapāklala sheilaga makhaluizāthuda nathumwui vang chi matharmana. Chiwui asāla mashaipaimana, kala chiwui kathingunlila nathum masaza̱paimana.”

⁹“Tara̱lungli khaleiwui ngachaili shaikapaibing: angachāng kakā kala ahor kakā saikora nathum shaipaisera.

¹⁰Kha angachāng kala ahor makakā kachiva̱ nathum mashaipaimana; hi nathumwui vang matharmana.”

¹¹“Nathumna kathara vānaoyurbing saikora shaipaisera.

¹²Kha nathumna mashaikapai chiya: khalāng, khalāng sāshā, khalāng-veizor,

¹³khararkha̱, lāngpop kala khalāng yur saikora;

¹⁴hangkhā kala hangkhāyur saikora,

¹⁵ostrich, pawung ngayazā, shamadruvā, sā kashaiya yur;

¹⁶pawung kateo, pawung kahakyur, ra̱har,

¹⁷utvana̱, carrion khalāng kala khaishumva̱,

¹⁸varok, varokyur, hoopoe kala konghar.”

¹⁹“Kala angachāng kakā aga̱-akai saikora nathumwui vang matharmana; chi mashaipaimana.

²⁰Angachāng kakā kathar yurbing nathumna shaipaisera.”

²¹“Thāda kathi sā nathum mashaipaimana; nathumli pamkharuma athumli mishaipaira; lah yur kateili yorsangpaira; kha nathumva PROHO nathumwui Varewui kathara yurna. “Yao anaowui asā ava̱wui na̱ra̱ eina nathumna mahangshaipaimana.”

²² “Kum kachida luiwui eina samkaphang nathumwui theishiraiwui tithe nathum miphalungra.

²³Awui ming leikhavai ana hākhuiki kaji apam chili nathumwui māngumwui eina, drakhāthei, thao, seinao kala yaonao pharākharewui eina tithe chi nathumwui PROHO Varewui mangāli vāshaira; chithāda sāda PROHO nathumwui Vareli nathumna khangachee theithangmei khavaina.

²⁴Kha PROHO nathumwui Varena nathumli somida, awui mingwui vang PROHO nathumwui Varena kapangkhui kahai apam chili nathumna tanāhaida tithe makhuivārarakha,

²⁵chi lupā onkhuihailaga PROHO nathumwui Varena kapangkhui kahai apam chili khuivālu,

²⁶kala lupa chi nawui ningkachāng athishurda sei nilala, lah yaonilala, drakhāthei nilala nathumna shaikhangangai chi loshaida PROHO nathumwui Vare mangāli phāshak phazāda nathum shimkhur katonga ringphapaira.

²⁷Kala shimlui makhaleia lah masamkaphanga, kachichā keinungli khalei Levinaobingli mahorhaialu.”

²⁸“Kakathuma kum kachigata, kumpei atamli, nathumwui tithe katonga keinunglungli rākazipserlu;

²⁹kala nathumwui keinunglungli khalei shimlui masamkaphanga Levinaobing, kha̱minao, marānao, ra̱meinaobing, athumli mizālu. Chithākha nathumwui otsak kachiva̱li PROHO nathumwui Varena nathumna kasasā-khavavā kachiva̱li somira.”