Read Tangkhul Naga KHALATLUI 15 Bible Online

KHALATLUI 15 - Tangkhul Naga bible

KHALATLUI 15

¹“Kum kashine kapei atam kajida, nathumna leiman saikora yangmida chihomira.

²Kala hithāda chihomira: khongnainaoli chishut kahai chi kachishuta mi kachiva̱na chihomira, kaja PROHOna chihokhamiwui pongli phongmihaokada khongnainao kala achināli mapoluimara.

³Yur kateile nathumna pokhuilu; kha nachinā ngarāwuili khalei saikora mapoluialu.”

⁴“Kha nathumwui ngachaili kachāma mi maleimara, (kaja PROHO nathumwui Varena samphang ngasak khavai miki kaji ngalei chili akasom chitharan, PROHOna nathumli somira),

⁵ina aja nathumli kagaso hithāda PROHO nathumwui Varewui kahāng nganāda iwui ningkhami mayontitakha.

⁶Kaja ngashit kahai athishurda PROHO nathumwui Varena nathumli somida yur kachungkhali nathumna chishutra, kha nathumma mashukmara, kala nathumna yur kachungkhawuitungli mungra, kha athumna nathumle mamungmara.”

⁷“PROHO nathumwui Varena khami ngalei chili nathumwui keinung alungli kachikathā nachinā kachāma mi leiakha, nathum chikathā nachināli malung mamararkhamhaialu, lah pāng makhalanhaialu;

⁸kha nathum mingairereo awui khavavāt chi yanglaga chishutkapapai chishutta yangmilu.

⁹Makhamashung ningphanin wuklung mazang khavai ning ngasharlu, kaja ‘Ara kashine yangkhame kum ungshungki jiura’ da phaninglaga kachāma nachināli sākashi mikyan eina yanglaga ali khikhala mamiakha, ana nawuitungli PROHOli khangakao tharan, nawui vang morei ngasāpaishina.

¹⁰Nathumna athumli khami chitharan, kala nawui ningli maringkaphā maleila ali mingairereo miakha, hikathāwui vang PROHO nathumwui Varena nawui otsak saikorali somira.

¹¹ Kaja ngalei chili kachām-khangai mashimānlakmara, chiwui vang eina ina kagasona, nathum ngalei chiwui kachāma khangazana nachināli mingairereo eina milu.”

¹² “Kalikha nachinā Hebrew sha̱naoranu, mayarnaoranu, nali yorsangakha, ana nali kum tharuk otram ngatha̱mira, kala nana kashine kum ali nawui eina thāda chihohaoki kajina.

¹³Kala nana ali kachiho tharan khamasai eina machihopaimana;

¹⁴Kha PROHO nathumwui Varena nali sokhami athishurda, nawui yaoshangwui eina nilala, nawui zāt nilala, drakhāthei nilala yarkapai chi ali pāng tonglak eina yarra.

¹⁵Nathum phaningunglu kaja Egypt ngaleili nathum raonao sāsai, kala PROHO nathumwui Varena nathumli ngatangkhuimi; chiwui vang eina ina aja nathumli hi kagasona.”

¹⁶“Kha ana nali kala nashi shimkhurlila leikashiwui vang, ana ‘I nawui eina mathuimara’ kaja nawuili kapam ringphaakha,

¹⁷nana nāhut kasui akha khuilaga khāmongli sa̱shānlu, chithakha ana nawui raonao sāchingra. Kala nawui rao sha̱naolila chithāpapamra.

¹⁸Nana ali khalem eina chihohailala nawui vang kasak maleimana, kaja ngalangmanli khani shida mataida ana kum tharuk nali otram ngatha̱mi kahaina. Chiwui vang nawui kasasā kachiva̱li PROHO nathumwui Varena somira.”

¹⁹ “Nawui pharākhare avānao saikora, seilala, yaolala, nawui PROHO Vare chili tharchigatki kajina; pharākhare sei eina ot masāpaimana kala pharākhare yaola yaohah machichappaimana.

²⁰Kha kum kachida na kala nashi shimkhurna, PROHO nathumwui Varena kapangkhui kahai apam chili, PROHO nathumwui Varewui mangāli shaiki kajina.

²¹Kha achuk makapeiya, phei katek nilala, khangapeo nilala, khangakhai-khangarai nilala leiakha PROHO nathumwui Vareli machigatpaimara.

²²Chikathā chiya kachichā keinungli shailu; chaonao lah kahunga chaovāsā kashai thāda, kathara kala makathara minala shaipaisera.

²³ Nathumna chiwui ashee mashaipaimana, asheeva ngaleili tara̱ heikatha̱ thāda heitha̱haolu.”