Read Tangkhul Naga KHALATLUI 16 Bible Online

KHALATLUI 16 - Tangkhul Naga bible

KHALATLUI 16

¹ “Abib kachāngli PROHO nathumwui Vareli makānkhami phanit mayonda khayāshilu; kaja Abib kachāng ngayāshong PROHO nathumwui Varena nathumli Egyptwui eina thānshokmi.

²Awui ming leikhavai PROHOna kapangkakhuia apam chili, nathumna sei nilala lah yao nilala makānkhamiwui pha̱kaphayā nathumna PROHO nathumwui Vareli chigatra.

³Nathumna khawok kazang khamui eina ngasoda chi mashaipaimara; shinithang khawok makazang khamui kachotkachāngwui khamuimāng shaira, kaja nathumna Egypt ngaleiwui eina kashok tharan thaklak eina thuihaowa; Egyptwui ngalei eina kashok zimiksho chi nathumna mirin peida phaningungching khavaina.

⁴Nathumwui leiretlungli, shinithangwui vang khawok kaho chi mahaipaimara; kala nathumna kharethang pha̱kaphayāwui sā chila ngayā haida kazing mathangnampaimara.”

⁵“Nathumna makānkhamiwui pha̱kaphayā kachigat hi PROHO nathumwui Varena khami keinungbingwui alungli masāpaimara;

⁶kha PROHOwui aming leikhavaiwui vang, nathumna Egyptwui eina shokthang, ana kapangkhuiki kaje apam chili ngazin zimik katun atamli pha̱phayāki kajina.

⁷Kala nathumwui PROHO Varena kapangkhuiki kaji apam chili hangshailu, kala ngathor nathumna kachichashiwui kachonshimli latungra.

⁸Tharukthangwui vang nathumna khawok makazang khamui shaira; kala kashinethang yarui chingri kahai kazip khuilaga PROHO nathumwui Vareli sochikatra; chithang ot masāpaimana.”

⁹ “Nathumna chāngkui singphokthangwui eina thuida haptā shini shānkhuilu.

¹⁰Chiwui thili haptāwui phanit nathumwui PROHO Vareli mayonlu kala PROHO nathumwui Varena nathumli sokhami athishurda nathumwui mikhangangai chi Vareli chigatlu;

¹¹kala nathumna PROHO nathumwui Varewui mangāli, na eina nanaomayarabing kala nanao ngalāva̱bing, nawui rao mayarnao eina raosha̱nao, nathumwui keinunglungli ngasokapama Levinaobing, kha̱minaobing, marānao, kala nathumli ngasokapama ra̱meinao, PROHO nathumwui Varena amingwui vang kapangkhuiki kaji apam chili ringphāngarumra.

¹²Egypt ngaleili nathum raonao sāsai kaji phaningungda nathum ningkhami hi ning ngasharda mayonchinglu.”

¹³ “Nathum theishirai kala drakhāra̱ surkhavaiwui eina kazipkakhui chitharan shinithang chumpha̱ phanit mayonra;

¹⁴phanit hili na kala nanaomayara kala nanao ngalāva̱, nawui rao sha̱nao eina mayarnao, Levinaobing, ngasokazat kha̱mi, marānao, kala ra̱meinao nathumwui keinungli khaleibing ringpharumra.

¹⁵Shinithangwui vang PROHO nathumwui Varena kapangkhuiki kaji apam chili nathumna phanit chi mayonra; khikhalajila nathumwui pāngwui ot saikora kala heiun saikorali PROHO nathumwui Varena somira, chieina nathum mathānlakhaora.”

¹⁶“PROHO nathumwui Varena kapangkhuiki kaji apam chili nathum mayarnaobing hupta, kumkhali kathumshida: khawok makazang khamui phanit, haptātāwui phanit, kala chumpha̱li vāphalungra. Athumna PROHOwui mangāli khamasai eina mavāpaimara;

¹⁷kha PROHO nathumwui Varena nathum ava̱va̱li somi kahai athishurda kachichāwui kashap achigatra.”

¹⁸“PROHO nathumwui Varena khami nathumwui keinung kachiva̱li, nathumna shang-shangwui athishurda bicharsamebing kala otva̱bing phāsangra; kala athumna mibingli khamashung eina bichar sāmira.

¹⁹ Mashun nathumna mangui ngasakpaimana; nathum mijang masāpaimana, pheizā mazāpaimana, kaja pheizā kazāna thangkhameiwui mik ngapeo ngasakta khangarongli yonngasaka.

²⁰Khamashung, kala mashun chimāngli nathum shurlu, kaja PROHO nathumwui Varena nathumli miki kaji ngalei chi samphangda nathum ringra.

²¹ PROHO nathumwui Varewui vang nathumna sakāki kaji hanphut maningla thingrong khangatei Asherahwui tarung kathā mashunpaimana.

²²Kala nathumna PROHO nathumwui Varena ningkakachai lungshom mashompaimara.”