Read Tangkhul Naga KHALATLUI 19 Bible Online

KHALATLUI 19 - Tangkhul Naga bible

KHALATLUI 19

¹ “PROHO nathumwui Varena yur kateibingli katathaida athumwui ngalei nathumli mida athumli kasham kahai tharan, kala athumwui keinungbingli, kala athumwui shimli nathumna akapam tharan,

²PROHO nathumwui Varena mikahai ngalei chiwui alungli keinung kathum phaishokhailu.

³Nathumna shongfa sāda PROHO nathumwui Varena khami ngalei chi khum kathum sālaga leiret ava̱va̱li hikathā keinung hailu, chieina sanguihaida mi sākathatbingna chili yāmsang khavaina.

⁴“Mi sākathatabingna apam chili yāmvāda awui mirin kankhui khavai apong hithai, rida yuikashi yangkashi maleila awui khongnaili makatheiwui vang sāthathaiakha, kaja—

⁵khararli thing ata̱kida vālaga awui ngahā ngahingshokhaida angasotali saza̱da thihaiakha, awui mirin kankhui khavai hikathā keinungli yāmsangra.

⁶Chi maningakha, malung thuimahungda leilakha asheewui athut khuiki kajipana shongfa tāhaoda angaphanrothaida, mipa chi mathingayisa-ilala, kaja ana awui khongnaili yangshāt maleisālala ali asāthatrot haipaishina.

⁷Chiwui vang ina nathumli kagaso hina, keinung kathum phaishokhailu.

⁸Kala navā ngarāli PROHO nathumwui Varena nathumli mira da ngashit kahai athishurda nathumwui ngalei haksangmiakha—

⁹kala ina aja hāngkahai ningkhami hi nathumna ning ngasharda mayontitta PROHO nathumwui Vareli leishida awui thi shurchingakha— nathumwui keinung kathum hili khangatei keinung kathumla ngarumsangluira.

¹⁰Chi maningakha, PROHO nathumwui Varena nathumli khami shimlui chili khayon makhalei mili ashee kashokwui khayon nathumwuitungli tāpaishina.

¹¹“Kha kachikathā mina yangkakharingwui vang awui khongnaili shongrimda marlak eina shaoza̱da thihaida ana hikathā keinungbing hili yāmvāhaiakha,

¹²chitharan keinung chiwui khararnaobingna chikathā mi chi rāphākhuilaga athut hāngsangki kaje mi chiwui pāngli horsangmida sāthat ngasakra.

¹³Nathumna ali yanglaga malumashanpaimana, kha Israelwui eina khayon makhalei mili sākathatwui khayon sāmathāda, china nathumwui vang phāmei khavaina.

¹⁴ “PROHO nathumwui Varena khami ngalei chili asomda nathumwui samphangrān chi kakhui tharan, achālakhawui mina sahairakasā thari maphurpaimara.

¹⁵ “Mithitkuikai tui nilala, khayon ot nilala, hikathā sahaoda kaphenwui vang shākhi akhamāngwui tui makhuipaimana; khani maningakha kathumna shākhi saakha kaphen chi mayāpaira.

¹⁶ Kalikhada mi akhana kachikathā mi akhali makhamashunga shākhi sāda khayon phenakha,

¹⁷chitharan shongva̱ khaninina PROHOwui mangāli rida phungkasā pāngmonbing eina bicharsamebingwui mangāli khuikāra.

¹⁸Bichar sāmena meisā eina ngathingkhuilaga minamda phenphāphā kaji achinā chile,

¹⁹ shongrān miki kaji chi kaphenapali kashong lāngra; chithāda nathumwui alungli makaphā ot kasā tharngasakra.

²⁰Kala mi kateina shālaga ngacheeda hikathā makaphā ot nathumwui alungli masālengluimara.

²¹ Nathumna mik eina yanglaga malumashanpaimara; manglāwui vang manglā, mikwui vang mik, hāwui vang hā, pāngwui vang pāng kala pheiwui vang phei hāngsangra.”