Read Tangkhul Naga KHALATLUI 2 Bible Online

KHALATLUI 2 - Tangkhul Naga bible

KHALATLUI 2

¹ “Chiwui thili PROHOna ili hāngkahai athishurda ithumna ngareikhuida Red Seashong vākhavai lamhānglungli zata, kala Seir Kaphungli kasāngkha kuizata.

²“Chiwui thili PROHOna ili hānga,

³‘Nathumna phungreiram hili kuizatta sangnāhaira; ara atungshong ngareishangulu.

⁴ Kala mibingli hānglu, ara nachinā Seirli kapāna Esauwui naomayarabingna pamkhavai ngalei chi kānki jihaira, athum nathumli ngacheehaora. Chieina ning ngasharlu;

⁵athumli mangasungalu; kaja ina athumwui ram akhala nathumli mamimara, phei naisang khavai rikkha eina tangdala mamimara; khikhalajila Seir Kaphung hi Esauna samphangrān ina ali mikahaina.

⁶Nathum zākhavai kashakazā pheisā milaga athumwui eina lozālu, kala nathum mangkhavai tara̱la pheisā eina lomanglu.

⁷Khikhalajila nathumwui kasāsā saikorali nathumwui PROHO Varena nathumli somihaira; nathumna khamashā lamhāngli kasāngkha kazatla ana thei; kum hangmati hili PROHO nathumwui Varena ngasomida nathum khikha mavātlakmana.’

⁸Chithāda ithumna zatvāmamānda ithumwui achinā Seirli khalei Esauwui naomayarabingwui eina kanvāmamānda, Arabah shongfa eina Elath kala Ezion-geberwui eina thuihaowa. “Kala ithumna ngareikhuida Moabwui lamhāngshong vāhaowa.

⁹ Kala PROHOna ili hānga, ‘Moabnaobingli masingkharākalu lah rai sākhavai mangasungalu; kaja ina athumwui ram akhala nathumli mamimara, khikhalajila ina Ar hi Lotwui naomayarabingli athumwui samphangrān mikahaina.’

¹⁰(Rida Emimnaobing chili kachungkha pānsai; athumla Anakimnaobing thāda mi juilaka;

¹¹Anakim kaji thāda athumlila Rephaim hoi, kha Moabnaobingna athumli Emim hoi.

¹²Hornaobingla rida Seirli pānsai, kha Esauwui naomayarabingna yuihaida kashamhailaga athum pamkahaina; PROHOna Israelli mikahai athumwui samphangrān ngalei chili kasā tākam eina athumna chithāda sai).

¹³‘Ara ngakarthuilu, kala Zered kong makānlu.’ Chieina ithumna Zered kong makānkai.

¹⁴ Thot chiwui rai kasābing PROHOna ngashit kahai thāda athum mathingakānranglakha eina tangda ithumna Kadesh-barneawui eina zatphokta Zered kong kakān kum thumrāda chishatna.

¹⁵Kaja athum mathingakānranglakha eina tangda PROHOna athumli mamayālakmana.

¹⁶“Chithāda raimibing chi mibingwui ngachai eina thiser kahaiwui thili,

¹⁷PROHOna ili hānga,

¹⁸‘Aja zimiksho Moabwui thari Arli nathumna kānkāra;

¹⁹ kala nathumna Moabingwui tharili vākashung tharan athumli masingkharākalu, lah mangasungalu, kaja ina Ammonwui naomayarabingwui ngalei akhala nathumli mamimara, kaja Lotwui naomayarabingna samphangrān ina athumli mikahaina.’

²⁰(Apam chili Rephaimwui ram hosai; kaja rida Rephaimnaobingna chili pamsai, kha Amonnaobingna athumli Zamzummim hoi,

²¹haklak kahai kala mi mayālak kahai, kala Anakimnaobing thāda mi juilaka; kha PROHOna athumli rida shimān ngasakhaida kala athumna akashamhaida chili apān kahaina.

²²Seirli pānkasā Horbingli PROHOna shimān ngasakhaida Esauwui naongarāli mida athumna aja rāshungda khalei kathāna.

²³Avvimnaobingwui vanga, Caphtorli khalei, Caphtornaobingna Gaza vāshungda sākathānmihailaga athumna ngapaikakhuina).

²⁴‘Ngakarthuida zatphoklu, kala Arnon tampākshong vālu; yanglu, Heshbonwui awunga Amorpa Sihon kala awui ngalei nathumwui pāngli ina horsangmi kahaina; awui ram khuiphokuda rai saulu.

²⁵Aja okathuili khalei miyur saikorawui ningli nathumli khangachee kala ningkakashak, nathumwui pao shālaga athumna kathirda reorang khavai ina sangmihaora.’

²⁶ “Chiwui vang eina ina Kedemoth lamhāngwui eina Heshbonwui awunga Sihonli paome chihovāda chingri kahai tui hānga;

²⁷‘Ili nawui ngalei hi eina kakān ngasakmilu; ina shongfamāngli zatmara, uishong lah yāshong makānshoklakmara.

²⁸ina zākhavai kashakazā aman mida nawui eina lozāra, ina mangkhavai tara̱la aman mida lokhuira; shongfamāng kakān ngasakmilu,

²⁹ithumwui PROHO Varena ithumli mikahai ngalei Jordan kānda mavāshungranglakha eina tangda, Seir ngaleili Esauwui naomayarabingna kasā thāda kala Ar ngaleili khalei Moabnaobingna kasā thāda khamayāmilu.’

³⁰Kha Heshbonwui awunga Sihonna ithumli awui lam makān ngasakthuwa, kaja PROHO nathumwui Varena aja khami thada nathumwui pāngli horsangmi khavai awui wuklung mararmihaowa.

³¹Kala PROHOna ili hānga, ‘Yanglu, Sihonla, awui ngaleila nathumwui pāngli sangmiphok kahaina; nathumna awui ngalei chi khuikhavai khangarān sāphokulu.’

³²Chieina Sihonna awui mi saikorali ngasoda ithumli ngarar khavai Jahazli rai.

³³Kala PROHO ithumwui Varena ithumwui pāngli horsangmida, ala, anaomayarabingla, kala awui mi saikorali ithumna yuihaowa.

³⁴Chitharan ithumna awui keinungbing saikora yuikhuida peichaoda sākhayāngmiserhaowa; sha̱nao, mayarnao, naoshinao akha nida mataimilakmana;

³⁵keinungli khalalei ot eina ngasoda ithumna sha̱keila ngaponkhui.

³⁶Arnonwui kaphungpheili khalei Arer eina thuilaga, kala tampākli khalei keinung chiwui eina thuilaga Gilead eina tangda ithumwui vang keinung phākho juinahaowa kaji maleilakla yuihaowa; PROHO ithumwui Varena ithumwui pāngli horsangmisera.

³⁷PROHO Varena mavālu kaji pam, kaja Jabbok kongpheili khalei Ammonwui naobingwui keinungmāngli ithumna mavākazangna.