Read Tangkhul Naga KHALATLUI 20 Bible Online

KHALATLUI 20 - Tangkhul Naga bible

KHALATLUI 20

¹“Nathumna yangkashebingli ngarar khavai khavā tharan, siguibing kala siguigaribing kala raimibing, nathumli chungkhamei theilaga nathum mangacheealu; kaja Egypt ngaleiwui eina thānshokkhame PROHO nathumwui Varena nathumli ngasomida lei.

²Kala nathumna raiphungli vākhanganai tharan pāngmonna mangāshong vāda mibingli hāngra;

³‘Nganālu, O Israel, aja nathumna yangkashebingli ngarar khavai rāhaira; nathumwui ning mashimānhaialu, ngacheeda makathiralu lah athumli yanglaga khangachee-khangachāla maleialu;

⁴kaja nathumli ngasokhame chi PROHO nathumwui Vare china, nathumwui yangkashe chili ngararmida nathumna khayui ngasāra.’

⁵Chiwui thili otva̱bingna hāngra, ‘Shim sāhailaga dharkat makārang kaji khipā leikhala? Leiakha athumli hanunghaoranu, chi maningla raili thisanghaiakha mi khangateina dharkat kahaora.

⁶Drakhārong lingsanghailaga maphāshailakrang kaji khipā leikhala? Leiakha athumli shimli hanunghaoranu, chi maningakha a raili thisanghaida mi khangateiwui sāhaora.

⁷Ngalā khāmhailaga mashakzārang kaji khipā leikhala? Leiakha athumli shimli hanunghaoranu, chi maningakha a raili thisanghaida kateina ali khuihaora.’

⁸Chili lāngda otva̱bingna hithāda hāngra, ‘Ngacheenahaida malung tātung kahai mi leila? Leiakha athum shimli hanunghaoranu; chi maningakha khangateibingla athumli theilaga athumwui thāda ning suitārumhaipaishina.’

⁹Kala otva̱bingna hāngkup kahaiwui thili mibingwuitungli raimi kathānabing kapangsangra.

¹⁰“Nathumna keinung akhali rai sākhavai khavā tharan, chingrihai khavai apong mida ngazekfalu.

¹¹Kala athumna nathumli chingri khavai mayaakha, chili khalei mi saikorali nathumwui vang thoukai phungngasakta nathumli otram ngatha̱mi ngasaklu.

¹²Kha china nathumli chingrihai khavai mamayāmada, nathumli ngasungakha, nathumna keinung chi kuinamhaolu;

¹³kala PROHO nathumwui Varena nathumwui pāngli horsangkhami tharan, nathumna chiwui mayarnao saikora raighai eina shātthatra.

¹⁴Kha prei-naosanbing, sha̱kei kala keinung chiwui alungli khalei thongthāng saikora nathum khalattawui vang ngaponkhuipaira; kala PROHO nathumwui Varena khami yangkashebingwui eina ngaponkakhuibing chi eina nathumna ungringphakhuipaira.

¹⁵Hili khalei miyurbingwui keinungbing maningla nathumwui eina tāda khalei keinung saikorali nathumna chithāda sāserki kajina.

¹⁶Kha nathumwui shimlui sāda PROHO nathumwui Varena khami, miyurbingwui keinung saikora chili khalei mila, sha̱keila akha eina tangda maring ngasakpaimara,

¹⁷kha nathumna Hitnaobing, Amornaobing, Cannannaobing, Periznaobing, Hivnaobing kala Jebusnaobingla, PROHO nathumwui Varena kagaso athishurda saikora shaothatserphalungra;

¹⁸chithāda sāda nathumli athumna PROHO nathumwui Varewui mangāli morei sākhavai, athumwui varebingli otram khangatha̱ thāda ningkakachai ot chi nathumli matamchitheimara.

¹⁹“Nathumna keinung akha khuikhavai kasāngkha rai ngararda kuinam kahai tharan, ngahā eina thingbing chi masākazamhaialu, kaja nathumna athei-araibing chi phāshaira, kha arong mata̱tekalu. Chili khalei thingbing chila nawui yangkashebingli sākathat thāda thingbing chi haokazamrala?

²⁰Athei mashaipaimana da kathei thingrongbingva ta̱teklaga keinung chi mayuikhuiranglakha eina tangda nathumna ngaveithing sāpaira.”