Read Tangkhul Naga KHALATLUI 22 Bible Online

KHALATLUI 22 - Tangkhul Naga bible

KHALATLUI 22

¹ “Nachinā akhawui seilapai, yaolapai ma̱zatkasā theilaga matheirekapaimana, shimli homungmiki kajina.

²Kha ana katāva̱li pamhaida, maningakha ali makatheiwui vang mahomungmipaiakha, ana chi maphārāranglakha eina tangda nawui shimli haisara; chiwui thili ali hanmira.

³Nachināwui gadhālapai, kachonlapai, tātunghaikasā ot saikora nathumna chithāda hanmiserphalungra; mayangkheihaipaimana.

⁴“Nachinā akhawui gadhālapai, seilapai amaili saotahaikasā theiakha thāda mik eina mayanghaipaimana; nathumna chi khāngshokngachonki kajina.

⁵“Mayarnaona khangavai sāri sha̱naona mangavaipaimana; kala sha̱naona khangavai sāri mayarnaona mangavaipaimana; ngavaiphāphā kaji hi PROHO nathumwui Varewui mangāli ningkakachai otna.

⁶“Nathumna kalikha thingtunglilapai, ngaleililapai, vānaothip leisāda, anao zangsālala, ara̱ pumsālala, nathumna ava̱ eina ngasoda makhuiserpaimana;

⁷nathumna ava̱ kashamhailaga anaomāng khuiki kajina; chi nathum ringphamei khavai kala okpeimei khavaina.

⁸“Kachikathāna shim kadhar saakha, shimtungli pāngpo sāsangranu, pāngpo makāmada mi tatungthathaiakha, asheewui khayon nawui shimli rāpaishina.

⁹ “Nathumwui drakhā yāmguili athā ayur khani mayaosangpaimara, nathumna yaosang kahai theishirai kala drakhāthei khamathei saikora chi kathara shimli makhuisangkapai ngasāhaipaishina.

¹⁰“Nathumna sei eina gadhā seiot masingrumpaimana.

¹¹“Nathumna sahā eina khamanaka kazaira̱ manātta kachon rakkharum mangavaipaimara.

¹² “Nathum khalatta faror khavai nathumwui khangavai kachon achikun matili chontheira̱ sāsangserlu.

¹³“Kalikha mi akhana ngalā khuida, ali ngasohailaga, ali yangkharinghaida,

¹⁴kala ali khayak khavai kala aming zakshi khavai, ‘Sha̱naopava̱ hili ina ngakumkida kakhuina, kha ina kachingva̱na da theikhui khavai maleimana’ da hāngakha,

¹⁵“Ngalāva̱shi avā eina ava̱va̱na bichar samebingwui mangāli kachingva̱wui shākhi mikhavai kha̱ chiwui ngaveili khuishokmiphalungra,

¹⁶kala ngalāva̱ chiwui avāva̱na khararnaobing chili, ina inaongalāva̱ hi mayara hili ngakum khavai khamina, kala ana ali yangkharinghaowa;

¹⁷kala yanglu, ana ali khayāmalā khavai phenda, ina nanao ngalāva̱ kachingva̱na da theikhui khavai maleimana” jihaowa. Kala kachingva̱na lah maningmana kaji theikhui khavai kachon hi eina theira, da hāngra. Kala kachon chi khararnaobingwui mangāli hārchitheira.

¹⁸Chieina keinung chiwui khararnaobingna mayara chili khuida shaora;

¹⁹kala athumna ali lupāsā shekel shākha eina kashong lāngra; kala anao ngalāva̱li maishi khangasakwui vang lupā chi ngalāva̱wui avāva̱li mira, kaja Israelwui kachingva̱ akhali maikashi mihaowa; kala apreiva̱ sāpapamra kala ali mirin peida ngakum ngasakpapamra.

²⁰“Kha ngalāva̱ chiwuitungli a hi kachingva̱ maningmana kaji theishingkhuihaiakha,

²¹ Israelwui alungli, ana avāva̱wui shimli khayorva̱wui otsak kasāwui vang ngalāva̱ chili avāva̱wui shim khāmongpheili shimenshokta, keinung chiwui mibingna ngalung eina horthathaora; chithāda nathumwui alungli makaphā chi sāmathāra.

²² “Kalikhada mi akhana miwui preiva̱li ngasopikasā theiakha, mayarala preiva̱la khanini thira; chithāda nathumwui alungli makaphā chi sāmathāra.

²³“Kalikhada mākhām kahaiva̱ ngalānao akhali, keinungwui alungli mayarnao khangatei akhana samphangda ngasopimihaiakha,

²⁴ nathumna ani khaninili keinungwui ngaveili shimenshoklaga lunggui eina horthatra; kaja kha̱lung chili ngalāva̱ china makhangakaowui vang anili shaothatra kala mayara china khongnai preiva̱li ain kaida phophāmi kahaiwui vang shaothatra; chithāda nathumwui alungli makaphā chi sāmathāra.

²⁵“Kha mākhām kahaiva̱ sha̱nao akha kharar khamaseli samphangda mayara china ali tukkhuida kala ali ngasopimihaiakha, ali ngasokapia mayarapā chimāng thira.

²⁶Kha ngalāva̱li nathumna khikha sākhavai maleimana; ngalāva̱ chiwuitungli kathiwui tandi khikha mikhavai maleimana, kaja hiya mi akhana awui khongnaili rai thatta shaokathat eina ngaraichai;

²⁷kachiwui vang jila ana mākhām kahaiva̱ chili khararli samphangda, kala ngalāva̱ china ngakaolala awui vang kankhuimi khavai mi maleisāmana.

²⁸ “Kalikhada mi akhana kachingva̱ mamākhāmrang kaji sha̱nao akhali tukkhuilaga ali ngasopida, anili theihaiakha,

²⁹mayara china ngalāva̱shi avāva̱li lupāsā shekel hangphangā mira, kala ana ngalāva̱ chili phophami kahaiwui vang ngalāva̱ chi mirin peida apreiva̱̱ sāphalungra.”

³⁰ “Mi akhana avāva̱wui preiva̱li mangakumpaimana, lah khayāla malānpaimana.”