Read Tangkhul Naga KHALATLUI 25 Bible Online

KHALATLUI 25 - Tangkhul Naga bible

KHALATLUI 25

¹“Kalikha mi khani tui shokta anina hanga̱ shimli kāda, bichar samebingna aniwui ngachaili khamashunga chili chihomihaida khayona chili tukkhuilaga,

²khayona mi chili lijei mira jiakha, hangva̱wui mangāli ali ngakhum ngasakta awui kashong kharit khangaveng athishurda lijei eina shaora.

³ Ali lijei hangmati shaora; kha chili mahenpaimara; kalikha mi akhana chili lāngda shaohaiakha, nathumwui miktāli nachinā mai shinahaora.

⁴ “Mā naida khalei mukkāwui khamor makhalappaimana.

⁵ “Kalikhada chinaoni okthuilaga, akhana mayarnao mapharāla thihaiakha, kathipawui preiva̱ chi shimkhur katei kha̱mili mafavāpaimana; awui gaharawui achināna ali khuira, kala ana apreiva̱nada khuida ngakumra, kala ali gaharawui sarān varān chi achināna sāmira.

⁶Kala ana naomayara pharākhare chi thikahaia achināwui ming phokmira, chithāda sāda awui aming Israelwui eina mashimān ngasakmara.

⁷ Kala kalikha ana achināwui preiva̱ chili makhuimara jiakha, preiva̱ china khararnaobingwui ngaveili vāda hāngra, ‘Igaharawui achināna Israelwui alungli igaharawui ming leiching khavai mamayāmana; kala achinā preiva̱ ili mangakumara jihaowa.’

⁸Chieina keinung chiwui khararnaobingna ali hokhuida khangazek tharan, ‘I ali mangakumphalungmara’ jihaiakha,

⁹yarui mangāli preiva̱ china mayarapawui pheihop asutshokmihailaga maili mashorrorda hāngra, ‘Achināwui shimkhur masākakāpā chili hitharanu.’

¹⁰Kala awui shimkhur chili Israelwui alungli, pheihop sutmi kahaiya shimkhur da hora.

¹¹“Mi khani khangama̱ tharan, kala preiva̱na ali pāng kāda khalei gahara chiwui ngalemli vāda, kashaopa chiwui khayāli angakhunakha,

¹²nathumna preiva̱ chiwui pāng katattāmihaora; lumashan khavai maleimana.

¹³ “Nathumwui akhaoli kharit onkhavai mari yur kahak akha kateo akha da khani masingalu.

¹⁴Nathumwui shimli tamkhavai lukyur kharei akha kateo akha da khani mangavālu.

¹⁵Onlala tāzakta onlu, tamlala tāzakta tamlu; PROHO nathumwui Varena nathumli khami ngalei chili sāngmeida okthui khavaina.

¹⁶Kaja chikathā ot sāda kateikazā saikora, ngakaishilak eina kasā ot hi PROHO nathumwui Varewui mangāli ningkakachai otna.

¹⁷ “Nathumna Egyptwui eina kashok atamli Amaleknaobingna nathumli khi sākhala kaji phaningunglu,

¹⁸nathumna chotchānglak eina kala khanangda zatlakha nathumli kathāda rāngarar, kala nathumli naokazatbingli kathāda shātkhamkhala; ana Vareli khangachee maleimana.

¹⁹Chiwui vang eina PROHO nathumwui Varena nathumli mida samphangki kaji ngaleili vāshungda, yangkashi maleiluila PROHO nathumwui Varena nathumli ngasāmkhui khangasak tharan, okathuili Amaleknaobingli maphaningungluilak khavai sāki kajina; nathum hi mamalailakalu.