Read Tangkhul Naga KHALATLUI 28 Bible Online

KHALATLUI 28 - Tangkhul Naga bible

KHALATLUI 28

¹ “Kala nathumna PROHO nathumwui Varewui kahāng nganāda ina aja kaso kahai awui ningkhami hi ningasharda mayonakha, okathuili khalei yur saikorawuitungli PROHO nathumwui Varena nathumli juimeikapta leingasakra.

²Kala nathumna PROHO nathumwui Varewui kahāng nganaakha, sokhami saikora hi nathumwuitungli tāra kala ungshungchaora.

³“Keinungli pamlala, lui vālala sokhami chi nathum ngasāranu.

⁴“Nathumwui phasāwui naotheila, lui vākasanglila, kala sha̱kei saikorala sokhami ngasāra kala seila, yaola somida mataisangra.

⁵Nathumwui māchum singrāmeira, kala nathumwui hamhanla kāmeira.

⁶Nathumna zanglala shoklala sokhami ngasāra.

⁷“Nathumli yangshida khangararbing chili nathumna yuikhavai nathumwui mangāli PROHOna sāmira; athumna apong akha eina rāngararlaga apong shini eina yāmshokra.

⁸Nathumwui chumlila kala nathumna kasāsā saikoralila PROHOna sokhami tāshung ngasakra; kala PROHO nathumwui Varena khami ngalei chili ana nathumli somira.

⁹PROHO nathumwui Varewui ningkhami nathumna mayonda awui thi shurchingakha, ana ngashit kahai athishurda awui kathara mi sāda nathumli theingasakra.

¹⁰Kala nathumli PROHOwui ming eina hokhui kahaina kaji okathuiwui mibing saikorana theira; kala athumna nathumli ngacheera.

¹¹Kala PROHOna nathumli mira da navā ngarāli ngashit kahai ngalei chili nathumli nganantāp eina okthui ngasakra, nathumwui naotheila, sha̱keila, luivatlila mavātlakmara.

¹²PROHOna awui kazingramwui lan shomida nawui ngaleili atam chāda zingrot mira kala napāngwui otsak saikorali somira; kala katei yurbingli nathumna chishutra, kha nathumna athumwui eina mashukmara.

¹³Kala PROHOna nathumli akui sāngasakta, akhamei masāngasakmara; kala ina aja hāngkahai thāda PROHO nathumwui Varewui ningkhami nathumna ningngasharda mayontitakha, nathumli reisang ngasakra, mateosangmara,

¹⁴kala ina aja hāngkahai ningkhami hiwui eina nathumna yashongranu lah uishongranu khangatei varebingli ngareithuida otram mangatha̱alu.

¹⁵“Kha nathumna ning ngasharda PROHO nathumwui Varewui ningkhamibing lah awui shiyan saikora, ina aja nathumli kagaso hi nathumna manganaurakha, khonkashi saikora hi nathumwuitungli rāshokra.

¹⁶Nathumna keinungli pamlala, lah nathumna luili vālala khonkashi chi nathumwui ngasāra.

¹⁷Khonkashi chi nathumwui ngasāda, nathumwui māchum kala nathumwui hamhanla makāmara.

¹⁸Khonkashi chi nathumwui ngasāda, nathumwui naotheila, thingphun luivātla, seila, yaola mamataisangmara.

¹⁹Nathumna zanglala khonkashi ngasāra, shoklala khonkashi ngasāra.

²⁰“Nathumwui makaphā kasā chiwui vang kala ili malai kahaiwui vang, nathumli sakathānda kala nathum mathingakānranglakha eina tangda nathumwuitungli PROHOna khonkashi, pa̱khangapā kala ning katheng tashung ngasakra.

²¹Nathumna vāzangda samphangki kaji ngalei chili ana nathumli mamutranglakha eina tangda, PROHOna nathumli kazātkashi mavān ngasakmara.

²²PROHOna nathumli suikao kazāt, kakharur, worda khangashei, mimao, kazing kāngda meiwui kasā kathā, theishiraili majing katāk; zakkashi ot saikora hina nathum mathingakānranglakha eina tangda nathumli shurzatra.

²³Kala atungshong khalei kazingram pithrai thāra, kala azingshong okathuina mari thāda sāra.

²⁴Kazingramwui eina PROHOna kazing rotā ngasakta, nathum makānranglakha eina tangda nathumwui ngalei chifa-chihā ngasā ngasakra.

²⁵“PROHOna nathumli nathumwui yangkashibingwui mangāli mai shingasakra; nathumna apong akha eina vāra, kala athumwui eina apong shini eina yāmra; kala nathum okathuiwui wungram saikorana mayangkhangaia ngachee khavai ngasāra.

²⁶Nathumwui kathingun khamasaili yongkazata vānaowui kala okathuili khalei ramsābingwui kashakazā ngasāra; kala athumli yāmkhame mila maleisāmara.

²⁷Nathumli maraikapai Egyptwui moksā, raiji kathā, ahui kazātkashi eina PROHOna nathumli chotchāng ngasakra.

²⁸PROHOna nathumli chotchāng ngasakta kapāla pāngasakra, mikla ngapeo ngasakra kala ning pa̱ngapā ngasakra;

²⁹kala khangapeo mina tangkhamangli kachupkazat thāda, ngashunshong nathumla kachupzatra; kala nathumwui ot saikorali nathum mataikasang masamphangmara, kha nathumwui eina ngapaikhuida rekharekchingra, kala chili nathumli ngachonmi khavai mi khipākha maleisāmara.

³⁰Nathumna ngalā khāmhailala, khangateina ngasopira; shim sākhuilala chili kapam masamphangmara kala drakhāthei lingsanghailala athei kashai masamphangmara.

³¹Nathumwui sei taikathat theilala nathum chi kashai masamphangmara; gadhāla mina tandi eina ngapaithuihaora kala mahanmiluimara, kala yangkashibingna nathumwui yao ngapaithuihailala nathumli ngachonmi khavai mi khipākha maleisāmara.

³²Nanao mayarabing kala nanao ngalāva̱bing khangatei mili mikahai chi nathum mik eina theida thangkachida phaninglala; nathumwui pāngli pangshap maleithukada nathumna mangapaikhuithukmara.

³³Nathumna ngalang zarda lui vāsang kahai nathumwui athei-arai chi makathei yur akhana shaimihaora; kala nathumli rekakharek kala kachipat katang mavaimara.

³⁴Kala nathumwui mikna kashokshok chi theilaga nathum ning pāhaora.

³⁵PROHOna nathumli chotchāng ngasakta khuksaolila, pheilila zakkashi moksā shokngasakta marailuimara, pheimayā eina thuilaga kuitungyāng shangshungda shokngasakra.

³⁶“Nathumna kachipama nathumwui awunga kala nathum saikorali, nathumna kala navā ngarānala makathei yurwui pāngli PROHOna yorsangmira, kala chili nathumna thingwui lah ngalungwui varebingli khorumra.

³⁷Kala PROHOna nathumli khuikhavā pam kachida ngachee-ngachāda kachipā chānjam sākhavai, meisum tantakli mana̱shivaira.

³⁸Nathumna mā kachungkha yaosangra, kha kateokhamang hātkhuira, kaja khaohna shaimiserhaora.

³⁹Nathumna drakhātheila lingsangda sāmathāmira, kha chiwui ara̱ khamang lah phākakhuila masamphangmara; kaja kalomna shaimihaora.

⁴⁰Nathumwui leiret peida oliverongla leira, kha nathum chiwui thao eina neokakhui masamphangmara; kaja olivethei ja̱taserhaora.

⁴¹Nathumna nao sha̱naola mayarnaola pharākhuira, kha nathumwui mangasāmara; kaja mina tukthuiserhaora.

⁴²Nathumwui thingrong kala ngaleiwui athei-araila khaohwui sathuiserhaora.

⁴³Nathumli ngasokazata kha̱mibingna nathumli juimeikhangai juimeira; nathumna suitākhangai suitāra.

⁴⁴Athumna nathumli chishutra, nathumna athumli shukra; athumna akui sāhaora, kala nathumna akhamei sāra.

⁴⁵Khonkashi saikora hina nathumli masākazamranglakha eina tangda, nathumwuitungli tāra kala nathumli raza̱da nathum mayuirarmara; khikhalajila nathumna PROHO nathumwui Varewui tui manganāmana kala ana kaso kahai awui ningkhamibing kala awui shiyan mamayonmana.

⁴⁶Saikora hi nathumwuitungli, ara̱-azāwuitungli katang makhavai matakhak kahai machut sākachitheina.

⁴⁷“Khikhalajila nathum ringphāda leilakha, nathumna PROHO nathumwui Vareli ningli ringkaphā eina mathānda otram mangatha̱mana.

⁴⁸Chiwui vang PROHOna nathumli chihokharā nathumwui yangkashibingli nathumna kathai kala ra̱kachang, phasā khamahong eina, ot saikorali kathai-kachām māng eina otram ngatha̱ra; kala nathumli masāshimānranglakha eina tangda ana nathumli kahungli mariwui kashai chiphunra.

⁴⁹ Nathumna atui-arā makashā, okathui akhangalatwui eina yur akha PROHOna khuirāda nathumli ngarar ngasakra; khalāngwui khayong kathāk thāda rāra.

⁵⁰Azak sākashi miyur, khararnaoli khayā makashiya, lah khanganuiyali maleishikathei,

⁵¹kala nathumli masāshimānranglakha eina tangda nathumwui seinao kala ngaleiwui theishirai shaimiserhaora; nathumwui māngum, drakhāra̱, lah thao, nathumwui seinao pharākasangla, maningakha yaonaola athumna mataimilakmara.

⁵²Athumna nathumwui keinung saikorali kuinamda, nathumna chihānda sākahai kajui kala ngaveitit kahai raipanbing saikora manurkhairanglakha eina tangda athumna keinung saikorali rāzangra, kala chithāda PROHO nathumwui Varena nathumli khami nathumwui ngaleili athumna kuinamhaora.

⁵³Kala yangkashena nathumli kuinam kahai kala chotchangda sikafa atamli PROHO nathumwui Varena nathumli mikahai nathumwui naomayarabing kala naongalāva̱bing, na khalattawui phasā eina kashok athumwui asā nathumna shaira.

⁵⁴Nathumwui alungli ngahuiri kala lumzailak eina nganaokakā mi chi eina tangda achināli, awui leikashe preiva̱li kala nao paisholi mamishai mamizāngaimara;

⁵⁵chithāda sāda ana shaida khalei anaongarāwui asā chi maningakha apāngli khikha maleiluithukada, athum khipālikha eina tangda mamishaimara, nathumwui keinung saikorali kuinam kahai chiwui sikafawui alungli nathumwui yangkashibingna nathumli chotchāngda sifa khangasak tharan.

⁵⁶Nathumwui alungli ngahuiri kala lumzailak eina nganaokakā, preiva̱̱ apheimayā eina tangda ngaleitungli manaisangkakasaiva̱ china awui leikashe gahara, awui naomayara kala naongalāva̱li mamishai mamizāngaimara.

⁵⁷Nathumwui keinung yangkashena kuinamhaida chotchāngda sifa ngasakta chāmrei kahai tharan, awui phei ngachaiwui eina kashok alam kala pharāthadhar naowui asā chi ana ngathumda shaira.

⁵⁸“Kalikhada nathumna awui tekhamatei kala ngacheeshun kahai PROHO nathumwui Varewui mingli ning ngasharda kala lairik hili kapisang kahai ningkhami tui saikora hi mamayontitakha,

⁵⁹PROHO nathumwui Varena nathumwuitungli kala nathumwui ara̱-azāwuitungli hāngkhavai makhalei kachotkachāng, kazāt yur katang mavaila khuirāra.

⁶⁰Kala nathumna khangacheea Egyptwui kazāt saikora chi ana nathumwuitungli khuirāda nathumwui eina khavān mavaimara.

⁶¹Ningkhamiwui lairikli hāngkahaili lāngda kazātyurla, kala kachotkachāng kachiva̱ PROHOna nathumli mashimān ngasakranglakha eina tangda khuirāra.

⁶²Nathum kazingramwui sirā yakkhasālala, nathum mashing kateokhamāng taihaora, khikhalajila nathumna PROHO nathumwui Varewui kahāng manganāmana.

⁶³Kala nathumli PROHOna khamathā sāmida mataisangmikhangai chiyākha, PROHOna kalāshi khavaila shimān khavaila sāra; kala nathumna vāda akhuiki kaji ngalei chiwui eina khuithuihaora.

⁶⁴Kala okathui achikun akhawui eina khangatei akhali PROHOna nathumli kashamvāra; kala chili nathumnala, navā ngarānala makathei thingngalungwui varebingli otram ngatha̱ra.

⁶⁵Kala yurbing hiwui ngachaili nathum ngasāmkakhui masamphangmara, phei khangasām mavaimara; kha PROHOna nathumli ning kachipā sangmihaida mikla matheimara, kala manglā reorangra;

⁶⁶nathumwui mirin ning khamaongna pemtinghaida ngashun ngayā ngacheepamra; kala ringra kajiwui ningkhalum maleimara.

⁶⁷Ngathorshong, ‘Ngazinsi kaja phāra!’ jira kala ngazinshong, ‘Ngathorsi kaja phāra!’ jira, kaja nathumwui ningli khangachee khaleiwui vang nathumwui mikna khangachee khangachā kathei samkaphangna.

⁶⁸Kala ina nathumli mavā ngasakluimara da ngashit kahai shongzā Egyptli PROHOna nathumli marikhong eina phungvāluira; chili vāda nathumwui yangkashibingli nathum khalatta, mayarnao kala sha̱nao raonao sākhavai ayorsanglala khipānakha malomara.”