Read Tangkhul Naga KHALATLUI 30 Bible Online

KHALATLUI 30 - Tangkhul Naga bible

KHALATLUI 30

¹“Kala sokhamila, khonkashila ina nathumli chithei kahai saikora hi nathumwuitungli rāshungda, PROHO nathumwui Varena nathumli kashamkhavā yur kateiwui alungli nathumna phaningkhaung tharan,

²kala nathum eina nathumwui naongarā PROHO nathumwui Vareli hanungda aja ina kagaso saikora hi nathumwui ningla manglāla tongda kahāng khanganā tharan,

³PROHO nathumwui Varena nathumli somi kahai saikora chi hanmira, kala nathumwuitungli lukhamashan tāshungmira, kala ana chaiyāngmi kahai yurbing alungwui eina PROHOna nathumli kazipkhuiluishitra.

⁴ Kalikha nathumli apam ngatateidali chaiyāng ngasakhaisālala, PROHO nathumwui Varena chiwui eina nathumli kazipkhuiluishitra, kala chiwui eina ana nathumli shok ngasakluira;

⁵kala PROHO nathumwui Varena nathumli navā ngarāwui ngalei chili, nathumna samphangluishit khavai thānungmira; kala ana navā ngarāli lāngmeida nathumli shāngmei mayāmei ngasakra.

⁶Kala nathum eina nathumwui naongarāwui ningla PROHO nathumwui Varena ahui rimshokmihaida athumna PROHO nathumwui Vareli ningyāng tongtingda ali leishira, chithāda nathum ringpaira.

⁷Kala PROHO nathumwui Varena khonkashi saikora hi nathumwui yangkashi nathumli rekakharekbingwuitungli sangmira.

⁸Kala nathumna PROHOwui kahāng nganāluishitta ina aja kaso kahai awui ningkhamibing saikora mayonra.

⁹PROHO nathumwui Varena nathumwui otsak saikorali mahāngkharar mataisangmida, nathumwui naotheila, nathumwui sha̱keila, kala nathumwui ngaleiwui theishiraila khavāt maleila mataisang ngasakra; kaja PROHOna navā ngarāli mingairareo eina khami thāda nathumlila mataisang ngasakluishitra.

¹⁰PROHO nathumwui Varewui kahāng nganāda ainwui lairikli kapi kahai awui shiyan kala ningkhami mayonakha, kala nathumna PROHO nathumwui Vareli ning manglā tongtingda ngareiungakha mataisang ngasakra.

¹¹“Khikhalajila ina aja kaso kahai ningkhami hi nathumwui vang masaknāmana, tālak kahaila maningmana.

¹² Hi kazingramli khalei maningmana, chiwui vang ‘Ithumna shāda mayon khavai khipāna kazingram kāda ithumli khuitāmirakhala?’ da nathumna mahāngmara.

¹³Yireilungli khaleila maningmana, chithāda sāda, ‘Khipāna shamadrulungli ithumwui vang zangkhuimida ithumna shāda mayonrakhala?’ da nathum mahāngalu.

¹⁴ Kha tui chi nathumli nganailak eina lei; chi nathumwui ning kala nathumwui khamorli lei, chiwui vang nathum shurshapra.

¹⁵“Yanglu, ina aja nathumli kharing eina kaphā, kathi eina kashi [5] mihaira.

¹⁶ina aja nathumli kaso kahai PROHO nathumwui Varewui ningkhamibing nganāda PROHO nathumwui Vareli leishida, awui shongfali zatakha kala awui ningkhamibing, ain kala shiyan-chikan mayonakha, nathum mataisangda ringra kala nathumna vāzangda samphangki kaji ngalei chili PROHO nathumwui Varena somira.

¹⁷Kha kalikha nathumwui ning ngareithuihaida nathumna manganāsangakha, kala khangatei varebingli khorumda otram ngatha̱thuihaiakha,

¹⁸ina aja nathumli hāngkahai hina kaja, nathum shimānhaora, nathumna Jordan kānlaga vasomki kaji ngalei chili nathum sāngda maokthuimara.

¹⁹Aja zimiksho nathumwui mangāli kharing eina kathi, sokhami eina khonkashi mihaira kaji chi kazing eina ngaleina shākhina, chieina kharing kapangkhuilu, chithakha nala nawui ara̱-azāla okpeira,

²⁰ nathumna PROHO nathumwui Vareli leishida awui kahāng nganāra, kala ali ngavapra; kaja chiya PROHOna navāngarā Abraham, Isaac kala Jacob athumli mirada ngashit kahai ngalei chili nathum okpeimeida ringkhavaina.”