Read Tangkhul Naga KHALATLUI 31 Bible Online

KHALATLUI 31 - Tangkhul Naga bible

KHALATLUI 31

¹Mosesna Israel saikorali hithāda hānglui,

² “I aja zingkum shākha maga̱ kāshunghaira; I zatung zatvā masārarthura. PROHOna, ‘Na Jordan hi makānmara’ jihaira.

³PROHO nathumwui Varena A khalatta nathumli rida vāra; yur kateibing chi ana rida sākhayāngmihaida nathumna angapaikhuira; kala PROHOna hāngkahai athishurda Joshuana nathumwui akui sāda ana mangāli zatta thānvāra.

⁴ Kala PROHOna Amor awunga Sihon eina Ogli kala athumwui ngaleili sāshimānmi kahai thāda athumlila sāmira.

⁵Kala PROHOna nathumwui pāngli horsangkhami eina, ina kaso kahai ningkhamibing chiwui athishurda nathumna athumli sāmira.

⁶ Pingmeida malung zangmeilu, athumli mangacheealu lah ningla machipālu, kaja PROHO nathumwui Varena nathumli ngasomida lei; ana nathumli masākhami maleimara lah horkahaila masālakmara.”

⁷Chiwui thili Mosesna Joshuali hokhuida Israelwui mangāli hānga, “Pingmeida malung zangmeilu; kaja PROHOna avāva̱ ngarāli mirada ngashit kahai ngalei chili nana mibing hili thanvāki kajina; athumwui shimlui chi nana angayarmira.

⁸ PROHOna nathumwui mangāli rizatmiki kajina; ana nathumli ngasomira, ana nathumli masākhami maleimara lah horkahaila masālakmara; mangacheealu lah ningla masuitāhaialu.”

⁹Kala Mosesna ain hi kapikhuida Leviwui naomayarabing PROHOwui tuingashitwui oko phungkazata kala Israelwui khararnao saikorali horsangmi.

¹⁰ Kala Mosesna athumli kasoda hānga, “Kum shiniwui kumpei kachida, chihokhami kumwui atam chili, chumpha̱ phanitli,

¹¹PROHOna kapangkhuiki kaji apam chili Israel saikorana PROHO nathumwui Varewui mangāli rākakazip tharan, Israel saikorana shākhavai ain chi athumwui mangāli pāchitheiki kajina.

¹²Ain hiwui tui saikora chi ngasharda mayon khavai, mayarnao, sha̱nao kala naoshinaobing kala nathumwui keinung alungli khalei kha̱mibing kazipkhuilu, chithāda athumna shākhuida PROHO nathumwui Vareli khangachee leira,

¹³kala nathumna Jordan kānda asomki kaji ngalei chili nathumna okthuida leilakha eina tangda, matheirangda khalei athumwui naongarā, athumna chi shākhuida PROHO nathumwui Vareli khangachee tamkhuiranu.”

¹⁴Kala PROHOna Mosesli hānga, “Yanglu, na kathi atam nganaihaira; Joshuali hokhuida nani kazip khavai kachonshim chili vālu, kaja ina ali otpam chisinra.” Chieina Moses eina Joshuana kazip khavai kachonshimli vai.

¹⁵Kala PROHOna muiyawui pākra̱ eina kachonshimli rāchithei kala muiyā pākra̱ china kachonshimwui khāmongpheili rānganinga.

¹⁶Kala PROHOna Mosesli hānga, “Yanglu, navā ngarāli ngasoda nala ngasāmkakhui atam nganaihaira; chiwui thili mibing hina, athumna vāzangda angasopamki kaji yurwui alungli, ngalei chiwui ngateihang kahai varebingwuili zangda khayorva̱wui otsak sāra kala ina athumli tuingashit sākahai chi kaihaida ilila malaihaora.

¹⁷Chieina chithang iwui malungkhavāt athumwuitungli tāshungda, I mai athumwui eina ngareithuida athumli horhaora, kala athumli mayuisanghaora; kala kalākashila makaphāla kachungkha athumwuitungli samkaphang eina, ‘Ithumwui Varena ithumli mangasokhamiwui vang kalākashi hi ithumwuitungli rākashok maningmala?’ da chithang athumna hāngra.

¹⁸Kala athumna makaphā makhayā ot sāda athumna vare kateibingli ngareithui kahaiwui vang, kachangkhat eina ina iwui mai ngareithuihaora.

¹⁹Ara chiwui vang eina laa hi kapihailu, kala Israelnaobingli tamchitheilu; athumli sāngasaklu, chithāda sāda laa hina Israel mibingli makhamayāwui shākhina da theikhuiranu.

²⁰Kaja avāva̱ ngarāli mikhavai ina ngashit kahai ngalei, seina̱ eina khuira̱ khalong ngaleili athumli thānkhavā chitharan kala athumna phāshak phazāda katho eina athumna khangatei varebingli ngareithuihaida otram ngatha̱ra kala ili ningkachaida iwui tuingashit sākhaira.

²¹Kala athumli makaphā kala kachotkachāng kachungkha kharā tharan, laa hina sachitheida phaningung khavai ngasāra (Kaja laa hi athumwui thot kachida mamalailakmara); kaja ina mira da ngashit kahai ngalei chili ina athumli makhuiungranglakha eina tangda athumna sāki kaji chi ina theiping kahaina.”

²²Chieina Mosesna chithang laa chi kapikhuida Israelwui mibingli tamchithei.

²³ Kala Nunwui naomayara Joshuali PROHOna otpam chisinda hānga, “Pingmeida malung zangmeilu; khikhalajila ina athumli mira da ngashit kahai ngalei chili Israelnaobingli nana thānsangki kajina: ina nali ngasomira.”

²⁴Mosesna ainwui tuibing hi akup eina tangda kapi kahaiwui thili,

²⁵Mosesna PROHOwui tuingashit oko phungkazata Levinaobingli kasoi,

²⁶“Ainwui lairik hi khuilaga PROHO nathumwui Varewui tuingashit okowui ngalemli hailu, kaja hi nathumwui shākhi sakhavaina.

²⁷Kaja nathumna kayākha ngakaishi kala ningngai zakshikhala kaji ina thei; yanglu, ina ringlakha eina tangdala nathumna Vareli ngakaishida lei; I thikahaiwui thili khi shokrakhala!

²⁸Nathumwui shang saikorawui khararnaobing, nathumwui otva̱bing, iwui mangāli rākazipserlu; ina athumli hāngchitheira kala chi kazing ngaleina shākhi sāra.

²⁹Kaja I thikahaiwui thili nathumna mashoilakla khangui otmāng sāda, ina kaso kahai chiwui athi mashurmara kaji ina thei; kala rārāda khalei zimiksholi makaphā kachungkha nathumwuitungli tāra̱, kaja PROHOwui mangāli nathumwui pāngna makaphā makhayā otmāng kasāwui vang ali malungvāt ngasakra.”

³⁰Chiwui thili Mosesna Israel katonga kakazip chili laa chi katang eina tangda hāngchithei.