Read Tangkhul Naga KHALATLUI 32 Bible Online

KHALATLUI 32 - Tangkhul Naga bible

KHALATLUI 32

¹“Iwui tui nganālu, O kazingram, ina hāngra; kala okathuina iwui tui shāranu.

²Iwui tamkachithei zingrot thāda rotāranu, iwui tuimatui sikakhuiya ikra̱ thāda, zingrotra̱na shon kadhar khawotungli, kala zingrotra̱na thingnā-ra̱hātungli rokatā tharanu.

³Kaja ina PROHOwui ming vaora. Reikhamatai mingpho ithumwui Vareli milu!

⁴“Lunghār, awui otsak kāshunglaka; kaja awui otsak saikora mashunmānga. Ningkatonga Varena, kala khangui maleimana, mashun kala tāzak kahai chi ana.

⁵ Athumna ali khamakhao otsakmāng sai, athum awui naongarā maningluimana kaja athumna sāmakhao kahaiwui vang; athum hiya makaphā makhayā thotna.

⁶Mangkhama̱ nathum kala ning makhalei mibing, chithāda nathum PROHOli hanmirala? A nathumwui avā, nathumli kasā akhavā, nathumli kasema kala nathumli sākākhame maningmala?

⁷“Achālakhawui atam phaningunglu, thotbingwui zingkum machukyanglu; navāli ngahānlu, kala ana nali chitheimira; khararnaoli ngasanlu, athumna nali hāngmira.

⁸ Juikhamataiya china yurbingli athumwui yar khami tharan, ana miwui naomayarabing ngateikhami tharan, ana kachichāshiwui thari, Varewui naomayarabingwui mashing athishurda sāmira.

⁹Kaja PROHOwui sharukva awui mibingna, Jacob awui yartā kahai shimluikatna.

¹⁰“Ana athumli siwukpamli, khamasai lamhāngli phākhui; ana ali kuinamda kala awui vang phaningmi, awui lumzailak kahaiana.

¹¹Khalāngna athip ngatha̱ khangasak thāda, angachāng anaowuitungli kakathan thāda, angachāng harda, athumli yonkhuida, amareng eina khāngkakhui thāda,

¹²PROHO amāngna ali thānzata, khangatei varena ali mangasomana.

¹³“Ana ali okathuiwui kajujui apambingli yongkān ngasaka, kala luiwui eina samkaphang ana zai; kala ana lunghārwui eina khuira̱ mimanga, lunghaila pam eina thao shokngasaka.

¹⁴Seishangwui eina seina̱thur, yaoshangwui eina yaona̱, yaonao eina yaovābingwui athao, Bashanwui seishang kala mebing, mathāmeikap kaji kehula— kala nathumna drakhātheiwui eina drakhāra̱ manga.

¹⁵“Kha Jeshurun athaona maruimithaiya, kala ngakaishihaowa; athaona maruimit, nathum asā kalākhaowa, kala nganaipathaowa; chieina ali kasaa Vareli horhaowa, kala awui huikhame Lunghārli mana̱shi.

¹⁶Athumna makathei varebingli khorumda ali zimari ngasakhaowa; athumna ningkakachai ot sāda ali malungvātngasaka.

¹⁷ Akachang makhaning varebingli athumna pha̱phayai, matheilak kaja, naolak eina rākathei varebingli khoruma; navā ngarāna mautkashita varebingli.

¹⁸Nathumli sākakho[6] lunghārli maphaningluithuwa, nathumli pharākakhuiya, Vareli malaihaowa.

¹⁹“Naomayara kala naongalāva̱bingna malungvātkhangasak chi theilaga, PROHOnala malaihaowa.

²⁰Kala PROHOna hānga, ‘ina athumli mayangsangmiluimara, athumwui akatang kathanikhala ina yangra, kaja athum hiya makhamashunga thotna, shitkasang katong makhaleiya naongarābingna.

²¹ Makakachanga Varewui vang ili zimari ngasakhaira, athumwui meoma̱ chiwui vang ili malungvātngasakhaira. Ara chiwui vang ina yur kateili mathuk ngasakta athumli yuishi ngasakra, ina athumli mangkhama̱ yur eina malung thuingasakra.

²²Kaja iwui malungkhavāt eina mei chuihaira, kala chi Kathewui ram zangshungda chuiya, okathui kala chiwui thingnā-ra̱hā chuiserhaira, kala phungreipheibing saikora mei chuihaira.

²³“‘Kala ina athumli makaphātungli makaphā ngaror ngasakra; ina iwui malāthing athumwui tungli tāngasakra;

²⁴athum kathai eina shimān ngakānhaora, kala kasā meina chuitahaora kala thikapai kazātkashi rāra; kala ina ramsā chihoda makeikazam ngasakra; kathiri kaphunga ngawokazata sāyur chihora.

²⁵Kayāng khareili raighai eina thi; kala shimli kazāt eina thi, yaron ngalāla, angāngnaola, kasarnaobingla akhala mataimimara.

²⁶“Athumli katāva̱li miyur khangateiwui alungli chaiyānghaida maphaningunglui khavai sāra” da ina hānghairara,

²⁷yangkashebingna lāngsoda, Israelli ithumna shimān khangasakna, PROHOna maningmana’ da hāngpaishina kajiwui vangna.

²⁸“Kaja athum hiya ning makazanga yurna, kala thangkhamei athumwuili maleimana.

²⁹Athumna thangmeisāsi kaja, athumna hi bhap tāra, anaolamshong katharakhala kaji theira!

³⁰Kathāda akhana thingkhali kashamra, kala khanina thingtharāli kathāda shiyāmra kaji, athumwui Lunghār china athumli yorkahai maningkha, PROHOna athumli mishok kahai maningakha?

³¹Athumwui lunghār ithumwui Lunghār mathāmana, ithumwui yangkashebingnala bichar sāda thei.

³²Kaja athumwui drakhārong Sodomwui drakhārong eina rai, kala Gomorrahwui luiyamwui eina rai; athumwui drakhātheiva kathiriwui drakhātheina, athumwui amazānva khai;

³³athumwui drakhāra̱va phara̱wui kathirina, kala sākashi phara̱yurwui huna.

³⁴“Saikora hi ina kaziphaida iwui kazipshimli mahor manamhaimala?

³⁵ Athut kakhui kala hankhamela ina, kaja athumwui phei nganaiki kaji; athumwui kumshāt rāki kaji nganaihaira, athumwui kashimān thākta rāra.

³⁶ Raolapai, akhavalapai athumwui pangshap kānkahai chi theilaga; PROHOna awui mili lumashanmira, khamashungla mashung ngasakra.

³⁷Chitharan ana hāngra, ‘Athumwui varebing kali leili, athumna yāmngayin khavai lunggui chi;

³⁸athumwui kapha̱sā kashai chi, kala athumwui ra̱shakchigat khamang chi? Athumna nganingkāda nathumli ngachonmiranu, athumna nathumwui ngayin khavai sāranu!

³⁹“‘Chieina ara yanglu, I chi ina, I maningla vare khangatei maleimana; ina thingasaka kala ina ringngasaka; khamā za̱khangasakla raikhangasakla ina: kala ipāngwui eina khuishokshapa khipākha maleimana.

⁴⁰Kaja ina kazingramli ipāng khāngkai, kala ngashita, I leilakha eina tangda,

⁴¹ina iwui kahāna raighai kakharā tharan, kala ipāngna bichar sāthang, ina iwui yangkashibingli athut khuira, kala ili ningkakachaibingli athut hāngsangra.

⁴²Iwui malāthingbingli ashee eina malip ngasakra, kala iwui raighaina asā shaira— iwui pāngli kākahaiya samphunga yangkashibing, sāthat kahaia kala tukkakhuiabingwui ashee chieina.’

⁴³ “Awui mibingli solu, O yur nathum; kaja ana awui raobingwui vang athut hāngsangmi, awui yangkashibingli athut khuida awui mibingwui ngalei tharngasaka.”

⁴⁴Nunwui nao Joshua eina Mosesna laa hiwui tui saikora mibingna sākhavai pātāchithei.

⁴⁵Kala Mosesna tuibing hi Israelnao saikorali hāngchithei kahaiwui thili, ana athumli hānga:

⁴⁶“ina aja hāngchithei kahai tui saikora hi ningli phumtithailu, chithāda sāda nanao ngarānala ning ngasharda ainwui tui saikora hi mayon khavai nathumna kasora.

⁴⁷Hi kapai ot maningmana, kha nathumwui ringkhavaina, nathumna Jordan kānlaga akhuiki kaji lam chili sāngmeida okthui khavaina.”

⁴⁸ Kala chithang ngalāngda PROHOna Mosesli hānga,

⁴⁹“Abarim phungreiwui, Moab ngaleili khalei, Jericho ngaleili kāroda khalei Nebo Kaphungtonli kālu; kala Israelwui mibingli ina miki kaji ngalei chi kāngashānlu;

⁵⁰kaja, nachinā Aaronna Hor Kaphungli kathi thāda nala nawui mibingli vangarumhaora, nana kāngashān khavai phungrei chili thisangra.

⁵¹Khikhalajila, Zinwui lamhāngli leilakha Meri-bath-kadeshwui tara̱pamli, nana Israelwui mibingwui ngachaili ili ningtongda mashitsangmana, kaja Israel mibingwui mangāli ili katharanada khayā mashimana.

⁵²Chiwui vang, nana ngalei chi nawui mangāli theira, kha ina Israelwui mibingli miki kaji ngalei chili na kazang masamphangmara.”