Read Tangkhul Naga KHALATLUI 33 Bible Online

KHALATLUI 33 - Tangkhul Naga bible

KHALATLUI 33

¹Varewui mi Mosesna a mathiranglakha Israelnaobingli sokhami khami chi hina.

²PROHOna Sinai eina tai, kala Seirwui eina ithumli [7] chitheirikapa; Paran Kaphungwui eina kahor kāptāmi, kathara thingtharāli ngasoda rai, awui yāpāngli kahora mei [8] eina ngasoda.

³Mha, awui mili[9] ana leishi; ali tharchigat kahaibing awui pāngli lei; chieina athumna nawui pheikār chi shura, nawui chiza̱khami athishurda,

⁴Jacobwui shimlui sāda Mosesna ain khami chiwui kagaso chitharan.

⁵Israel shang saikorawui, wungva̱bing kakazip tharan, PROHOna Jeshurunwui awunga sai.

⁶“Reuben okpeimeiranu, kala mathiranu, lah awui mila mateo ngasakranu.”

⁷Kala Judahwui vang hithāda hānga: “Shāmilu, O PROHO, Judahwui khangakaokhon, kala ali awui mibingli khuiungmilu. Awui yangkashibingli napāngna ngararmida ali ngachonmilu.”

⁸ Kala Leviwui vang ana hithāda hānga, “Levili[10] nawui Thummim milu, Vareli kaphaninga chili nawui Urim milu, Massah apamli nana chāng khayanga, Meribahwui tara̱pamli nana khangatuka chili;

⁹avāva̱ kala ava̱va̱li ‘ina matheimimana’ da kahānga; awui chinaongarāli horhaowa, awui naobingli yangkheihaowa. Kaja athumna nawui kagaso nganai, kala nawui tuingashit mayona.

¹⁰Athumna Jacobli nawui sharphahorbing tamchitheira; kala Israelli nawui ain tamchitheira; athumna nawui hanphuttungli nganamkaphā haimira, kala nawui hanphutli, tongtingda rikkatā chigat pha̱phayāra.

¹¹Somilu, O PROHO, awui pāngthem saikorali, kala awui ot kasāsā khuisangmilu; awui yangkashibingli akha̱-akhā sāmihaida, ali ningkakachaibing mangakarthuiluilak khavai ngapa̱sirmihaolu.”

¹²Benjaminwui vang ana hānga, “PROHOwui ngahānkhangaiya, ana awui makāli chingri eina pānra; ana langpongda ali yangmira; kala awui yartui khaniwuilungli ana okthuira.”

¹³Kala Josephwui vang ana hānga, “Awui ngalei PROHOna sokhami ngasāranu, kazingram atungwui mathāmeikap kajinilala, kala ngaleiwui eina kashoknilala,

¹⁴zimik kāpkharora mathāmeikap kaji theishirai yur, kala kachāng-chāngwui athishurda sokhami ngasāranu,

¹⁵achālakhawui phungreibingwui eina katang makhangavā kaphungbingwui eina tuikhamatai sokhami ngasaranu,

¹⁶ngalei eina mathāmeikap kaji kala chiwui tuikhamatai, thingpompa̱li meiwon eina rākahānga china ali miranu. Saikora hi Josephwui kuitungli tāranu, kala chinao ngarāwui ngachaili wungkuihon kasangawui kuitungli tāshungmiranu.

¹⁷Awui pharākhare mukkānao ngam phunga, kala awui angaji ramseiwui ngajina; chieina ana yurbingli, okathui akatanga eina tangda athum saikorali thotra; Ephraimwui thingthara chithai Manassehwui thingthing chithai.”

¹⁸Kala Zebulunwui vang ana hānga, “Zebulun, nathumwui kazātpamli; kala Issachar, nathumwui rāmrahli mathānlu.

¹⁹Athumna yurbingli athumwui phungreili hokāra; chili athumna khamashunga pha̱kaphayā sāra; kaja shamadruwui lan athumna khuishokra, kala situiwui ngathum kahai lan chila.”

²⁰Kala Gad wui vang ana hānga, “Gadli reikhangasaka chili somiranu! Gadna kazingkha̱ thāda rimpama, pāngla makeishokmi, kuihonla sakhaimi.”

²¹Mathāmeikap kaji ngalei chi akhalattawui vang ana hākhui, kaja chi kathānawui vang yar sākahaina. Israelwui kathānabing kakazip tharan, PROHOwui mashun otsak, kala shiyan-chikan ana yangmi.

²²Kala Danwui vang ana hānga, “Danna kazingkha̱nao thāda Bashanwui eina shoka.”

²³Kala Naphtaliwui vang ana hānga, “O Naphtali, PROHOwui ngahānkhangai sokhamina pemtinghai, ngayi kala azingshong nawui lamna.”

²⁴Kala Asherwui vang ana hānga, “Chinao ngachaili Asher sokhami ngasāra; achinā ngarāwui ngahanngaimeikap kaje ngasāranu, kala aphei olive thao eina pheoranu.

²⁵Nawui phākashut mari kala pithraina; kala nawui mirin peida yāngla leiranu!”

²⁶Nawui Vare thāda khipākha maleima, “O Jesherun, pangshap eina ngasoda nali huimi khavai kala ngachonmi khavai ana kazing eina tai.

²⁷Makashimāna Vare chi nawui ngayin khavaina; chiwui azingli katang makhavai pāngthei lei. Kala ana nawui mangāli yangkashibingli namshoka, kala hānga, Sashimānhaolu.

²⁸Chithāda Israelna ninglumtur okthuira, Jacobwui atheina, kashakazā makhavātpamli chingri eina okthui; mha, awui kazingramna mathālak eina ikra̱ tāmi.

²⁹Ringkapha chi nathumna, O Israel! nathum thāda khipa lei, PROHOna kankhuikhamiya yur. Nathumli ngākmi khavai kala maikhayā mikhavai, PROHOhi nathumwui chāngvei kala raighaina. Nathumwui yangkashibingna nathumli lumashanmi khavai pora; kala nathumna athumwui kajuipam naikazamra.”