Read Tangkhul Naga KHALATLUI 5 Bible Online

KHALATLUI 5 - Tangkhul Naga bible

KHALATLUI 5

¹8Mosesna Israel saikorali hokhuida athumli hānga, “Nganālu, O Israel, ina aja nathumli shākhavai kagaso ain kala shiyan-chikanbing hāngkachithei hi nathumna ningkachāng eina shākhuida hi mayontitlu.

²PROHO ithumwui Varena ithum Horebli leilakha tuingashit akha sai.

³PROHOna ishāva ngarāli tuingashit kasā maningmana, kha aja ringda khalei ithumli kasāna.

⁴PROHOna phungreitungli meilungwui eina nathumli mai ngareingasungda khangazekna,

⁵kala PROHOwui tui chi phongshok khavai atam chili PROHO eina nathumwui ngachaili ina nganinga, kaja nathumna meili ngacheeda phungrei chili makāmana. “PROHOna hithāda hānga,

⁶ ‘Narkahaipam Egypt ngaleiwui eina thānkashoka PROHO nathumwui Vare chi ina.

⁷“‘I maningla vare katei maleimana.

⁸ “‘Nathumna atungshong kazingram, azingshong okathui, lah ngaleizingwui tara̱li khalei ot akhalila ngaraikachā ama̱ marukkhuipaimana.

⁹ Athumli makhorumpaimana lah otram mangangatha̱paimana; khikhalajila PROHO nawui Vare iya mikpaishikatha Varena, avāva̱ ngarāna ili ningkachaida khayonkhamāng kasāwui vang naothot kathum mati vāshungda makhamalaia,

¹⁰kha ili leishida kala ningkhami saikora khamayona thingthingli makhangachei leikashi chithei.

¹¹ “‘Leimamāngli nawui PROHO Varewui ming masingpaimana; kaja aremali awui ming kasinga chili PROHOna khayon mamila thāda machihomara.

¹² “‘PROHO nawui Varena kagasona, sabbath zimiksho kathar eina mayonlu.

¹³ Tharukthang nathumna ot sāda, nathumwui ot saikora sākhuira;

¹⁴ kha kashinethang nathumwui PROHO Varewui Sabbathna; chithang nala, nanaomayarala, nanaongalāva̱la, lah rao mayarnaola, rao sha̱naola, lah sha̱keila, kha̱lungli khalei kha̱mi saikorala ot masāpaimana.

¹⁵PROHO nawui Varena nathumli awui pāngthei kharei eina Egypt raopamwui eina thānshokmi kaji nana phaningungra; chiwui vang eina PROHO nawui Varena sabbath zimiksho mayon khavai kagasona.

¹⁶ “‘PROHO nathumwui Varena nathumli kaso kahai thāda nava̱ navāli khayāshilu, kaja PROHO nathumwui Varena khami ram chili sāngmeida okthui khavaina.

¹⁷ “‘Mi mashaothatpaimana.

¹⁸ “‘Maphophāpaimana.

¹⁹ “‘Maleepaimana.

²⁰ “‘Nawui khongnainaoli masatkharatpaimana.

²¹ “‘Nawui khongnainaowui shim makahaopaimana; khongnai preiva̱li, lah awui rao mayarnao, rao sha̱nao, sha̱kei, kala awui khalalei maningchāngpaimana.’

²² “Tuibing hi, phungreili nathumna kazipserda leilakha, meilungwui eina, muiyālungli, kala tangmangting kahai chili akhon panglāk eina PROHOna kahāngna; chili lāngda ana khangatei mahāngluimana. Kala ana lungphek khanili kapisanglaga ili mi.

²³“Phungrei chi meina chuida nathumna tangkhamanglungwui eina akhon chi kashā tharan, nathum kala nathumwui khararnao kala shang-shangwui kathānabingna ili rānganai,

²⁴kala nathumna hānga, ‘Yanglu, ithumwui PROHO Varena awui tekhamatei khangam-kharei chithei, kala ithumna meilungwui eina awui akhon shāhaira; Varena mili ngazeklala mina ringa kaji aja ithumna theihaira.

²⁵Chiwui vang eina ara ithum khiwui vang thisāra? Kaja ithumwui PROHO Varewui khon shāluiakha hakkhamahā mei hina ithumli chuithathaora, ithum thilakra.

²⁶Kaja phasā khavai saikorawui alungli kachikathā mi akhana, ithumna kashā thāda meilungwui eina kharinga Varewui akhon shākahai khipālongna ringlikhala?

²⁷Vānganailu, kala PROHO ithumwui Varena hāngki kaji nganākhuilu; laga ana kahahāng chi ithumli unghāngnaolu ithumna nganāda chi sāra.’

²⁸“Kala nathumna ili kahāng chitharan PROHOna shāda ili hānga; ‘Mibing hina nali kahāng tui chi ina shāhaira, athumna kahāng chi mashunglak eina hānghaira.

²⁹Athumwui ning hithachingda ili khangachee eina ningkhami mayonsersi kaja athumwui vangla, ara̱-azāwui vangla, kayākha phāra̱khala!

³⁰Athumli kachichāshi kachonshimli hanungserulu, da vāhanglu.

³¹Kha nava iwui ngalemli nganingsālu, ningkhamila, shiyan-chikan kala sharphahorla, ina nali hāngserda nana athumli tamchitheiserra; chithāda sāda ina mikahai ram chili athumna vāpamda chi mayonra.’

³²“Chiwui vang eina PROHO nathumwui Varena kagaso thāda ningngasharlak eina sālu; nathumna uishong, lah yāshong mangareithuihailu.

³³PROHO nathumwui Varena nathumli kaso kahai apong saikorali zatlu, chieina nathum okthuida ringphāmeira; kala nathumna samphangki kaji ram chili nathum okpeimeira.”