Read Tangkhul Naga KHALATLUI 6 Bible Online

KHALATLUI 6 - Tangkhul Naga bible

KHALATLUI 6

¹“PROHO nathumwui Varena nathumli tamchithei khavai ili kaso kahai ningkhami, ain kala shiyan-chikan chi hina, kaja chi nathumna samphangki kaji ram chili mayon khavaina;

²chithāda sāda nathumla, nanao mayarabingla, athumwui ara̱-azābingla ina nathumli kaso kahai awui ningkhami kala shiyan hi thangkachida mirinli mayonchingda PROHO nathumwui Vareli ngacheera; chithakha nathum okpeimeira.

³Chiwui vang eina nganālu O Israel, ning ngasharlak eina chibing chi sākhavai sālu; chithākha nathum mahaimeira, kala navā ngarāwui PROHO Vare china nathumli ngashitmi kahai thāda, seina̱ eina khuira̱ khalong ngalei chili nathum kachungkha mayāsangra.

⁴ “Nganālu, O Israel: PROHO ithumwui Vare, PROHO A mānga.

⁵PROHO nathumwui Vareli nathumna wuklung, manglā, yāng tongtingda leishira.

⁶ Kala aja ina kaso kahai tui hi nathumwui ningli phumtithaida;

⁷nathumna nanao ngarāli meisā eina tamchitheilu, nathumna shimli pamlala, shongfali zatlala, kapi atamlila, kala kathui atamlila hāngchitheilu.

⁸ Kala mamalai khavai, nathumna khudam sāda nathumwui pānglila, mik khaniwui ngachai khaveilila hokthāngphunglu.

⁹Kala nathumna shimwui khāmongpheilila, kala nathumwui ngaveilila kapisanghailu.

¹⁰“Kala PROHO nathumwui Varena navā ngarā Abraham, Isaac kala Jacobli ngashit kahai ngalei chili nathumli mikhavai thānkasang tharan, kahaka keinungbing kala mathālak kahai nathumna masākakā keinungbing,

¹¹kala nathumna mamathuikasang khamathā thongthāngna pemting kahai shimbing, nathumna makhonkakhui ra̱khongbing kala nathumna malingkasang drakhā yāmgui eina oliverong saikora hi mida kashai kala katho chitharan,

¹²ning ngasharlu, maningakha nathum narkahai shim, Egypt ngaleiwui eina khuikashoka PROHO chili malaihaipaishina.

¹³ Nathum PROHO nathumwui Vareli ngacheelu; ali otram ngatha̱lu; kala awui mingmāngli mingzailu.

¹⁴Nathumli kuikhamareili khalei yurbingwui varebingli mashuralu;

¹⁵khikhalajila nathumli ngasokazata PROHO nathumwui Vare chiya mikpaishikatha Varena; awui malungkhavāt nathumwuitungli rāda nathumli okathui leimaiwui eina shimithaipaishina.

¹⁶ “Massahli leilakha nathumna ali tamkhayang thāda, PROHO nathumwui Vareli chāng matamalu.

¹⁷PROHO nathumwui Varena nathumli kaso kahai awui ningkhami, awui kagaso, kala shiyan chikan saikora nathumna ningmazingsing eina mayonki kajina.

¹⁸Kala nathumna PROHOwui mikyanli khamashung kala kaphā chi sāra, chieina nathumna mathāmeida zatvāra, kala nathumna vāda PROHOna navā ngarāli ngashit kahai khamathā ngalei katum samphangda

¹⁹PROHOna ngashit kahai thāda nathumwui yangkashibingli nathumwui mangāli kashamshokserhaora.

²⁰“Naoda rāki kaji atamli nanao ngarāna, ‘Ithumwui PROHO Varena nathumli kaso kahai ningkhami kala ain eina shiyan-chikanbing hi khiwui vangkhala?’ da khangahān tharan,

²¹nathumna hithāda nathumwui naongarābingli hāngra, ‘Ithum Egyptli Pharaohwui raonao sāsai; kala PROHOna awui pāngthei kharei chieina ithumli Egyptwui eina thānshokmi;

²²kala PROHOna matakhak kahai khudambing kala tekhamatei chitheida, Egyptlila, Pharaohlila kala awui shimkhurlila ithumwui miktāli khangachee-khangachā sāchithei;

²³kala ana ishāvā ngarāli ngashit kahai ngalei chi mikhavai ana chiwui eina ithumli thānshoka.

²⁴Ithumwui phākhavai, kala aja rāshungda ringda khalei hithāda okpeimei khavai ishāmei PROHO Vareli ngacheeda awui shiyan-chikan mayonchinglu da PROHOna kaso kahaina.

²⁵Ana kaso kahai thāda ithumna ningngasharlak eina PROHO ithumwui Varewui mangāli ningkhamibing hi mayonchingakha, hi ithumwui khangaronga ngasāra.’”