Read Tangkhul Naga KHALATLUI 7 Bible Online

KHALATLUI 7 - Tangkhul Naga bible

KHALATLUI 7

¹“Nathumna samphangki kaji ngaleili PROHO nathumwui Varena thānkazang tharan, kala nathumli chungkhamei kala pangkhamei yur shini: Hit, Girgash, Amor, Canaan, Periz, Hiv kala Jebusnaobingli kashamhaida,

² PROHO nathumwui Varena athumli nathumwui pāngli horsangmida, athumli yuikahai tharan athumli shaothatserphalungra; nathumna athumli tuingashit sākhavaila maleimana kala athumli lumashan khavai apongla maleimana.

³ Athumli ngalā mangakhotpaimara; nanao mayarabingli athumwui nao ngalāva̱bingli makhuingasakalu, nathumwui nao ngalāva̱la athumli mafavā ngasakalu.

⁴Khikhalajila nanao mayarabingli athumna suithuihaida iwui thi mashurla vare khangateili otram ngatha̱akha; PROHOna malungvāt kahai tharan, athumli ngalāngda shimān ngasakra.

⁵ Kha nathumna athumli hithāda sālu, kaja, athumwui hanphutbing sākhailu, kala athumwui pakra̱bingla shaokhaimihaolu, tarungla ta̱teklu kala athumwui meoma̱ saikora meili riktāmihaolu.

⁶ “PROHO Varewui mangāli nathuma kathara yurna; PROHO nathumwui Varena okathuili khalei miyur saikorawui ngachaili nathumli awui miyur sākhavai kapangkhui kahaibingna.

⁷Nathumna yur kateili mi chungkhameiwui vang PROHOna leishida kapangkakhui maningmana, hāngsa jiakha nathum teomeithuiya.

⁸Kha PROHOna nathumli leikashiwui vang kala navā ngarāli ngashit kahaiwui vang, PROHOna pangshapa pāng eina nathumli narkahai raopamwui eina thānshokmi kala Egypt awunga Pharaohwui pāng eina nathumli ngatang kakhuina.

⁹ Chiwui vang eina theilu, kaja PROHO nathumwui Vare chi Varena, ali leikashibing kala awui ningkhami khamayonabingli tuingashit mayonkhame makhangachei leikashi thot thingthing haikhame makhangachei Varena,

¹⁰kala ali yangkakharing mile sāshimānda athut hāngsanga; kala ali yangkakharinga mile ngalāngda athut hāngsangra.

¹¹Chiwui vang eina ina kaso kahai awui ningkhami, ain eina shiyan-chikan ning mazinglak eina sāki kajina.

¹² “Khikhalajila nathumna shiyan-chikanbing hi nganāda kala chi mayonakha, PROHO nathumwui Varena navā ngarāli mayonmichingra da ngashit kahai kala makhangachei leikashi chi leichingra;

¹³nathumli ana leishida somira, kala khamayāla mayāsangmira; ana nathumwui ara̱-azā, thingphun luivātlila, athei-arailila, nathumwui māngumla, drakhāra̱, thao kala sha̱kei, yaonaobingla, nathumli mirada navā ngarāli ngashit kahai ngalei chili chungsang ngasakta somira.

¹⁴Yur khangateili lāngmeida nathumli somira; nathumwui alungli sha̱naola mayarnaola nao kashum maleimara, sha̱keila khamashing maleimara.

¹⁵Kala PROHOna nathumwui eina kazāt saikora khuithuimihaora; Egyptwui kazātkashi nathumna kathei chikathā nathumli akhala maraza̱ ngasakmara, kha nathumli ningkakachaibing chili kazā ngasakra.

¹⁶Kala PROHO nathumwui Varena nathumwui pāngli horsangkhami yur saikora sāthatserphalungra; athumli yanglaga malumashanpaimara; athumwui varebinglila otram mangatha̱paimara, kaja china nathumwui khalen ngasāra.

¹⁷“Nathumwui ningli, ‘Yurbing hina ili hakmeida phaningda hāngakha, kathāda ina athumli kashamshokpairakhala?’

¹⁸nathum athumli mangacheelu, kha Pharaohli kala Egyptnaobingli PROHOnathumwui Varena kathāda sākhala kaji phaningunglu,

¹⁹nathumwui mik eina theikahai hakkhamahā otsak sāchithei kahai, khudambing, pāngthei kharei katingshokta PROHO nathumwui Varena thānshokkhami chi tākam eina nathumna khangachee yurbinglila PROHO nathumwui Varena chithāda sāmira.

²⁰Chili lāngda mathi khangakāna yāmngathum kazatbinglila sāthat khavai PROHO nathumwui Varena shileng chihoramira.

²¹Athumli ngachee khavai maleimana; kaja nathumli ngasomida khalei PROHO nathumwui Vare chiya sāshap-vāshapa kala makahaiya Varena.

²²PROHO nathumwui Varena yurbing hi teomamei shimān ngasakra; nathumna athumli sakkha eina masāshimānrarmara, chi maningakha nathumli ramsāna chungnāhaida yuihaora.

²³Kha masāthattupranglakha eina tangda athumli PROHO nathumwui Varena pa̱ngapā ngasakta nathumwui pāngli horsangmira.

²⁴Kala ana athumwui awungabingla nathumwui pāngli horsangmida okathuli athumwui ming shimānchao ngasakra; kala nathumna athumli mashimitchaoranglakha eina tangda khipākha nathumli mangasungrarmara.

²⁵Athumna sākakhui meoma̱bingwui ama̱ nathumna meili riktāserphalungra; chili romkahai sinā lupāsā chila makahaopaiamna, lah khalattawui vang makhuipaimana, china nathumli thikhavai sapaishina; kaja hi PROHO nathumwui Varewui vang ningkakachai otna.

²⁶Kala ningkakachai ot nathumwui shimli makhuiungpaimara, kala chithāda khonkashi ngasāpaishina; nathumna ningkachaida katava̱li horhaolu, kaja hi khonkashi otna.”