Read Tangkhul Naga KHALATLUI 8 Bible Online

KHALATLUI 8 - Tangkhul Naga bible

KHALATLUI 8

¹“Aja ina nathumli kaso kahai ningkhami saikora hi ning ngasharlak eina mayonlu; chithakha nathumna okpeida mataisangra kala navā ngarāli PROHOna mira da ngashit kahai ngalei chi akhuira.

²Kala malangso khavai, nathumwui ning yangkhui khavai kala Varewui ningkhami mamayonnikhalada yangkhui khavai, zingkum hangmati lamhāngli PROHOna thānkazat nathumna phaningungra.

³ Kala ana nathumli wuklung nemngasaka kala nathumli thaingasakta manna mizai, chiya navā ngarāna kala nathumna khikhala kaji makatheina; kaja mina kashakazāmāng eina kharing maningmana kaji ana nathumli theikhui ngasak khavaina, kha PROHOwui khamor eina matuikashok tui eina kharingna kaji chithei khavaina.

⁴Kum hangmati zatlaga nathum pheila khamahing maleimana, nathumwui kashankachonla kakāk mavaimana.

⁵Avāva̱na naoli hāngkhamachin thāda Varena nathumli hāngkhamachinna da theikhuilu.

⁶Chiwui vang, nathum ngacheemeida PROHO nathumwui Varewui ningkhami mayonzatchinglu.

⁷Khikhalajila PROHO nathumwui Varena nathumli ngalei khamathā, tara̱na kapem apam, kaphunglila tampāklila ura̱ okta longshon longthai kaje ramli thānzangra.

⁸Kehu, ngum, drakhārong, khaorārong, kabothei, oliverong, khuira̱ khavāt makhalei ngaleipamna,

⁹ngalei chili nathumna kashakazā khavāt akhala maleimara; chiwui lungguibing chi marimānga, kaphungbing chiwui eina nathumna kori changkhuira.

¹⁰Kala nathumna phāshak phazāda thochingra; khamathā ngalei khamiwui vang PROHO nathumwui Vareli nathumna masot chigatra.”

¹¹ “Ina aja nathumli hāngkahai PROHO nathumwui Varewui kagaso, shiyan-chikan hi malaihaipaishina, nganākhuilu:

¹²Zālaga thoting kahai tharan, shim khamathā sāda kapam tharan;

¹³kala nathumwui sha̱keila mataisangda kala nathumna sinā lupā kachungkha kasing tharan, nathumwui khalei saikora mataisang kahai tharan,

¹⁴nathumwui ningli lāngsoda, nathumli tuknar kahai shim, Egyptwui eina thānshokkhame, PROHO nathumwui Vareli malaihaipaishina,

¹⁵kahaka kala khangachee khangachā lamhāngli nathumli thānkhame, sākashe phara̱-pharā kala seithatpam, tara̱ makhalei ngalei kathengpamli meizailung eina tara̱ khuikhame,

¹⁶nathum malangso khavai kala nathumwui ning yangkhui khavai, kaja naoda kaphā ngasā khavai, lamhāngli leilakha, nawo ngarāna matheithangkhamei manna mizai.

¹⁷‘Iwui pangshap eina kala iwui yāng eina lan saikora sākakhuina’ da phaningpaishina, ning ngasharlu.

¹⁸PROHO nathumwui Vareli phaningunglu, kaja nathumli shāng khavai pangshap khami chi ana; kaja aja zimiksho navā ngarāli ngashit kahai chi leiching khavaina.

¹⁹Kala kalikhada nathumna PROHO Vareli malaihaida yur khangateiwui varebingli shurthuihaida kala athumli khorumda otram ngatha̱akha, ina aja saklak eina kahāng hina kaja, nathum thiphalungra.

²⁰Nathumwui PROHOna, nathumwui mangāli yur khangateili shimān ngasak kahai thāda nathumlila shimān ngasakra, khikhalajila nathumna PROHO nathumwui Varewui khon manganāmana.”