Read Tangkhul Naga KHALATLUI 9 Bible Online

KHALATLUI 9 - Tangkhul Naga bible

KHALATLUI 9

¹“O Israel, nganālu; nathum aja Jordan kānki jiura kala nathumli hakkhamei kala pangkhamei yurbingli angapaikhuiki kajina; athumwui keinung kahakmānga, kala kazing kāzokta ngaveitit kahaimānga,

²chiwui mibingva haklaka kala juilaka, Anakimwui naomayarabingna; nathumna kathei kashā, ‘Anakwui naomayarabingli khipāna ngasunglengrakhala?’ da kahāng china.

³ Chiwui vang eina aja hi theilu, kaja nathumwui mangāli meichot eina zatta khalei chi PROHO nathumwui Varena; ana nathumwui miktāli athumli sāshimānra kala yuikhuira; kala PROHOna ngashit kahai thāda nathumna athumli kashamshokhaida thaklāk eina shimān ngasakra.

⁴“PROHO nathumwui Varena kashamshokmi kahaiwui thili, ‘Ithumna khamashungwui vang PROHOna ngalei hi samphang khavai khuikharāna’ da nathumwui ningli maphaningalu; kha yurbing hiwui makaphā makhayāwui vang PROHOna nathumwui mangāli kakashamna.

⁵Nathumwui khamashung khangarongwui vang kala ning khangatarwui vang nathumna athumwui ram chi vākhuiki kaji maningmana; kha yurbingwui makaphā makhayāwui vang PROHO nathumwui Vare china kashamhaoki kajina kala navā ngarā, Abraham, Isaac, Jacobli ngashit kahai chi leiching khavai kasāna.

⁶“Chiwui vang eina theilu, kaja nathumwui khamashung khangarongwui vang PROHO nathumwui Varena khamathā ngalei hi samphang khavai khami maningmana, kaja nathum ngakaishitingting kahai yurna.

⁷Nathumna lamhānglungli PROHO nathumwui Vareli kathada ngakaishida malungvātngasakkhala kaji phaningunglu kala mamalaihailu; kaja Egypt ngaleiwui eina shokthang eina thuida aja apam hili rāshungda nathumna PROHOli ngakaishi.

⁸ Horebli eina tangda nathumna PROHOli malungvātkhangasakwui vang PROHO malungvātnahaida nathumli sāshimānnaikhaya.

⁹ PROHOna nathumli ngasoda tuingashit kasāwui lungphek khani chi ina phungreili kākakhui tharan, ngashun ngayā hangmatithang chili pama: I kazāla mazāmana, tara̱la mamangmana.

¹⁰Kala Varena awui pāngmareng eina kapilaga lungphek khani chi PROHOna ili mi; kala yarui kazipta leilakha phungreitungli meilungwui eina PROHOna nathumli kahahāng chi chili kapisangsera.

¹¹Kala ngashun ngayā hangmatithang kākapei eina PROHOna ili tuingashitwui lungphek khani chi mi.

¹²Chieina ili PROHOna hānga, ‘Ngakarthuilu, hiwui eina thākta taulu; kaja nawui mibing Egypt ngaleiwui eina nana thānkashokbing chi khamakhao otsakmāng sāda lei; ina athumli kagaso shongfawui eina athumna ngalāngda ngareithuihaira; athum khalattana mengkakhui meoma̱ sākhuihaira.’

¹³“Chili lāngda PROHOna ili hānga, ‘Mibing hi ina theihaira kala yanglu, athum hiya ngakaishitingting kahai mimānga;

¹⁴ili makhāmalu, athumli sāshimānhailaga athumwui ming okathuiwui eina katatserhaora; kala ina nawui eina athumli reikhameiya kala pangkhameiya yur nawui eina sākhuira.’

¹⁵“Chieina ina ngareikhuida phungreiwui eina lattai kala phungrei chi mei chuisai; kala tuingashitwui lungphek khani chi ipāng khani eina singphungsai.

¹⁶Kala ina yangkatā eina, yanglu, nathumna PROHO nathumwui Varewui mangāli morei sāhairasai; nathumna nathum khalattawui vang sināwui seinaowui ama̱ sākhui, kala nathumna ngalāngda PROHOna nathumli kagasowui eina ngareithuihaowa.

¹⁷Chiwui vang eina ina singkasā lungphek khani chi nathumwui miktāli horkhai kahaina.

¹⁸Chiwui thili ina PROHOwui mangāli ngakhumsangda kharewui thāda ngashun ngayā hangmatithang khoruma, ina khikhala mamang mazāmana, nathumna PROHOwui mangāli makaphā morei kasā saikora hiwui vang ali malungvātngasakhaowa.

¹⁹ Kaja nathumli PROHOna malungvātta maringkaphā chiwui vang I ngacheenahaowa; chiwui vang nathumli ana shimān ngasakkida sai. Kha atam chilila PROHOna ili shāmi.

²⁰Kala PROHOna Aaronli malungvatnāhaida ali shimān ngasaknaikhaya; kala atam chili ina Aaronwui vangla seihā sami.

²¹Chiwui thili ina morei ot chi khuida, nathumna sākakhui sināwui seinao chi khuilaga thottāda shaokachupta chifa thāda sāngasaka; kala akha̱-akhā chi phungreiwui eina longkatā kongrānao chili ina horsanghaowa.

²² “Taberahlila, kala Massahlila kala Kibroth-hattaavahlila PROHOli nathumna malung thuingasaka.

²³ Kala PROHOna nathumli, ‘ina mikahai ngalei chi akhuilu’ da Kadesh-barneawui eina chihokhava tharān, nathumna PROHO nathumwui Varewui kahāngli ngakaishida ali mashitsangmana kala kahāngla manganāmana.

²⁴Ina nathumli theithangwui eina thuida nathumna PROHOli ngakaishichinga.

²⁵ “Chiwui vang eina ina ngashun ngayā hangmatithang ngakhumshāmda PROHOli khoruma, kaja PROHOna nathumli shimān ngasakra jihaowa.

²⁶Kala ina PROHOli seihā sai, ‘O PROHO VARE, nawui mi sākhavai, nawui pangshap eina ngatangkhui kahaiya, Egyptwui eina nawui pāngthei kharei eina thānshok kahai nawui shimlui samphangki kaji mibing hili masāshimānmihaialu.

²⁷Narao Abraham, Isaac kala Jacobli phaningungmilu, mibing hiwui ngakaishitingting kahai lah athumwui makaphā, morei kasā nilala khayangkheimilu;

²⁸Chimaningakha, nana ithumli thānshok khavaipam chiwui mibingna, “Khikhalajila PROHOna ngashit kahai ngalei chili athumli mathānvārarthuda kala athumli ningkakachaiwui vang, lamhāngli shaothat khavai thānkhavāna jihaora.”

²⁹Kaja nawui pangshap eina kala nawui pāng katingkhami eina thānshok kahai athum hi nawui mina kala nawui shimluina.’