Read Tangkhul Naga JOHN 1 Bible Online

JOHN 1 - Tangkhul Naga bible

JOHN 1

¹ Haokaphokli Tui chi leisai, Tui chi Vareli ngasosai, kala Tui chi Varena.

²Kharewui eina Tui chi Vareli ngasosai.

³ Ot saikora awui mangā eina kasāna kala sākahai saikora hi a mazangla kasā maleilakmana.

⁴ Awuili kharing leisai, kala kharing chi mikumowui kahorna.

⁵ Kahor china tangkhamangli horngasaka kala tangkhamangna chili mayuirarmana.

⁶ John kaho Varena chihokharā mi akha leisai.

⁷Saikorana awui manga eina shitsang khavai kahor chiwui shākhi samikida a kharāna.

⁸Kahor chi a maningmana, kha chiwui shākhi mikhavai kharāna.

⁹ Mi kachiva̱li horkhangasaka khamashunga kahor chi okathuili rākhamina.

¹⁰Tui chi okathuili leisai kala awui mangā eina okathui hi sakhuilala okathuina ali matheithuwa.

¹¹Ana awui ramli rai, kha awui mibingna ali makhuisangthuwa.

¹² Kha awui mingli shitsangda ali khuikasanga, asheewui lah asāwui kaphaning lah mikumowui kaphaning eina maningla

¹³ Varewui kaphaning eina kapharā saikorali ana Varewui naongarā ngasā khavai pangshap mi.

¹⁴ Kala Tui chi asā ngasāhaowa kala lukhamashan kala khamashung pemting eina ithumwui alungli raokthui. Avāvawui Naohonaotong sāda ana samkaphang awui tekhamatei chi ithumna yanga.

¹⁵ Johnna awui pongli shākhi mida vaoda hānga, “‘Iwui thili rāki kaje mipa china ili reimei, kaja ava ili rida leihairakasāna’ da ina kahāng mipa chi hina.”

¹⁶ Awuili pemting kahaiwui vang ithumna lukhamashanwuitungli lukhamashan ngarorda samphanga.

¹⁷ Ain hi Moseswui mangā eina mi, lukhamashan eina khamashung-khangarong hi Jishuwui eina rai.

¹⁸ Khipānakha Vareli matheilakranga; Avāva̱wui makāli khalei Naoho-naotongmāngna ali theingasaka.

¹⁹ Jerusalemli khalei Jihudibingwui kathānabingna pāngmonbing eina Levitebingli chihovāda Johnli “Na khipākhala?” da angahān ngasaka.

²⁰ Johnna khikha mangalarlakla mashungrik eina hānga, “I Khrista chi maningmana” da ngahānkai.

²¹ Chieina athumna “Chithākha na khipākhala? Elijahla?” da ngahāna. “Maningmana” da Johnna ngahānkai. “Na marānla?” da athumna ngahāna. “Maningmana” da ana ngahānkai.

²²Chieina athumna hānga, “Ithumli kashirātabingli unghāng khavai ‘Na khipākhala’ kaji hāngmilu. Na khalattana na khipāna jikhala?”

²³ Ana Isaiah marānwui tui eina hithada hānga, “Prohowui shongfa ngatar ngasaklu da lamhāngli vaokazat akhon chi ina”

²⁴Phariseebingna kachiho athumna Johnli rāhānga,

²⁵“Na Khristala maning, Elijahla maning, marān chila maningakha, khiwui vang eina ra̱hikhamikhala?”

²⁶ Johnna ngahānkai, “Ina tara̱ eina ra̱hikmi, kha nathumwui ngachaili akha nganingda khalei chi nathumna matheimana.

²⁷Iwui thili kharā chi ana, I awui pheihop khara̱ eina tangda makhalāmiphayomana.”

²⁸ Saikora hi Johnna ra̱hikmi khavai apam Jordankong vāklaida khalei Bethanyli kashokna.

²⁹ Akhama kathā Jishu rākharā theida Johnna hānga, “Yanglu, okathuiwui morei khuithuikhame Varewui Yaonao!

³⁰ ‘Iwui thili akha rārāli, ava ili reimei, khikhalajila ava ili rida leihaira kasāna’ da ina kahānga chi hipāna.

³¹Ila ali matheisāmana, kha Israelnaobingli a khipākhala da chithei khavai ina tara̱ eina ra̱hikkhamina.”

³² Johnna shākhi mida hānga; “Manglāna kazingramwui eina nāsha̱ thada tai kala awuitungli tākapa̱ ina thei.

³³I ali matheisāmana, kha tara̱ eina ra̱hikmi khavai ili kashirāta china ili hānga, ‘Manglāna tāda tākhangasāma, nana katheipa chi Manglā Kathara eina ra̱hikkhame china.

³⁴Ina chi theihaira kala ina nathumli kahāngna, a Varewui Naomayara chilaka.’”

³⁵ Akhama kathā Johnna awui sākhangatha̱ khanili ngasoda chili nganingsai,

³⁶kala Jishu zatkasā theida hānga, “Yanglu, Varewui yaonao!”

³⁷Sākhangatha̱ khani china awui kahāng chi shāda Jishuwui thi shurthuwa.

³⁸Jishuna ngareiunga kala ani shurzatkasā chi theida hānga, “Khi phākazatkhala?” Anina ngahānkai, “Ojā, na kali pamkhala?”

³⁹Jishuna ngahānkai, “Rāyanglu” (Chitharan ngazinwui pung mati shākha tāhairasai). Chieina anina ali ngasovāda awui pamkhavai athei kala chithang ali ngasopamhaowa.

⁴⁰ Johnwui tui shāda athi shurkhavā khani chiwui ngachaili akhava Simon Peterwui agato Andrewna.

⁴¹ Ana hengsāda ama Simonli samphangda hānga, “Ithum Messiahli samphanghaira.” (Tui hiwui kakhalatva Khrista kajina).

⁴² Chieina Simonli Jishuwuili thānvai. Jishuna ali yanglaga hānga, “Na Johnwui naomayara Simon kaho china, kha nawui aming Cephas hora.” (Hiwui kakhalata Peter kajina).

⁴³ Akhama kathā Jishuna Galileeli vākhavai ngarāna, kala ana Philipli samphangda hānga, “Ithi shurlu.”

⁴⁴(Philip hi Andrew eina Peterwui keinung Beth-saida kaho chiwui mina).

⁴⁵ Philipna Nathana-elli samphangda hānga. “Moseswui ainli kapi kahai kala marānbingnala kapi kahai mipa, Josephwui naomayara, Nazarethwui Jishu chili ithum samphanghaira.”

⁴⁶ Nathana-elna hānga, “Nazarethwui eina khamathā ot shokpairala?” “Rāyanglu” da Philipna ngahānkai.

⁴⁷Jishuna awui ngalemli Nathana-el rākharā kathei tharan, ana awui pongli hānga, “Yanglu, chukkhara̱ khikha makhalei Israelna; khayon khikhala maleimana.”

⁴⁸Nathana-elna ali ngahāna, “Nana ili kathada theikhala?” Jishuna ngahānkai, “Philipna mahokhuiranglakha na khaorārongwui azingli pamkasā ina thei.”

⁴⁹ Nathana-elna Jishuli ngahānkai, “Ojā, na Varewui Naomayarana! Na Israelwui awungana!”

⁵⁰Jishuna hānga, “Ina nali khaorārongwui azingli thei da kahāngwui vang shitkasangla? Nana hili hakkhamei kachungkha theifara.”

⁵¹ Kala Jishuna athumli hānga, “Kachangkhat eina ina nathumli kahāngna, nathumna kazingram shokahai theira, kala Varewui kazingraobingna miwui Naomayarawuitungli kakā katung theira.”